လိူၼ်မေႊပူၼ်ႉမႃးၼႆႉ ၶၼ်ငိုၼ်းလႄႈၶမ်း မိူင်းမၢၼ်ႈဢမ်ႇၼိမ် ပုင်ႈၶိုၼ်ႈသုင်ႁႅင်း ၼႂ်းပိုၼ်းလႄႈ သိုၵ်းမၢၼ်ႈၼႄးဝႃႈ ပဵၼ်ယွၼ်ႉၵူၼ်းႁဵတ်းၵၢၼ်ၶမ်းၶဝ် လဵၼ်ႈၶၼ်ၶမ်းလႄႈ ၸင်ႇပဵၼ်ၼႆသေ လိုပ်ႈလမ်းတီႉၺွပ်းၵူၼ်းႁဵတ်းၵၢၼ်ၶမ်း ပိုၼ်ၽၢဝ်ႇဢဝ်လိူင်ႈဝႆႉပႃး ႁၢၼ်ႉၶၢႆၶမ်းၸိုဝ်ႈသဵင်ယႂ်ႇ ၼႂ်းၸိုင်ႈမိူင်း 7 ၵေႃႉ။

ဝၼ်းတီႈ 31/05/2024 ယူႇတီႈ သိုၵ်းမၢၼ်ႈလႄႈ ႁွင်ႈၵၢၼ်ၾၢႆႇၼႂ်းမိူင်းႁူမ်ႈၵၼ်သေတီႉၺွပ်း ၵူၼ်းၵႃႉၶၢႆၶမ်း 50 ၵေႃႉ ၼႂ်းၼၼ်ႉ တႃႇ 10 ၵေႃႉ တၼ်းလႅၼ်ႈပၢႆႈပူၼ်ႉလွတ်ႈပႅတ်ႈ ၸိူဝ်းၵိုတ်း လိူဝ်ၼၼ်ႉတႄႉ ဢဝ်ၵႂႃႇၵူတ်ႇထတ်းထဵတ်ႈထၢမ်ဝႆႉတီႈဝဵင်းလိူဝ်ႇလႄႈ တီႈတႃႈၵုင်ႈ ဝႃႈၼႆ။

ယၢမ်းလဵဝ် ဢၼ်ထုၵ်ႇပိုၼ်ၽၢဝ်ႇ ဢဝ်လိူင်ႈဝႆႉ ပဵၼ်ႁၢၼ်ႉၶၢႆၶမ်း ဢွင်ႇသမႃႇထိ၊ ၸွႆးထႅတ်ႉလႄႈ တင်းဝဵင်ႉၸဵင်ႇ ၸိူဝ်း ၼႆႉပႃးထႅင်ႈ။

ၼႂ်းဝူင်ႈပူၼ်ႉမႃးၼႆႉၵူၺ်း ၶၼ်မိူင်းမၢၼ်ႈပုင်ႈၶိုၼ်ႈသုင်ထိုင် 1 ၵျၢပ်ႈ 50 သႅၼ်ပၢႆ ပဵၼ်ၶၼ်ၶမ်း ဢၼ်သုင်သုတ်းၼႂ်းပိုၼ်းမိူင်းမၢၼ်ႈ – သိုဝ်ႇၶၢဝ်ႇ DVB ႁၢႆးငၢၼ်းဝႆႉၼင်ႇၼႆ။