ဝၢႆးလင် လူင်းလၢႆးမိုဝ်းၸွမ်း ၶေႃႈလႆႈၸႂ်ႁၢႆႊၵႅၼ်ႊယဝ်ႉၼႆ ပၢင်တိုၵ်းၼႂ်းမိူင်းတႆးပွတ်းႁွင်ႇ ဢၼ်ပဵၼ်ၼႂ်းၵႄႈ ၸုမ်း ဢူၺ်းလီသၢမ်ပီႈၼွင်ႉလႄႈ ၸုမ်းသိုၵ်းမၢၼ်ႈယိုတ်းမိူင်းၼၼ်ႉ ၵိုတ်းယိုတ်းၵႂႃႇသေတႃႉ တပ်ႉသိုၵ်းရၶႅင်ႇ AA ဢၼ် ဢမ်ႇၵဵဝ်ႇၵပ်းတင်းမိူင်းတႆးၵမ်းသိုဝ်ႈတႄႉ သိုပ်ႇပိုတ်ႇၼႃးသိုၵ်း ၼႂ်းမိူင်းရၶႅင်ႇၶဝ် ၶပ်ႉၶပ်ႉတၢမ်းတၢမ်းလူင်မႃး ႁၢၼ်ႉတေႃႇပေႃးၵုမ်းၵမ်လႆႈ ၸႄႈဝဵင်းၼႂ်းမိူင်းၶဝ်လႄႈ ၼႂ်းမိူင်းၶျၢင်း ႁူမ်ႈသဵၼ်ႈမီးၸမ် ထိုင်သိပ်းယဝ်ႉ။
မိူင်းရၶႅင်ႇ ဢၼ်မီးယူႇ 17 ၸႄႈဝဵင်းၼၼ်ႉ ဢၼ်ပႆႇပဵၼ်ပၢင်တိုၵ်း ၵိုတ်းယူႇသွင်ဢၼ်ၵူၺ်းယဝ်ႉ။ တပ်ႉငဝ်ႈ သိုၵ်း တပ်ႉပိဝ်ႇႁႃႇလႄႈ တပ်ႉၵွင် ၸိူဝ်းမီးတႂ်ႈလွင်ႈၵုမ်းၵမ် ငဝ်ႈငုၼ်းတိူင်းသိုၵ်းပွတ်းဝၼ်းတူၵ်း (နပခ) ၶွင်ၸၵၸ (စကစ) ၼၼ်ႉ ထိုင်တီႈပေႃးၶႂ်ႈၸမ်မူၺ်ႉႁၢႆယဝ်ႉ။
ၵူၺ်းၵႃႈ ၽိူဝ်ႇဝႃႈယိုတ်းလႆႈယဝ်ႉ ၸႄႈဝဵင်းပူးတီးတွင်ႇၼၼ်ႉ ၵဵဝ်ႇၵပ်းသုၼ်ႇလႆႈသုၼ်ႇပဵၼ်ၵူၼ်းသေ ၵိူတ်ႇ မီးမႃးၶၢဝ်ႇငၢဝ်း ႁူင်ႁၢင်းႁၢဝ်ႈႁႅင်းဝႃႈ ၸိူဝ်းၸုမ်းသိုၵ်း AA ၼႆႉ တင်ႈၸႂ်ၾႆးၸုတ်ႇၽဝ်သႂ်ႇ ႁိူၼ်းယေး ရူဝ်ႊႁိၼ်ႊၵျႃႊၶဝ်လႂ်၊ ပူၼ်ႉပႅၼ်လူလၢႆတေႃႇ သုၼ်ႇလႆႈသုၼ်ႇပဵၼ်ၵူၼ်းလႂ် တႂ်ႈၼႃႈတၼ်းတႃၵူၼ်း မိူင်းတင်းလၢႆ ၼႆယဝ်ႉ။
လိူၼ်မေႊ ဝၼ်းတီႈ 22 ၸုမ်းရူဝ်ႁိင်ၵီယႃ 16 ၸုမ်း ဢၼ်ပၵ်းသင်ႉယူႇၵူႈမိူင်းမိူင်းၼၼ်ႉ ဢွၵ်ႇလိၵ်ႈပိုၼ် ၽၢဝ်ႇယိုၼ်ႈယွၼ်းဝႃႈ တႃႇၵႄႈလိတ်ႈပတိၵ်ႈၶၢတ်ႈ ၼႂ်းၵႄႈသိုၵ်းရၶႅင်ႇတင်းၶဝ်ၼၼ်ႉ ၶႂ်ႈႁူပ်ႉဢုပ်ႇၸွမ်း ႁူဝ်ၼႃႈ AA ႁိုဝ် ULA ၊ ၵူႈမိူင်းမိူင်း ႁႂ်ႈပၼ်တၢင်းၸွႆႈဢၼ်ယၼ်ၼိူဝ် လွင်ႈၶိူဝ်းၵူၼ်းတူၺ်းထိုင်ၵၼ် ၼႆယဝ်ႉ။
ၼႂ်းဝၼ်းလဵဝ်ၵၼ်ၵူၺ်း ၸိူဝ်းၸုမ်းတူင်ႇဝူင်းၵူၼ်း (CSOs) 195 ၸုမ်းၵေႃႈ ႁူမ်ႈပိုၼ်ၽၢဝ်ႇတုၵ်းယွၼ်းဝႃႈ ႁႂ်ႈၵိုတ်းယိုတ်းၵမ်းသိုဝ်ႈ ၼိူဝ်လွင်ႈဢဝ်သၢႆၸႂ်ၶူဝ်းၶွင်ၸေးၸိမ်ႇလႄႈ ၾၢင်ငဝ်း ၶွင်ရူဝ်ႊႁိၼ်ႊၵျႃႊသေ ၸႂ်ႉတိုဝ်းတႃႇတၢင်းၽႂ်ၶႂ်ႈလိူင်ႈၵၢၼ်မိူင်း၊ လိူင်ႈၵၢၼ်သိုၵ်းၼၼ်ႉ ၼႆယဝ်ႉ။
ၵဵဝ်ႇလူၺ်ႈလိူင်ႈမိူင်းရၶႅင်ႇၼႆႉ ယိၼ်းမႆႈၸႂ် လိုၵ်ႉလိုၵ်ႉၼႂ်းၼႂ်းၼႃႇၼႆ ႁွင်ႈၵၢၼ် လိူင်ႈမိူင်းၼွၵ်ႈၶွင် ဢမေႊရိ ၵၼ်ႊ ပိုၼ်ၽၢဝ်ႇပၢၵ်ႇလၢတ်ႈၵႂႃႇဢမ်ႇၵႃး ၶွင်ႇသီႇၶိုၵ်ႉတွၼ်းၾၢႆႇပၼ်တၢင်းၶႆႈၸႂ် ၵဵဝ်ႇၵပ်းမိူင်းမၢၼ်ႈ ( SAC-M ) ၵေႃႈ တိုၵ်းသူၼ်းဝႃႈ ၵပ်းၵၢႆႇတင်းငဝ်းလၢႆးသုၼ်ႇလႆႈသုၼ်ႇပဵၼ်ၵူၼ်း ၼႂ်းမိူင်းမၢၼ်ႈယၢမ်းလဵဝ်ၼႆႉသေ ၵိုင်ႇလီၸတ်းပၢင်ၵုမ်ၶိုၵ်ႉ ၶၵ်ႉယူႇ ၼႆယဝ်ႉ။
ၵူၺ်းၼၼ်သေတႃႉ ၾၢႆႇ AA တႄႉ တုမ်ႉတွပ်ႇၶိုၼ်းဝႃႈ ၶၢဝ်ႇငၢဝ်းဢၼ်ၼႆႉ ဢမ်ႇၸႂ်ႈဢၼ်ပဵၼ်တႄႉမီးတႄႉ၊ ၵွပ်ႈၼႆ ယႃႇႁႂ်ႈလၢမ်းလိမ်း သႄႉသွမ်းသွတ်ႇသေႈ ႁႂ်ႈၵိူတ်ႇပဵၼ်လိူင်ႈၽိတ်းၽႅၵ်ႇတႅၵ်ႇငၢၵ်ႈၵၼ် ၼႂ်းၵႄႈသွင်ၸၢဝ်းၶိူဝ်းပိုၼ်ႉတီႈ ၼႆယူႇယဝ်ႉ။
ပေႃးတူၺ်းၸွမ်း ၶေႃႈၶၢၼ်တွပ်ႇ ၶွင်ၸွမ်ပွင်ၵၢၼ်သိုၵ်း AA ထွၼ်းမရၢတ်ႉၼၢႆႇ တႅမ်ႈလၢတ်ႈဝႃႈ“ ပိူဝ်ႈတႃႇ ၸိူဝ်းတႆးၵေႃႉလၵ်းလိင်း ဢၼ်ႁဵတ်းၼႃႈလိူမ်ႈၸွမ်းၸႂ်ပၼ် ၸဝ်ႈတႃႇၼၶဝ် ပေႃးဝႆႉၶိုၵ်ႉလိူဝ်သေ တၢင်း ၸိုဝ်ႈၸႂ်ႈဢၼ်ထုၵ်ႇ လွင်ႈမႅၼ်ႈပိူင်ၼၼ်ႉတႄႉ ယွၼ်းသူးႁႂ်ႈလႆႈ ၸၢမ်ႇမူၼ်ႈၼႂ်းၵၢၼ်မိူင်းမိူဝ်းၼႃႈ ဢၼ်ၵိုင်ႇတၢၼ်ႇတင်းသူၶဝ် ၼၼ်ႉလႃႈ” ၼႆၸိုင် မိူၼ်တင်းၼႄးသႂ်ႇၸုမ်းတူင်ႇဝူင်းၵူၼ်း ၸိူဝ်းဢွၵ်ႇၶေႃႈပိုၼ် ၽၢဝ်ႇၼၼ်ႉ တူၺ်းၼႃႈငိုၼ်းသေ မၢပ်ႇလႅၼ်ၵူၺ်းၼၼ်ႉယဝ်ႉ။
ၼႂ်းၼၼ်ႉ ၶႂ်ႈတူၵ်ႇပႃး NUG ဢၼ်ဢွၵ်ႇဝႆႉၶေႃႈပိုၼ်ၽၢဝ်ႇ မိူဝ်ႈဝၼ်းတီႈ 21 ၼၼ်ႉယူႇ၊ ၵွပ်ႈပိူဝ်ႈ ၶေႃႈပိုၼ် ၽၢဝ်ႇၶဝ်ၼၼ်ႉ ၾၢႆႇမၢၼ်ႈလႄႈ ၾၢႆႇဢိင်းၵလဵတ်ႈ ဢမ်ႇၵႂႃႇႁွႆႈလဵဝ်ၵၼ်၊ ၽိူဝ်ႇၺႃးထတ်းသၢင်သႄႉသွမ်း ၸင်ႇသမ်ႉမႄး ၶိုၼ်း။ တေႃႈမႄးယဝ်ႉၵေႃႈ ဢမ်ႇႁၼ်ၸႅင်ႈလႅင်းလီဝႃႈ ၶဝ်ၼႄးသႂ်ႇ AA ႁႃႉ ၼႄးသႂ်ႇသိုၵ်းမၢၼ်ႈၼႄႇၼႆသႄႈ။
ပဵၼ်ႁိုဝ်ၵေႃႈ မၼ်းၸုၵ်းမၼ်ႈၾၢႆႇ ၸိူဝ်းၸုမ်းၸၢဝ်းသၢၼ်ၶတ်းတေႃႇ ၽူႈပူၼ်ႉပႅၼ် ၼိူဝ်သုၼ်ႇလႆႈသုၼ်ႇ ပဵၼ် ၶွင်ၵူၼ်းမိူင်းတင်းလၢႆၼၼ်ႉယူႇ ဝႃႈၼႆလႄႈ ပွင်ႇဝႃႈ ဢဝ်လၢႆးဢွမ်ႈသေ သႄႉသွမ်းၼိူဝ် AA ၵူၺ်းၼင်ႇၵဝ်ႇ။
တီႈတႄႉမႃး ၵဵဝ်ႇၵပ်းၾႆးမႆႈႁိူၼ်းယေး ၶွင်ရူဝ်ႊႁိၼ်ႊၵျႃႊ တီႈပူးတီးတွင်ႇၼၼ်ႉ ပဵၼ်ၽူႈလႂ်ၶွင်ႈမၢပ်ႇ တႄႉတႄႉၼႆ ယင်းပႆႇပႃႈလႆႈႁူႉၸွမ်းၸႅင်ႈလႅင်း။ ၾႆးမႆႈဝၢႆး AA ယိုတ်းလႆႈႁႃႉ ၵွၼ်ႇပႆႇယိုတ်းႁိုဝ် ပႆႇႁူႉတႅတ်ႈတေႃး။ ၵွပ်ႈၼႆ ၽိူဝ်ႇတေၼႄးသႂ်ႇၸုမ်းၼၼ်ႉၸုမ်းၼႆႉ သင်တိုၵ်းသူၼ်း တႃႇၽၢၼ့်ႁၼ်တၢင်ႇၽိုၼ်လႆႈ ပိူင်ပဵၼ် ဢၼ်တႄႉလႄႈ တႃႇပၼ်တူတ်ႈလႆႈ တီႈၽူႈၶွင်ႈမၢပ်ႇတႄႉၼၼ်ႉ ယင်းတေလီ။
လမ်ႇလွင်ႈသုတ်းတႄႉ NUG ၼႆႉ ၸွမ်းၼင်ႇမၼ်းယၼ်တီႈ NLD ဢၼ်ယၢမ်ႈၸုၵ်း ၸင်ႈႁႄႉၵင်ႈပၼ် တပ်ႉ မတေႃႇ ဢၼ်ၵႂၢတ်ႇလၢင်ႉၶိူဝ်းရူဝ်ႊႁိၼ်ႊၵျႃႊၶဝ်မႃးၼၼ်ႉလႄႈ ပဵၼ်တီႈလီငမ်းငဝ်း ၼိူဝ်လွၵ်းၸုၵ်းမၼ်းဝႆႉ ၼၼ်ႉယဝ်ႉ။
ၵွပ်ႈသင် မိူဝ်ႈလဵဝ်ၸင်ႇမႃး ႁူႉၸၵ်းသုၼ်ႇလႆႈသုၼ်ႇပဵၼ်ၵူၼ်း ၶွင်ရူဝ်ႊႁိၼ်ႊၵျႃႊ၊ တေဝႃႈ ၶဝ်ၸုၵ်းၾၢႆႇ AA ၼႆႁႃႉ ယိုင်ႈၶႅၼ်းတေယုမ်ႇယၢပ်ႇၵွၼ်ႇ၊ ယွၼ်ႉပိူဝ်ႈ ႁူဝ်ၼႃႈ NLD ယၢမ်ႈၸီႉသင်ႇ ႁႂ်ႈတပ်ႉသိုၵ်းမၢၼ်ႈၸႂ်ႉ ၶိူင်ႈမိၼ်သေ ပိုတ်းတိုၵ်းၸုမ်း AA မႃးလူး။
တၢမ်တူဝ် NUG ၵေႃႈ ၵွၼ်ႇ AA ပႆႇတိုၵ်း ၸုမ်းသိုၵ်းမၢၼ်ႈၼၼ်ႉ ယၢမ်ႈသႄႉသွမ်းလူလၢႆတေႃႇ AA မႃး ဢမ်ႇၸႂ်ႈႁိုဝ်။ ပိူင်ပဵၼ်ၸိူဝ်းၼႆႉ မၼ်းၵဵဝ်ႇၵပ်းတင်းၼမ်ႉႁူႉၸၵ်းၼိူဝ် သုၼ်ႇလႆႈသုၼ်ႇပဵၼ်ၵူၼ်းၼၼ်ႉ လုမ်း လုမ်းယဝ်ႉ။
ၸဵမ်မိူဝ်ႈ ၵူၼ်းရူဝ်ႊႁိၼ်ႊၵျႃႊ ႁူၵ်းၸဵတ်းသႅၼ်ၵေႃႉ လႆႈပၢႆႈလိပ်းပၢႆႈလႅင် ၼႂ်းပီ 2017 တေႃႇထိုင် ႁူဝ်ၼႃႈ NLD တႅၼ်းတၢင်ၸုမ်းလူင်ပွင်ၸိုင်ႈသေ ၵႂႃႇထဵင်ပၢၵ်ႈၵႅတ်ႇၼႃႈႁူမ်ႇလပ်ႉပၼ် တၢင်းႁဵတ်းတပ်ႉမတေႃႇ မိူဝ်ႈပီ 2019 ၸမ်သဵင်ႈၼၼ်ႉ ဢမ်ႇၶုၵ်းၸႂ်လႆႈလၢတ်ႈပႃးမႃးဢၼ်ဝႃႈ “လွင်ႈလွၵ်ႇငိုတ်ႈတေႃႇ လိူင်ႈသွၼ် ႁဵၼ်းလႄႈ လိူင်ႈပၢႆးယူႇလီ ၼႆႉ ပဵၼ်လိူင်ႈလၢဝ်း ၼိူဝ်သုၼ်ႇလႆႈသုၼ်ႇပဵၼ်ၵူၼ်း။ ပဵၼ်လိူင်ႈၵႂၢတ်ႇလၢင်ႉ ပူၼ်ႉပႅၼ်လူင် ၼိူဝ်တူင်ႇဝူင်းၵူၼ်း” ၼႆသႄႈ။ လွင်ႈၼႆႉ မိူဝ်ႈႁဵတ်းလူင်ပွင်ၸိုင်ႈပဵၼ်တၢင်းၵၢၼ်ၼၼ်ႉၵေႃႈ ဢမ်ႇႁဵတ်းႁႂ်ႈ ၵူၼ်းမိူင်းႁူႉၸၵ်းမႃး၊ ၽိူဝ်ႇထိုင်ပၢၼ်ပဵၼ် လူင်ပွင်ၸိုင်ႈယၢၼ်မိူင်းမႃးၵေႃႈ တမ်ႉပႆႇတူၵ်ႇထိုင် ၸွမ်းၼႆတႄႉ တင်ႈၸႂ်ထိမ်ႇဝႆႉႁႃႉ၊ တိုၼ်းဢမ်ႇႁူႉၸၵ်းတႄႉႁိုဝ် တႃႉလီငမ်းငဝ်းထၢင်ႇထိူမ်တႄႉယဝ်ႉ။
တီႈတႄႉမႃး ဢဝ်ၾိင်ႈပိူင်တီႇမူဝ်ႇၶရေႇၸီႇဝႃႈၵေႃႈလီ၊ ဢဝ်ၾိင်ႈတိုဝ်းၵမ်ၵူႈမိူင်းမိူင်းဝႃႈၵေႃႈလီ လွင်ႈလွၵ်ႇငိုတ်ႈတေႃႇ ၽူႈႁၢပ်ႇၵၢၼ်လိူင်ႈပၢႆးပၺ်ႇၺႃႇလႄႈ လိူင်ႈပၢႆးယူႇလီၶဝ် လူၺ်ႈဢမ်ႇႁဵတ်းCDM ၼၼ်ႉလႂ်၊ လိူင်ႈ လွၵ်ႇငိုတ်ႈတေႃႇလုၵ်ႈႁဵၼ်းၶဝ် ယွၼ်ႉသိုပ်ႇတေႃႇၵၢၼ်ႁဵၼ်း တႂ်ႈသိုၵ်းမၢၼ်ႈၵုမ်းၵမ်ၼၼ်ႉလႂ် ၸဵမ်ၸိူဝ်းၼႆႉ တိုၼ်းၸႂ်ႈလိူင်ႈလၢဝ်းၵႂၢတ်ႇလၢင်ႉတေႃႇ ၶိူဝ်းၵူၼ်းၵမ်းသိုဝ်ႈယဝ်ႉ။
တၢမ်တူဝ်ၸဝ်ႈဢႃႇၼႃႇ ၶိူဝ်းမၢၼ်ႈ ပႃးၸဵမ်ၾၢႆႇတပ်ႉသိုၵ်းၶဝ် ၸႂ်ႉတိုဝ်းဝႃႇတၶိူဝ်းယႂ်ႇသေ ႁႄႉႁၢမ်ႈလွၵ်ႇငိုတ်ႈတေႃႇ ၵၢၼ်သွၼ်ႁဵၼ်း ၸိူဝ်းၸၢဝ်းၶိူဝ်း ဢၼ်ဢမ်ႇၸႂ်ႈမၢၼ်ႈၼၼ်ႉမႃး ပၢၼ်သိုပ်ႇပၢၼ်ၼႆႉ ႁွႆးဝႃႈပဵၼ် လိူင်ႈၽိတ်းလိုၵ်ႉလူင်ၼႆ ဢမ်ႇသင်ၵေႃႈ ယူႇတီႈ NUG ဢၼ်ဢၢၼ်းႁဵတ်းလူင်ပွင် ၸိုင်ႈမိူင်းႁူမ်ႈတုမ် ပၢၼ် မႂ်ႇၼၼ်ႉ တၵ်းလီလႆႈႁူႉၸၵ်း ၼပ်ႉယမ်ၵမ်ပိုၼ် ပူင်ႇသႂ်ထိုင်တီႈၸၢဝ်းၶိူဝ်းတင်းလၢႆယူႇယဝ်ႉ။
ယွၼ်ႉမၼ်း ဢမ်ႇႁူႉပုၼ်ႈၽွၼ်း ဢမ်ႇႁဵတ်းပုၼ်ႈၽွၼ်းဢၼ်ၼႆႉလႄႈ ၸင်ႇဝႃႈ ၽိူဝ်ႇမႃးၸီႉၸမ်ႈတေႃႇ ပ တိၵ်ႈၶၢတ်ႈသုၼ်ႇလႆႈသုၼ်ႇပဵၼ်ၵူၼ်း ၼႂ်းမိူင်းရၶႅင်ႇ ယၢမ်းလဵဝ်ၼႆႉ ပဵၼ်တီႈလီငမ်းငဝ်းထၢင်ႇထိူမ်လူင်ဝႆႉ ယူႇၼၼ်ႉယဝ်ႉ။
ယၢမ်းလဵဝ် ၸုမ်းၸၢဝ်းၶိူဝ်းမႅၵ်ႇၵွင်ႈလုၵ်ႉၽိုၼ်ႉ ၵမ်ႈၽွင်ႈ ဢဝ်သုၼ်ႇၼိူဝ်ၵၢၼ်ဢွင်ႇပေႉပၢင်တိုၵ်းသေ ၸီႉသင်ႇၵူႈ ၸၢဝ်းၶိူဝ်း ၸိူဝ်းၸွတ်ႇၸေးပႅၵ်ႇပိူင်ႈၵၼ်သေ ယူႇၸွမ်းၵၼ်မႃးလူၺ်ႈပိူင်ၾၢင်ၶိုၵ်ႉၶၢႆးၽႂ်မၼ်း ၼၼ်ႉ ႁႂ်ႈဢွၼ်ယွမ်းႁပ်ႉၼုင်ႈဝႆ ၶူဝ်းလဵင်းၶွင်ၸၢဝ်းၶိူဝ်းၸုမ်းပေႉပၢင်တိုၵ်းသေ ၶိုၼ်ႈသွၼ်ႁဵၼ်းၼၼ်ႉလႂ်၊ ၽိူဝ်ႇတေၶတ်းၸႂ်ၶိုင်သၢင်ႈ တႃႇပွင်ႈသွၼ်ႁဵၼ်း ၶိုတ်းၸွမ်းၸၼ်ႉၵမ်ႇၾႃႇ သမ်ႉၵူၺ်းၵုမ်ႇၶႂ်ႈဢဝ်ၽႃႇသႃႇ ၸိူဝ်ႉၶိူဝ်းတူဝ်ၵဝ်ႇ ဢၼ်ပႆႇမီးလၵ်းၸဵင်ထွႆႈၵႂၢမ်း၊ ဢၼ်ပႆႇမီးပပ်ႉပိုတ်ႇတႅတ်ႈထွႆႈၵႂၢမ်းၼၼ်ႉ ႁႂ်ႈပဵၼ် ၽႃႇသႃႇသုၼ်ၵၢင် တႃႇၵၢၼ်သွၼ်ႁဵၼ်းပိုၼ်ႉတီႈ တူင်ႇတၢင်ႇၼၼ်ႉလႂ် ၸဵမ်ၸိူဝ်းၼႆႉ တိုၼ်းၶဝ်ႈပဵၼ်လိူင်ႈ လၢဝ်းပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း ၵူၺ်းဢမ်ႇၵႃး ပဵၼ်ပႃးလိူင်ႈၵႂၢတ်ႇလၢင်ႉ တူင်ႇဝူင်းၶိူဝ်းၵူၼ်း ယဝ်ႉၼႆ တၢမ်တူဝ်ႁူဝ်ၼႃႈ ၸုမ်းလုၵ်ႉၽိုၼ်ႉၶဝ် ယင်းဢမ်ႇႁူႉၸၵ်းတုင်းႁပ်ႉၼပ်ႉထိုဝ်ၼႆတႄႉ တႃႇဝႃႈၶဝ် တေပဵၼ်မႃး ၽူႈပွင်မိူင်းလီ ဝၢႆးသိုၵ်းယဝ်ႉယႃႇၵႂႃႇတႄ့ လႅပ်ႈတေမုင်ႈမွင်းယၢပ်ႇယူႇ ၶႂ်ႈဝႃႈၼင်ႇၼႆ။
