ၵူၼ်းၼုင်ႈသိူဝ်ႈ ဢၼ်မီးမိၵ်ႈမၢႆ ပႃႇတီႇၼူၵ်ႉယုင်း NLD သေ ၶဝ်ႈဝဵင်းမိူင်းၽျၢၵ်ႈမႃးၼၼ်ႉ ပလိၵ်ႈမၢၼ်ႈ ဢွၼ်ၵၼ်တိုၼ်ႇသၢၼ်ႈ လႄႇႁႃတီႉၺွပ်း ၵူၼ်းၼုင်ႈသိူဝ်ႈၼၼ်ႉ ဝႃႈၼႆ။

ပူၼ်ႉမႃး မိူဝ်ႈႁၢင်လိူၼ်မေႊ 2024 ၼႆႉ မီးၵူၼ်းၼုင်ႈသိူဝ်ႈ ဢၼ်မီးမိၵ်ႈမၢႆ ပႃႇတီႇၼူၵ်ႉယုင်း NLD ဢၼ်တေႃႇဢွင်ႇသၢၼ်းၸူႉၵျီႇ ဢွၼ်ႁူဝ်ဝႆႉၼၼ်ႉ ၶဝ်ႈလႄႇၼႂ်းၵၢတ်ႇလူင် ဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်း ဢွၵ်ႇသေ ႁဵတ်းႁႂ်ႈပလိၵ်ႈမၢၼ်ႈ လႄႇႁႃသွၵ်ႈတဝ် ၶိုင်ဢၢင်ႈတီႉၺွပ်း ၼႆယဝ်ႉ။

ၵူၼ်းမိူင်းၽျၢၵ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မီးၵူၼ်းၼုင်ႈသိူဝ်ႈ ဢၼ်မီးမိၵ်ႈမၢႆ ပႃႇတီႇၼူၵ်ႉယုင်း NLD သေ မႃးလႄႇၸွမ်းၵၢတ်ႇလႄႈ မီးၵူၼ်းႁၼ်မႅၼ်ႈသေ ၵႂႃႇတိူင်ႇလၢတ်ႈပလိၵ်ႈမၢၼ်ႈ။ ၶဝ်မႃး လၢႆၵေႃႉတႄႉ ဢမ်ႇတၼ်းလႆႈႁူႉ ၸွမ်းၶႃႈ။ ဝၢႆးၼၼ်ႉၵေႃႈ ပလိၵ်ႈသိုၵ်းမၢၼ်ႈၶဝ် ဢွၼ်ဢဝ်ဢဵၼ်ႁႅင်း ၵူၼ်းၶဝ်သေ လႄႇသွၵ်ႈတဝ် ၸွမ်းၼႂ်းဢိူင်ႇၼႂ်းဝၢၼ်ႈပေႃးၶႂ်ႈၸွတ်ႇယဝ်ႉ။ ထၢင်ႇတႄႉ တေပဵၼ်ၸၢဝ်းလႃးႁူႇၶဝ် ဢၼ်ယူႇၸွမ်းၼိူဝ်လွႆ ၸိူဝ်းၼၼ်ႉ ၼုင်ႈသိူဝ်ႈ ၼၼ်ႉသေ မႃးသိုဝ်ႉၶွင်ၵိၼ်ယႅမ်ႉ ၼႂ်းဝဵင်းၶႃႈယူဝ်ႉ။ ၵူၺ်းၵႃႈ ၶဝ်တေဢမ်ႇလႅပ်ႈယူႇႁိုင်လႄႈ ပလိၵ်ႈမၢၼ်ႈ ဢမ်ႇတၼ်းႁၼ်တူဝ်ၶဝ်ၶႃႈ”- ဝႃႈၼႆ။

ယၢမ်းလဵဝ် ပႃႇတီႇၵၢၼ်မိူင်း  ဢၼ်တၢင်ႇမၢႆၾၢင် တႃႇၶဝ်ႈပၢင်လိူၵ်ႈတင်ႈ ၸွမ်းသိုၵ်းမၢၼ်ႈ တေဢွၼ်ၼမ်းၸတ်း ၼၼ်ႉ မီးဝႆႉ 47 ပႃႇတီႇ။ ၾၢႆႇသိုၵ်းမၢၼ်ႈတႄႉ ၵႆႉတူၵ်ႇတၵ်ႉလၢတ်ႈဝႃႈ တေၸတ်းပၢင်လိူၵ်ႈတင်ႈဝႆးဝႆးၼႆႉ ဝႃႈၼႆသေတႃႉ ထိုင်မိူဝ်ႈလဵဝ် ပႆႇႁၼ်ၼမ်ႉႁၼ်တူဝ်သင်။ ပေႃးပဵၼ်ပႃႇတီႇၵၢၼ်မိူင်း ၸိူဝ်းဢမ်ႇတၢင်ႇမၢႆၾၢင် တီႈၶဝ်သၢၼ်ၶတ်း ၸိူဝ်းၼၼ်ႉ ၶဝ်တိုၼ်းမၵ်းမၼ်ႈဝႃႈ ပဵၼ်ၶဵၼ်ၶဝ် ၵမ်းသိုဝ်ႈ ဝႃႈၼႆ။

“ပေႃးပဵၼ် ၵူၼ်းမိူင်းၽၵ်းၵႃတႄႉ ဢမ်ႇပေႃးႁူႉၾၢႆႇၵၢၼ်မိူင်းသင် သမ်ႉၼုင်ႈၺႃးသိူဝ်ႈၶူဝ်း၊ မၢၵ်ႇႁူဝ် ဢၼ်မီးမိၵ်ႈမၢႆ NLD လႄႈ မိၵ်ႈမၢႆတၢင်ႇပႃႇတီႇ ဢၼ်သၢၼ်ၶတ်းသိုၵ်းမၢၼ်ႈၼၼ်ႉ ၼႆၸိုင်။ ၸၢင်ႈႁဵတ်းႁႂ်ႈပလိၵ်ႈ – သိုၵ်းမၢၼ်ႈၶဝ် ထၢင်ႇၽိတ်းသေ ၸၢင်ႈႁဵတ်းႁၢႆႉတေႃႇလႄႈ လီၾၢင်ႉၵၼ်တႄႉတႄႉၶႃႈ”- ၵူၼ်းမိူင်းၽျၢၵ်ႈ သိုပ်ႇလၢတ်ႈၼႄၼင်ႇၼႆ။

ၶၢဝ်းတၢင်း သိုၵ်းမၢၼ်ႈ ယိုတ်းမိူင်းမႃး 3 ပီပၢႆၼႆႉ ၵူၼ်းၸိူဝ်းၺႃးၸုမ်းသိုၵ်းမၢၼ်ႈ ထၢင်ႇထိူမ်ပဵၼ်ၸႂ် ၸုမ်းၼၼ်ႉ ၸုမ်းၼႆႉသေ ထုၵ်ႇတီႉၺွပ်းၵုမ်းၶင် ႁဵတ်းႁၢႆႉသႂ်ႇၵေႃႈ မီးမႃးၶိူဝ်းယႂ်းလႄႈ မၢင်ၸိူဝ်း ၺႃးတီႉၺွပ်းလူၺ်ႈဢမ်ႇတၼ်းၾၢင်ႉတူဝ် ၸိူဝ်းၼႆႉၵေႃႈ မီးၼမ်။