သိုၵ်းမၢၼ်ႈ ယိုတ်းမိူင်း မၢပ်ႇၼႄးဢဝ်လိူင်ႈ လူၺ်ႈလွင်ႈႁဵတ်းၵၢၼ်လႅၵ်ႈငိုၼ်း ၼွၵ်ႈမိူင်း ဢမ်ႇၶဝ်ႈတၢင်း ၵၢၼ်ၼႆသေ တီႉၺွပ်း ၵူၼ်းႁဵတ်းၵၢၼ်လႅၵ်ႈငိုၼ်း 39 ၵေႃႉသေ ပိၵ်ႉဢိုတ်းပႃး သဵၼ်ႈမၢႆယေးငိုၼ်းလႄႈ Pay Account ဝႃႈ ၼႆ။
တႄႇဢဝ် ဝၼ်းတီႈ 24 လိူၼ်မေႊ တေႃႇထိုင် ဝၼ်းတီႈ 4 လိူၼ်ၵျုၼ်ႊ ၶၢဝ်းတၢင်းၸမ် 2 ဝူင်ႈမႃးၼႆႉ သိုၵ်းမၢၼ်ႈ ယိုတ်းမိူင်း တီႉၺွပ်းပိၵ်ႉဢိုတ်း ၵူၼ်းႁဵတ်းၵၢၼ်လႅၵ်ႈငိုၼ်းၼွၵ်ႈမိူင်း 39 ၵေႃႉ ယၢမ်းလဵဝ် တိုၵ်ႉသိုပ်ႇၵူတ်ႇထတ်း ၵူၼ်း ႁဵတ်းၵၢၼ်လႅၵ်ႈငိုၼ်းၼွၵ်ႈမိူင်းထႅင်ႈယူႇၼႆ – ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 4 လိူၼ်ၵျုၼ်ႊၼႆႉ ၼင်ႇၼႆ။
လိူဝ်ၼၼ်ႉ သိုၵ်းမၢၼ်ႈမၢပ်ႇၼႄးဝႃႈ – ၸုမ်းသိုဝ်ႇၶၢဝ်ႇလႄႈ ၵူၼ်းမၢင်ၵေႃႉၼႆႉ တင်ႈၸႂ် တႅမ်ႈၶၢဝ်ႇပိုၼ်ၽႄ ႁဵတ်းႁႂ်ႈ ၵၢၼ်မၢၵ်ႈမီးဝၢၼ်ႈမိူင်းတူၵ်းသုမ်း၊ ယွၼ်ႉၼၼ် ၵူၼ်းလႆႈဝႂ်ၶႂၢင်ႉလၢႆႊသိၼ်ႇ ႁဵတ်းၵၢၼ်လႅၵ်ႈငိုၼ်း ၼွၵ်ႈမိူင်း ၸိူဝ်း ၼၼ်ႉ ၸွင်ႇႁဵတ်းသၢင်ႈၸွမ်း ၼင်ႇမၢႆမီႈ ဢၼ်မၵ်းမၢႆဝႆႉၼၼ်ႉႁိုဝ် ဢၼ်ဝႃႈၼၼ်ႉ တိုၵ်ႉထတ်းၸွမ်းဝႆႉ။ ဢိင်ၼိူဝ်လွင်ႈ ပၢၼ်ႇယေးငိုၼ်းသေ ၵူၼ်းမိူင်း ယုမ်ႇယမ်တမ်းၸႂ်လႆႈယူႇ ဝႃႈၼႆဝႆႉ။
မိူဝ်ႈဝၼ်းတီႈ 27 လိူၼ်မေႊ ပူၼ်ႉမႃးၼႆႉ မၢပ်ႇၼႄးဝႃႈ လဵၼ်ႈၶၼ်ၶမ်းၼႆသေ သိုၵ်းမၢၼ်ႈတီႉၺွပ်း ၵူၼ်း ၵႃႉၶၢႆၶမ်း 21 ၵေႃႉ၊ ၼႂ်းၼၼ်ႉ ၸဝ်ႈႁၢၼ်ႉၶမ်းၸိုဝ်ႈယႂ်ႇ မိူၼ်ၼင်ႇ ဢွင်ႇတမႃႇတိ၊ ဝဵဝ်ႉၸဵင်ႇလႄႈ ႁၢၼ်ႉၶမ်း သွႆးထႅတ်ႉၸိူဝ်း ၼႆႉၵေႃႈ ၶဝ်ႈပႃးဝႆႉ။
ဝၢႆးလင် သိုၵ်းမၢၼ်ႈယိုတ်းမိူင်း ၶၼ်ငိုၼ်းမိူင်းမၢၼ်ႈ တူၵ်းႁႅင်း၊ ၶၼ်ၶမ်း ၼိုင်ႈၵျၢပ်ႈ ပုင်ႈၶိုၼ်ႈထိုင် 58 သႅၼ်ပျႃး၊ ပဵၼ်ၶၼ်ၶမ်းသုင်သုတ်း ၼႂ်းပိုၼ်းၵၢၼ်ၵႃႉၶၢႆၶမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ