ၾူၼ်တူၵ်းႁႅင်းလိၼ်ၵူၼ်ႇ တီႈၸႄႈဝဵင်းလႁႄႇ ၼႃႈလိၼ်ၽွင်းငမ်းတူဝ်ၵဝ်ႇၼႃႇၵ တိူင်းၸႄႈၵႅင်းၼၼ်ႉ လုၵ်ႈ ဢွၼ်ႇတၢႆ 3 ၵေႃႉ ၵူၼ်းလူင်တၢႆ ၵေႃႉၼိုင်ႈ။
ဝၼ်းတီႈ 28/05/2024 ပူၼ်ႉမႃးၼႆႉ ၵူၼ်းမိူင်း ၼႂ်းတိူင်းၸႄႈၵႅင်း ၸိူဝ်းၶဝ်ပေႃႈလုၵ်ႈၵၼ် လုၵ်ႉတီႈႁႆႈသေပွၵ်ႈမႃး ၶိုၼ်း မႃးၺႃးၼမ်ႉလွႆၼွင်း လိၼ်ၵူၼ်ႇတဵင်ၺႃးသေ လူႉတၢႆ ဝႃႈၼႆ။
ၵေႃႉပဵၼ်ပေႃႈ ဢႃယု 50 ပီ။ လုၵ်ႈဢွၼ်ႇတႄႉ ဢႃယု 9 ပီၵေႃႉၼိုင်ႈ၊ 15 ပီၵေႃႉၼိုင်ႈ၊ ထႅင်ႈၵေႃႉၼိုင်ႈတႄႉ ဢမ်ႇလႆႈ ႁူႉၸွမ်း။ တေႃႇထိုင်ဝၼ်းတီႈ 30 လိူၼ်ၼႆႉ ဢမ်ႇႁႃႁၼ်တူဝ်တၢႆၶိုၼ်း ၶၢဝ်ႇ Naga News တႅမ်ႈတၢင်ႇဝႆႉၼင်ႇၼႆ။
ဝၼ်းၼၼ်ႉ ႁိူၼ်းယေးၵူၼ်းမိူင်းၵေႃႈ ပႃးၵႂႃႇၸွမ်းၼမ်ႉၼွင်း 9 လင်။ ၵူၼ်းဝၢၼ်ႈ 50 ပၢႆ လႆႈၶၢႆႉပၢႆႈ တီႈယူႇ။
ဝဵင်းလႁႄႇၼႆႉ ၵႆယၢၼ်ဝဵင်းယႂ်ႇဝႆႉသေ ၵၢၼ်ၵပ်းသိုပ်ႇၵၼ်ယၢပ်ႇၽိုတ်ႇဝႆႉ။ ယၢမ်းလဵဝ် ၾႆးၾႃႉ ၵေႃႈၶၢတ်ႇ၊ လႅင်း ၾူၼ်း ဢိၼ်ႇတႃႇၼႅတ်ႉၵေႃႈ ဢမ်ႇလႆႈလႄႈ တႃႇၸွႆႈထႅမ်ၵူၼ်းထူပ်းၽေး ၼမ်ႉထူမ်ႈၼၼ်ႉ ပဵၼ်ဢၼ်ယၢပ်ႇၽိုတ်ႇလႄႈ လီမႆႈၸႂ်ဝႆႉ ဝႃႈၼႆ။
ဢၢင်ႈဢိင် RFA
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ