မိူဝ်ႈၼႆႉ ဝၼ်းတီႈ 02/06/2024 ယၢမ်းႁူဝ်ၶမ်ႈ မွၵ်ႈ 5:40 မူင်း မီးၵူၼ်းၸၢႆး 3 ၵေႃႉ ယိပ်းၵွင်ႈၸေးမိုဝ်းသေ ၶဝ်ႈတီႉၺွပ်း လုင်းၵျေႃႇၼၢႆႇ ဢႃယုမွၵ်ႈ 60 ပီ တီႈႁိူၼ်းမၼ်းၸၢႆး ပွၵ်ႉၸၢၼ်း ၾၢႆႇလင် ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းမူႇ ၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မီးၵူၼ်းႁၢႆႉ 3 ၵေႃႉ လူင်းၵႃးမႃးသေ တီႉဢဝ် တူဝ်လုင်းၵျေႃႇၼၢႆႇၼႆႉၵႂႃႇ။ မိူဝ်ႈၽွင်းၼၼ်ႉ မၼ်းၸၢႆးၼင်ႈလဵၼ်ႈတီႈၼႃႈႁိူၼ်းဝႆႉ ၽိူဝ်ႇဝႃႈ ႁၼ် ၵူၼ်းႁၢႆႉၼၼ်ႉ ၶဝ်ႈမႃးၵေႃႈ မၼ်းၸၢႆးလႅၼ်ႈၶဝ်ႈႁိူၼ်း တၼ်းလႅၼ်ႈသွင်သၢမ်ယၢင်ႈၵူၺ်း ၵူၼ်းႁၢႆႉၼၼ်ႉ ဢဝ်သူၼ်ႈၵွင်ႈထုပ်ႉသႂ်ႇမၼ်း ၸၢႆး လႆႈမၢတ်ႇၸဵပ်းလိူတ်ႈဢွၵ်ႇသေ လၢၵ်ႈဢဝ်တူဝ်မၼ်းၸၢႆး သႂ်ႇၵႃးၶဝ် ၵႂႃႇဢေႃႈ”- ဝႃႈၼႆ။

ၵူၼ်းႁၢႆႉၼၼ်ႉ ၶီႇၵႃးသႅၼ်း Crown သီၶၢဝ်မႃးလမ်းၼိုင်ႈသေ မီးၵူၼ်းၸၢႆး 3 ၵေႃႉ လူင်းၵႃးမႃး ယဝ်ႉၵေႃႈ ယိပ်းၵွင်ႈ ၸေးမိုဝ်းဝႆႉ ၵူႈၵေႃႉ။ လုင်းၵျေႃႇၼၢႆႇ ဢႃယုမွၵ်ႈ 60 ပီၼႆႉ မၼ်းၸၢႆး ႁဵတ်းၵၢၼ်ပၢႆးမၢၵ်ႈမီး သိုဝ်ႉၶၢႆရူတ်ႉၵႃး တီႈဝဵင်းမူႇၸေႊ ဝႃႈၼႆ။

ဢိင်ၼိူဝ် လွင်ႈၼႆႉ မိူဝ်ႈလိူၼ်မေႊပူၼ်ႉမႃးၼၼ်ႉ ၵူၼ်းမူႇၸေႊ ၵႆႉၺႃးၸူၼ်ၸွမ်းသဵၼ်ႈတႃႈသၢႆတၢင်း မီးမႃး ဢမ်ႇယွမ်း 5 ၵေႃႉယဝ်ႉ ဝႃႈၼႆ။

မိူဝ်ႈဝၼ်းတီႈ 27/05/2024 ယၢမ်းဝၢႆးဝၼ်း 1 မူင်း ၼၼ်ႉၵေႃႈ ၼုမ်ႇၸၢႆး ၵေႃႉၼိုင်ႈ ၺႃးၵူၼ်းႁၢႆႉ 3 ၵေႃႉ ဢဝ်ၵွင်ႈငႃသေ ၶိုင်လၢၵ်ႈၸၼ် ဢဝ်တူဝ်မၼ်းၸၢႆးၶိုၼ်ႈၵႃးၵႂႃႇ တီႈပွၵ်ႉႁူဝ်ၼႃး ဝဵင်းမူႇၸေႊ ၼၼ်ႉတႄႉ ဢမ်ႇတၼ်းလႆႈတူဝ် ၵႂႃႇ ယွၼ်ႉမၼ်းၸၢႆး တၼ်းဢဝ်တူဝ်ပၢႆႈလွတ်ႈ ဝႃႈၼႆ။

ယဝ်ႉၵေႃႈ မိူဝ်ႈဝၼ်းတီႈ 19/05/2024 ၼၼ်ႉၵေႃႈ ၽူႈတၢင်ၼႃႈ (ၼၢင်းယိင်း) 2 ၵေႃႉ ၺႃးၸူၼ်ၸွမ်း တၢင်းတီႈသဵၼ်ႈတၢင်းမၢႆ 5 ၵွင်း 45 ပွၵ်ႉၼိူဝ် ၼၼ်ႉၵေႃႈ သုမ်းၵႂႃႇငိုၼ်းမၢၼ်ႈ 30 သႅၼ်ပၢႆ ယဝ်ႉၵေႃႈ သၢႆၶေႃးၶမ်း၊ မူင်းၶူၺ်းလႄႈ ၾူၼ်း ၸိူဝ်းၼႆႉ။

မိူၼ်ၼႆ ၼင်ႇၵဝ်ႇ မိူဝ်ႈဝၼ်းတီႈ 17/05/2024 ယၢမ်းၵၢင်ၶိုၼ်း 11 မူင်းၶိုင်ႈ ဢွၼ်ႇယိင်း သွင်ၵေႃႉ ၽွင်း တိုၵ်ႉပႆတၢင်း ပွၵ်ႈႁိူၼ်းၼၼ်ႉ ၺႃးၵူၼ်းၸၢႆး 4 ၵေႃႉ သွၼ်ႉရူတ်ႉၶိူင်ႈသွင်လမ်း ၸူၼ်ႁိမ်ဢဝ်ၾူၼ်းၶဝ် တီႈပွၵ်ႉတူဝ်ႇယွတ်ႈ ၼၼ်ႉၵေႃႈ သုမ်းၵႂႃႇၾူၼ်းလုၵ်ႈၼိုင်ႈ ဝႃႈၼႆ။