ၵူၼ်းမူႇၸေႊ ဢွၼ်ႇၸၢႆးၼုမ်ႇ ၵေႃႉၼိုင်ႈ ၺႃးၸူၼ် ၸွမ်းသဵၼ်ႈတၢင်း ၶိုင်လၢၵ်ႈၸၼ်ဢဝ်တူဝ်မၼ်း ၸၢႆးၶိုၼ်ႈၵႃး ၵႂႃႇ ၵူၺ်းဢမ်ႇတၼ်းလႆႈတူဝ်ၵႂႃႇ ဝႃႈၼႆ။

ဝၼ်းတီႈ 27/05/2024 ယၢမ်းဝၢႆးဝၼ်း 1 မူင်း ဢွၼ်ႇၸၢႆး ၵေႃႉၼိုင်ႈ ၺႃးၵူၼ်းႁၢႆႉ 3 ၵေႃႉ ဢဝ်ၵွင်ႈငႃသေ ၶိုင်လၢၵ်ႈ ၸၼ် ဢဝ်တူဝ်မၼ်းၸၢႆးၶိုၼ်ႈၵႃးၵႂႃႇ တီႈပွၵ်ႉႁူဝ်ၼႃး ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။

ဢွၼ်ႇၸၢႆး ၵေႃႉၺႃးၸူၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မႅၼ်ႈၽွင်း ၶႃႈတေၵႂႃႇတီႈသူၼ် တေၵႂႃႇ ၵဵပ်းငိုၼ်းၼႆသေ ၺႃးၵူၼ်းႁၢႆႉ ၶီႇၵႃး Wish သီၶၢဝ် မႃးလမ်းၼိုင်ႈ ႁေႃႈမႃးႁႄႉတတ်းၼႃႈ ရူတ်ႉၶိူင်ႈၶႃႈ ၵူၼ်းႁၢႆႉၼၼ်ႉ လူင်းၵႃးမႃးသေ ဢဝ်ၵွင်ႈပွတ်းငႃၶႃႈ တင်းသၢမ်ၵေႃႉ ၶႃႈဝႃႈပေႃးတေဢဝ်ရူတ်ႉၶိူင်ႈတႄႉ ဢဝ်ၵႂႃႇလႃႈ ၶဝ်သမ်ႉဝႃႈ ဢမ်ႇဢဝ် တေဢဝ်တူဝ်ၶႃႈၵႂႃႇ မိူဝ်ႈၽွင်းၼၼ်ႉ မႃသမ်ႉႁၢဝ်ႇႁႅင်းလႄႈ ၵူၼ်းႁၢႆႉ ၼၼ်ႉ ၼႅတ်ႈၶီႇၵႃးပၢႆႈ။ ၶႃႈၵေႃႈ ၼႅတ်ႈလႅၼ်ႈပၢႆႈၶဝ်ၵမ်းလဵဝ်ဢေႃႈ။ ပေႃးၵူဝ်ၵွင်ႈၶဝ်တႄႉ ယူဝ်ၶႄးၼႂ်း ၵႃးၼၼ်ႉ တေပႃးၶႃႈၵႂႃႇၸွမ်းၶဝ်ယဝ်ႉ”- ဝႃႈၼႆ။

ဢိင်ၼိူဝ် လွင်ႈၼႆႉသေ ၼႂ်းၵွင်ႈ CCTV ဢၼ်လႆႈထၢႆႇ VDO ၵဵပ်းဝႆႉၶေႃႈမုလ်း မိူဝ်ႈၽွင်း ပိူင်ပဵၼ်ၼၼ်ႉ ၵူၼ်းႁၢႆႉ ၼၼ်ႉ ၶီႇၵႃး Wish သီၶၢဝ် လမ်းၼိုင်ႈ ႁေႃႈမႃးႁႄႉသႂ်ႇၾၢႆႇၼႃႈရူတ်ႉၶိူင်ႈ ဢွၼ်ႇၸၢႆးၼုမ်ႇၼႆႉသေ လူင်းၵႃးမႃးလၢၵ်ႈ ၸၼ်မၼ်းၸၢႆးၶိုၼ်ႈရူတ်ႉၶဝ် ယဝ်ႉၵေႃႈ ဢဝ်ၵွင်ႈငႃပႃးထႅင်ႈ မိူဝ်ႈၽွင်းၼၼ်ႉ မၼ်းၸၢႆး တၼ်းၶႄတူဝ်သေ လႅၼ်ႈလွတ်ႈဢွၵ်ႇမႃး ဝႃႈၼႆ။

“လႆႈၵူဝ်ဢေႃႈ ၶဝ်ၼႆႉပဵၼ်ၸူၼ်မီးရူတ်ႉၵႃး ၶဝ်ၵိုတ်းဝႆႉၼမ်ၼႃႇ ၼႂ်းဝဵင်းၼႆႉ ပေႃးၵႂႃႇမႃး တေပဵၼ်လမ်းလႂ် ဢမ်ႇႁူႉ ၶႃႈတႄႉၵေႃႈ ဢမ်ႇႁတ်းဢွၵ်ႇႁိူၼ်းၼၼ်ႉယဝ်ႉ။ လီၽၢၼ်ႈၼႃႇ ယူႇၵေႃႈလႆႈၵူဝ် ၵႂႃႇၵေႃႈလႆႈ ၵူဝ် မၼ်းဢမ်ႇမီးလွင်ႈႁူမ်ႇႁူမ်ႇ ၼႂ်းပွၵ်ႉၼႂ်းဝဵင်းၶႃႈ ယၢမ်းလဵဝ်ၼႆႉ”- ဢွၼ်ႇၸၢႆး ၵေႃႉၺႃးၸူၼ် သိုပ်ႇ လၢတ်ႈၼႄၼင်ႇၼႆ။

ၼႂ်းဝဵင်းမူႇၸေႊၼႆႉ ဢၼ်ၵူၼ်းမိူင်းၵႆႉၺႃး ၽူႈလၵ်ႉၸၵ်ႉၶုတ်ႈၸိူင်ႉၼႆၼႆႉ လႆႈဝႃႈၼိုင်ႈလိူၼ်လႂ် ဢမ်ႇ ယွမ်း 5-6 ပွၵ်ႈ။ ပူၼ်ႉမႃး မိူဝ်ႈဝၼ်းတီႈ 19 လိူၼ်မေႊၼႆႉ ၽူႈတၢင်ၼႃႈ 2 ၵေႃႉ ၺႃးၸူၼ်ၸွမ်း တၢင်းလႆႈ သုမ်းၵႂႃႇ ငိုၼ်းၶမ်းလႄႈ ၾူၼ်း ၸိူဝ်းၼႆႉ။