ၵူၼ်းမိူင်းတုၵ်းယွၼ်း လူင်ပွင်ၸိုင်ႈသွင်ၾၢႆႇ ႁႂ်ႈပိုတ်ႇပၼ်လၢၼ်ႇ BP – 1 တီႈၼွင်ဢုၵ်း

ၵူၼ်းမိူင်းပိုၼ်ႉတီႈ တုၵ်းယွၼ်း လူင်ပွင်ၸိုင်ႈသွင်ၾၢႆႇ ႁႂ်ႈပိုတ်ႇပၼ်လၢၼ်ႇ BP – 1 တီႈဝဵင်းပုင်ႇပႃႇၶႅမ် ၼႂ်းၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ လႅၼ်လိၼ်တႆး – ထႆး ဝႃႈၼႆ။

ယၢမ်းလဵဝ် ၵူၼ်းမိူင်းဝဵင်းပုင်ႇပႃႇၶႅမ် သင်ၶႂ်ႈၵႂႃႇယူတ်းယႃတူဝ် ၼႂ်းမိူင်းထႆးၸိုင် လႆႈပၼ်ႇၵႂႃႇတၢင်း ဝဵင်းမိူင်းတူၼ်၊ မိူင်းသၢတ်ႇ ထိုင်ဝဵင်းတႃႈၶီႈလဵၵ်း ၸင်ႇၶၢမ်ႈလႅၼ်လိၼ် ၶဝ်ႈတၢင်းမႄႈသၢႆ ယွၼ်ႉသၢႆသဵၼ်ႈတၢင်းယၢပ်ႇၽိုတ်ႇႁႅင်း လႄႈ ၶၢဝ်းယၢမ်းသဵင်ႈၼမ် သင်ပိုတ်ႇပၼ် လၢၼ်ႇ BP – 1 ၼႆႉ တွၼ်ႈတႃႇၶဝ်ႈဢွၵ်ႇၸူးမိူင်းထႆး တေတိူဝ်းငၢႆႈလူမ်ၼႆ – ၵူၼ်းပိုၼ်ႉတီႈ လၢတ်ႈၼင်ႇၼႆ။

လၢၼ်ႇလႅၼ်လိၼ် BP – 1 ၼႆႉ ပေႃးလုၵ်ႉတီႈဝဵင်းပုင်ႇပႃႇၶႅမ်ၵႂႃႇၸိုင် တေႁိုင်မွၵ်ႈ 30 မိၼိတ်ႉ ၵူႈပွၵ်ႈ ပဵၼ်လၢၼ်ႇ ၵူၼ်းမိူင်းလႆႈၸႂ်ယႂ်ႇ ၶဝ်ႈဢွၵ်ႇၵႂႃႇမႃးၵႃႉၶၢႆတေႃႇၵၼ် တီႈၼိုင်ႈ။

ပုင်ႇပႃႇၶႅမ် – တႃႈၶီႈလဵၵ်းၼႆႉသမ်ႉ ၶၢဝ်းတၢင်းႁိုင်မွၵ်ႈ 7 ၸူဝ်ႈမူင်း၊ ၵႃႈၵႃး ၼိုင်ႈၵေႃႉလႆႈပၼ်သႅၼ်ပၢႆ (ငိုၼ်းထႆး 1,000 ဝၢတ်ႇ) ၊ ၵူၼ်းပိုၼ်ႉတီႈ မိူင်းသၢတ်ႇ၊ မိူင်းတူၼ်၊ ပုင်ႇပႃႇၶႅမ်၊ မိူင်းထ လႅၼ်လိၼ်တႆး – ထႆး ၸိူဝ်းၼႆႉ သင်ၶႂ်ႈ ယူတ်းယႃတူဝ်ၼႆ ၵမ်ႈၼမ် ၶဝ်ႈၵႂႃႇယူတ်းယႃတၢင်းမိူင်းထႆး ဝႃႈၼႆ။

ယၢမ်းလဵဝ် လၢၼ်ႇ BP – 1 ပိၵ်ႉဝႆႉသေတႃႉ မီးၵူၼ်းဢဝ်ငိုၼ်းမွၼ် ၼိုင်ႈၵေႃႉ 6 သႅၼ်ပၢႆသေ လတ်းၶၢမ်ႈလႅၼ်လိၼ် ၶဝ်ႈၵႂႃႇတၢင်းမိူင်းထႆး ဢမ်ႇၸႂ်ႈတၢင်းၵၢၼ်ၵေႃႈမီး ဝႃႈၼႆ။

လၢၼ်ႇ BP – 1 ၼႆႉ သိုၵ်းမၢၼ်ႈ တႄႇပိၵ်ႉဢိုတ်းမႃး မိူဝ်ႈပီ 2005 – 2006 ႁိုင်မႃးၶၢဝ်းတၢင်းမွၵ်ႈ 18 ပီယဝ်ႉ ပႆႇပိုတ်ႇ။ ၼႂ်းပိုၼ်ႉတီႈၼၼ်ႉသမ်ႉ မီးၸုမ်းဝႆႉ သိုၵ်းဝႃႉ UWSA လႄႈ သိုၵ်းတႆး RCSS/SSA ၸိူဝ်းၼႆႉ တူင်ႉၼိုင်ဝႆႉ။