သိုၵ်းမၢၼ်ႈ တဵၵ်းၶၢၼ်းႁွင်ႉ ၵူၼ်းၼုမ်ႇၼႂ်းမိူင်းတႆး လၢႆၸႄႈဝဵင်း 1,600 ပၢႆ ၶဝ်ႈၾိုၵ်းၵၢၼ်သိုၵ်းထႅင်ႈ ၸုပ်ႈသွင် ဝႃႈ ၼႆ။

ဝၼ်းတီႈ 29/05/2024 ယူႇတီႈ ၸုမ်းလဵပ်ႈႁဵၼ်း လွင်ႈမိူင်းမၢၼ်ႈလႄႈ ပတိၵ်ႈၶၢတ်ႈ BACS ၵဵပ်းၶေႃႈမုလ်းႁၢႆးငၢၼ်းဝႆႉဝႃႈ တႃႇပၢင်သွၼ်ၵၢၼ်သိုၵ်း သိုၵ်းမၢၼ်ႈ ၸုပ်ႈ 2 ၼႆ့ သိုၵ်းမၢၼ်ႈတဵၵ်းၶၢၼ်းႁွင့်ၵူၼ်းၼုမ်ႇ လၢႆၸႄႈဝဵင်း ၼႂ်းမိူင်းတႆး – ပွတ်းၸၢၼ်း၊ ပွတ်းႁွင်ႇလႄႈ ပွတ်းဢွၵ်ႇ ႁူဝ်ၵူၼ်း 1,600 ပၢႆ ဝႃႈၼႆ။

တႃႇပၢင်သွၼ်ၵၢၼ်သိုၵ်း သိုၵ်းမၢၼ်ႈ ၸုပ်ႈ 2 ၼႆႉ သိုၵ်းမၢၼ်ႈတဵၵ်းၶၢၼ်းႁွင်ႉ ၵူၼ်းၼုမ်ႇ ၼႂ်းၼႃႈတီႈ တ တၵ – 3 ၵဵင်းတွင်း မွၵ်ႈ 200 ၵေႃႉ၊ တတၵ – 8 တၢင်ႉယၢၼ်း 500 ပၢႆ၊ တတၵ 11 ၵဵင်းတုင် 500 ပၢႆ၊ ယၵတ -1 ပထူး မွၵ်ႈ 200 ၵေႃႉလႄႈ တၵၼ ႁူဝ်ပူင်း 200 ၵေႃႉ ႁူမ်ႈသဵၼ်ႈမီး 1,600 ၵေႃႉ တေလႆႈၶဝ်ႈၾိုၵ်း ၵၢၼ်သိုၵ်း တႂ်ႈသိုၵ်းမၢၼ်ႈ ဝႃႈၼႆ။

ပၢင်သွၼ်ၵၢၼ်သိုၵ်း သိုၵ်းမၢၼ်ႈ ၸုပ်ႈ 2 ၼႆႉ ၼႂ်းမိူင်းႁူမ်ႈတုမ်ပတ်းပိုၼ်ႉ သိုၵ်းမၢၼ်ႈပိုတ်ႇဝႆႉ 16 တီႈ၊ ၼႂ်းၼၼ်ႉ 5 တီႈၼႆႉမီးဝႆႉ ၼႂ်းမိူင်းတႆး။

ၸွမ်းၼင်ႇ ၸုမ်း BACS ပိုၼ်ၽၢဝ်ႇဝႆ့ၼႆ ၼႂ်းမိူင်းႁူမ်ႈတုမ်ပတ်းပိုၼ်ႉ ၵူၼ်းၼုမ်ႇ ဢၼ်ၺႃးသိုၵ်းမၢၼ်ႈ တဵၵ်းၶၢၼ်းႁွင်ႉၶိုၼ်ႈပၢင်သွၼ်ၵၢၼ်သိုၵ်း ၸုပ်ႈ 2 ၼႆႉ မီးဝႆႉ 4,000 ပၢႆ ဝႃႈၼႆ။

မိူဝ်ႈဝၼ်းတီႈ 29 လိူၼ်မေႊ တီႈပၢင်ႁူပ်ႉထူပ်းတင်း ၵူၼ်းၶိုၼ်ႈပၢင်သွၼ် တီႈၸၼ်ႉၸွမ်သိုၵ်း တပ်ႉမ တေႃႇ ဝဵင်းပၢင်ႇဢူးၼၼ်ႉ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ လၢတ်ႈဝႃႈ – ၵူၼ်းမႃးၶိုၼ်ႈပၢင်သွၼ် ၵၢၼ်သိုၵ်းယူႇၼႆႉ ဢမ်ႇၸႂ်ႈယွၼ်ႉတၢင်ႇၵေႃႉ ပၼ်ႁႅင်းဢီးသေမႃးၶဝ်ႈႁူမ်ႈ ယူႇတီႈ ၵၢင်ၸႂ်ၸဝ်ႈၵဝ်ႇသေ မႃးၶဝ်ႈႁူမ်ႈၶိုၼ်ႈ ပၢင်သွၼ်ၵၢၼ်သိုၵ်း ၵူၺ်း – ဝႃႈၼႆ။

မိူဝ်ႈဝၼ်းတီႈ 10 လိူၼ်ၾႅပ်ႊပိဝ်ႊရီႊ ပူၼ်ႉမႃးၼႆႉ သိုၵ်းမၢၼ်ႈ ဢွၵ်ႇပၵ်းပိူင် ၵူၼ်းမိူင်းတေလႆႈႁဵတ်းသိုၵ်း၊ ၼႂ်းၵၢင်လိူၼ်မၢတ်ႊၶျ် သိုၵ်းမၢၼ်ႈ တႄႇၵဵပ်းသိုၵ်းၵူၼ်းမိူင်းမႃး ၼႂ်းမိူင်းႁူမ်ႈတုမ်ပတ်းပိုၼ်ႉ၊ မိူဝ်ႈပၢင်သွၼ်ၵၢၼ်သိုၵ်း ၸုပ်ႈ ၼိုင်ႈၼၼ်ႉ သိုၵ်းမၢၼ်ႈ တဵၵ်းၶၢၼ်းႁွင်ႉဢဝ်ၵႂႃႇ ၵူၼ်းၼုမ်ႇ မွၵ်ႈ 9,000 ၵေႃႉ ဝႃႈၼႆ။