မၢၵ်ႇလူင် တူၵ်းသႂ်ႇၼႂ်းဝၢၼ်ႈၵမ်ႇပၼီႇ (ကမ္ဘနီ) ၸႄႈမိူင်းၶၢင် ၸၢၵ်ႇမၢၵ်ႇတိူဝ်ႉသႂ်ႇၵူၼ်းဝၢၼ်ႈ မၢတ်ႇၸဵပ်း 3 ၵေႃႉ ၼႂ်း ၼၼ်ႉ ၽူႈယိင်းၵေႃႉၼိုင်ႈ ထိုင်တိၼ်ပုတ်း ဝႃႈၼႆ။
ဝၼ်းတီႈ 11/06/2024 ယၢမ်းႁူဝ်ၶမ်ႈမွၵ်ႈ 6 မူင်းၶိုင်ႈ မၢၵ်ႇလူင် လုၵ်ႈၼိုင်ႈ မႃးတူၵ်းသႂ်ႇ ၼႂ်းဝၢၼ်ႈၵမ်ႇပၼီႇ ၸႄႈဝဵင်းမၢၼ်ႈမေႃႇ ၸႄႈမိူင်းၶၢင် ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈမၢတ်ႇၸဵပ်းၸွမ်း 3 ၵေႃႉ ယဝ်ႉၵေႃႈ ႁဵတ်းႁႂ်ႈၵူၼ်းဝၢၼ်ႈမွၵ်ႈ 300 လႆႈငိူင်ႉပၢႆႈဢွၵ်ႇဝၢၼ်ႈ။
ၵူၼ်းပိုၼ်ႉတီႈ ဝဵင်းမၢၼ်ႈမေႃႇ လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇလူင် ဢၼ်ယိုဝ်းမႃးၼၼ်ႉ ပဵၼ်မၢၵ်ႇၸုမ်းလႂ်ယိုဝ်းမႃးတႄႉ ဢမ်ႇႁူႉၶႃႈ ၸၢၵ်ႇမၢၵ်ႇတိူဝ်ႉၺႃး ၵူၼ်းဝၢၼ်ႈ 3 ၵေႃႉဢေႃႈ။ ၼႂ်းၼၼ်ႉ ၼၢင်းယိင်း 1 ၵေႃႉလႄႈ ၸၢႆး 2 ၵေႃႉ။ ၼၢင်းယိင်းၼၼ်ႉတႄႉ ထိုင်တီႈတိၼ်ပုတ်းၶႃႈဢေႃႈ။ ဢၼ်လူႉတၢႆတႄႉ ဢမ်ႇလႆႈငိၼ်းဝႃႈႁိုဝ်ၶႃႈ။ ယၢမ်းလဵဝ် ၵူၼ်းမၢတ်ႇၸဵပ်း ၸိူဝ်းၼၼ်ႉတႄႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃလူင်မၢၼ်ႈမေႃႇယဝ်ႉၶႃႈ”- ဝႃႈၼႆ။
ထိုင်မႃး ဝၼ်းတီႈ 12 ယၢမ်းၵၢင်ၼႂ် ၵူၼ်းဝၢၼ်ႈၵမ်ႇပၼီႇ ႁူဝ်ၵူၼ်းမွၵ်ႈ 300 ဢွၼ်ၵၼ် ပၢႆႈၽေးသိုၵ်းမႃးသွၼ်ႈဝႆႉ တီႈဝဵင်းမၢၼ်ႈမေႃႇ။ ယၢမ်းလဵဝ် ထူပ်းတၢင်းယၢပ်ႇၽိုတ်ႇဝႆႉ လွင်ႈၵိၼ်ယႅမ်ႉလႄႈ ၽႃႈႁူမ်ႇၶူဝ်းၼွၼ်း ၸိူဝ်းၼႆႉ ယွၼ်ႉဝႃႈ ၽွင်းပၢႆႈဢွၵ်ႇမႃးၼႆႉ ဢမ်ႇတၼ်းလႆႈသင်မႃး ဝႃႈၼႆ။
“လွင်ႈၵူၼ်းဝၢၼ်ႈ ပၢႆႈဢွၵ်ႇမႃးၼႆႉ ၵူဝ်တိူဝ်ႉၺႃးၸၢၵ်ႇမၢၵ်ႇတူၵ်းသႂ်ႇ ယဝ်ႉၵေႃႈ ၵူဝ်ပၢင်တိုၵ်း လၢမ်းမႃး ထိုင်ႁိမ်းႁွမ်းဝၢၼ်ႈသေ ၵူၼ်းဝၢၼ်ႈမွၵ်ႈ 300 ၸင်ႇလႆႈပၢႆႈဢွၵ်ႇမႃးသွၼ်ႈဝႆႉတီႈဝတ်ႉယူဝ်းၵျီးယႂႃႇမ ဝဵင်းမၢၼ်ႈမေႃႇၼႆႉၶႃႈဢေႃႈ”- ၵူၼ်းပိုၼ်ႉတီႈ ဝဵင်းမၢၼ်ႈမေႃႇ သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈဝတ်ႉယူဝ်းၵျီးယႂႃႇမ ဢၼ်လူဝ်ႇတၢင်းၸွႆႈထႅမ်ၼၼ်ႉသမ်ႉ မိူၼ်ၼင်ႇ ၽႃႈၵၢင်ယုင်း၊ သၢတ်ႇလႄႈ ၽႃႈသိူဝ်ႇ။ ယဝ်ႉၵေႃႈ ၶဝ်ႈၼမ်ႉတၢင်းၵိၼ် ၸိူဝ်းၼႆႉထႅင်ႈ ယွၼ်ႉဝႃႈ မိူဝ်ႈၽွင်းပၢႆႈမႃးၼၼ်ႉ ဢမ်ႇတၼ်းလႆႈ ၶူဝ်းၼုင်ႈဝႂ်၊ ၶွင်ၵိၼ်ယႅမ်ႉမႃးၸွမ်း ဝႃႈၼႆ။
တႄႇဢဝ် ႁူဝ်လိူၼ်မၢတ်ႊၶျ် 2024 ၼႆႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈတွၼ်ႈမၢၼ်ႈမေႃႇလႄႈ မျိတ်ႉၵျီးၼႃး (ၸေႈၼႃး) ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ် ၵမ်ႈၼမ် ပၢင်တိုၵ်း ပဵၼ်ၼႂ်းဝၢၼ်ႈတႆးလႄႈ ႁဵတ်းႁႂ်ႈၵူၼ်းဝၢၼ်ႈ ပၢႆႈၽေးသိုၵ်း ၵႂႃႇသွၼ်ႈၸွမ်း လႅၼ်လိၼ်ၶၢင် – ၶႄႇ တီႈဝဵင်းလွႆ ၸေႊ ယဝ်ႉၵေႃႈ ၼႂ်းဝဵင်းမၢၼ်ႈမေႃႇ၊ မျိတ်ႉၵျီးၼႃးလႄႈ ဝဵင်းၼမ်ႉၶမ်း ၸိူဝ်းၼႆႉ ႁူဝ်ၵူၼ်းၼပ်ႉႁဵင် ၼႆယဝ်ႉ။
ယွၼ်ႉပၢင်တိုၵ်းၼႆႉသေ မိူဝ်ႈဝၼ်းတီႈ 10-11 ၶၢဝ်းတၢင်း 2 ဝၼ်းထပ်းၵၼ်မႃးၼႆႉ မၢၵ်ႇလူင်တူၵ်းသႂ်ႇ ၵူၼ်းမိူင်း လူႉတၢႆ 2 ၵေႃႉ မၢတ်ႇၸဵပ်း ဢမ်ႇယွမ်း 7 ၵေႃႉယဝ်ႉ တီႈဝဵင်းမႂ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ