ၵူၼ်းၸၢႆး ဢႃယု 40 ပၢႆ ၵေႃႉၼိုင်ႈ ၺႃးယိုဝ်း တၢႆထင်တီႈ ၼႂ်းဝဵင်းတႃႈၶီႈလဵၵ်း ၸုမ်းၵူၼ်းယိုဝ်းၼၼ်ႉ ပဵၼ်ၽႂ် ႁၢၼ်ႉတေႃႇထိုင်ယၢမ်းလဵဝ် ပႆႇတီႉၺွပ်းလႆႈ။

ဝၼ်းတီႈ 22/05/2024 ယၢမ်းၶမ်ႈ 7 မူင်းပၢႆ ၸၢႆးသၢမ်သိူဝ် ဢႃယု 40 ပၢႆ ၺႃးယိုဝ်း တီႈၾၢႆႇလင် လုမ်းၽူႈၵွၼ်းပွၵ်ႉႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ တၢႆထင်တီႈ ၸုမ်းၵူၼ်းယိုဝ်းၼၼ်ႉ ပဵၼ်ၽႂ်ၼႆ တေႃႇထိုင်ယၢမ်းလဵဝ် ပႆႇလႆႈႁူႉ ၶီႇၵႃးဝီႊၵူဝ်ႊ Vigo လမ်းၼိုင်ႈသေ မႃးယိုဝ်းသႂ်ႇယဝ်ႉႁေႃႈပၢႆႈ ဝႃႈၼႆ။

ၸၢႆးသၢမ်သိူဝ် ဢႃယု 40 ပၢႆ ၵေႃႉၺႃးယိုဝ်းၼႆႉ မၼ်းၸၢႆး ပဵၼ်ၵူၼ်းထႆး မႃးတႄႇၼႃႈႁိူၼ်းသေ ယူႇသဝ်းၵိၼ်သၢင်ႈ ၼႂ်းပွၵ်ႉႁွင်ႈလိုၵ်ႉ တီႈဝဵင်းတႃႈၶီႈလဵၵ်းၼႆႉ မီးမွၵ်ႈ 3 ပီယဝ်ႉ ဝႃႈၼႆ။

ၵူၼ်းၼႂ်းပွၵ်ႉႁွင်ႈလိုၵ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းပဵၼ်ၵူၼ်းထႆးၼႆဢေႃႈ ။ မၼ်းပၢႆႈဢမူႉၶ တီးတၢင်းမိူင်းထႆးသေ မႃးယူႇဝႆႉတၢင်းၶီႈလဵၵ်းၼႆႉၼႆ ဢေႃႈ ။ မႃးဢဝ်မေးတၢင်း ႁွင်ႈလိုၵ်ႉၼႆႉဢေႃႈ။ ၵမ်ႈၼမ် တီႈတႃႈၶီႈလဵၵ်းၼႆႉ ဢၼ်ပိူၼ်ႈၵႆႉယိုဝ်း ၵၼ်တၢႆၼႆႉတႄႉ ပဵၼ်ယွၼ်ႉပၢႆးမၢၵ်ႈမီး သုၼ်ႇတူဝ်ၶဝ်ၵူၺ်း၊ ပဵၼ်ယွၼ်ႉၶဝ်ၸတ်းၵၢၼ်မႅင်ႇၸႅၵ်ႇ ငိုၼ်းတွင်းၵၼ် ဢမ်ႇၽဵင်ႇပဵင်းၵၼ်သေ ၸင်ႇမီးပၼ်ႁႃၵၼ်သေ ယိုဝ်းၵၼ်တၢႆၵူၺ်း ဢမ်ႇၸႂ်ႈဝႃႈ ၶဝ်ယိုဝ်းလူင်ၵႂႃႇၵူႈ ၵေႃႉ”- ဝႃႈၼႆ။  

ၸၢႆးသၢမ်သိူဝ်ၼႆႉ ၺႃးၸုမ်းဢမ်ႇႁူႉၾၢႆႇၼၼ်ႉ ယိုဝ်းသႂ်ႇမွၵ်ႈ 5 ၵမ်း ထိုင် 10 ၵမ်း တိူဝ်ႉမၢတ်ႇၸွမ်း ၼႃႈဢူၵ်းလႄႈတိၼ်မိုဝ်း ၸိူဝ်းၼႆႉ။ ဝၢႆးလင် ၺႃးပိုတ်းယိုဝ်းယဝ်ႉ ပလိၵ်ႈမၢၼ်ႈတႃႈၶီႈလဵၵ်း ၸင်ႇဢွၼ်ၵၼ် လူင်းပိုၼ်ႉတီႈၵူတ်ႇထတ်း ၸွမ်းပွၵ်ႉၸွမ်းယွမ်ႇ။ ၵူၼ်းၸိူဝ်းဢမ်ႇၵပ်းၵၢႆႇ ဢမ်ႇႁူႉႁၼ် ၸွမ်းၵေႃႈၺႃးထတ်း ၺႃးထၢမ်လႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ သုၵ်ႉသၵ်ႉၸႂ် ၵႂႃႇမႃးႁႃၵိၼ်လဵင်ႉ တွင်ႉယၢပ်ႇ ဝႃႈၼႆ။

ၼႂ်းလိူၼ်ၼႆႉၵူၺ်း မိူဝ်ႈဝၼ်းတီႈ 07/05/2024 မႅၼ်ႈဝၼ်းလိူၼ်ႁႃႈလပ်း ယၢမ်းၶမ်ႈ 9 မူင်း ၼၼ်ႉၵေႃႈ တီႈပွၵ်ႉမၢၵ်ႇ ၵႃႇႁူဝ်ၶမ်း ဝဵင်းတႃႈၶီႈလဵၵ်း ၵူၼ်းႁဵတ်းၵၢၼ်တီႈလဵဝ်ၵၼ် ပိုတ်းယိုဝ်းၵၼ်ၶိုၼ်းလႄႈ လႆႈလူႉတၢႆၵေႃႉၼိုင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ ။  

ဝၢႆးလင် သိုၵ်းမၢၼ်ႈယိုတ်းမိူင်းမႃး ၶၢဝ်းတၢင်း 3 ပီပၢႆၼႆႉ ၵူၼ်းတၢင်ႇတီႈသီႇလႅၼ် မႃးယူႇသဝ်းႁဵတ်း ၵၢၼ် ႁႃၵိၼ်လဵင်ႉတွင်ႉၼမ်။ မၢင်ၸိူဝ်း ႁဵတ်းၵၢၼ်ႁႃငိုၼ်း ၸွမ်းၶွပ်ႇၸွမ်းပိူင်။ မၢင်ၸိူဝ်း ႁဵတ်းၵၢၼ် ႁႃငိုၼ်းတၢင်းဢွၼ်ႊလၢႆႊ ၼွၵ်ႈပၵ်းပိူင်မၢႆမီႈ။ ဢိင်ၼိူဝ် ၵၢၼ်တေႃႇလွင်း သိုဝ်ႉၶၢႆယႃႈမဝ်းၵမ်ၼမ်မႃးလႄႈ လွင်ႈလၵ်ႉၸၵ်ႉၶုတ်ႈ ၵေႃႇၵၢၼ်ႁၢႆႉၵေႃႈ လိူင်ႇၼမ်မႃး ၼႆယဝ်ႉ။   

ၵူၺ်းၵႃႈ ဝႃႈၼၼ်သေတႃႉ ဢမ်ႇမီးၽႂ်ၸုမ်းလႂ် တီႉၺွပ်းဢဝ်လိူင်ႈပၼ်တူတ်ႈတၢမ်ႇ ႁႂ်ႈပဵၼ်တူဝ် ယၢင်ႇၵၢၼ်သင်ႇသွၼ်ၵၼ် လႆႈသေပွၵ်ႈ။ ၼႂ်းၽူႈႁၢပ်ႇၵၢၼ်ၶုၼ် မိူၼ်ၼင်ႇ – ႁွင်ႈၵၢၼ်ၽဵဝ်ႈမူၺ်ႉ ၵၢၼ်ၵေႃႇၵၢၼ်ႁၢႆႉၵေႃႈ မီးလွင်ႈ ၵိၼ်သူးၵိၼ်လၢပ်ႈလႄႈ လွင်ႈႁူမ်ႇလူမ်ႈ တႃႇၵူၼ်းမိူင်းဢမ်ႇမီးသင်။

ၼႂ်းပီၼႆႉ ယိင်ႈၶႅၼ်းၼႃႇ ၵၢင်ၶမ်ႈၵၢင်ၶိုၼ်းၵေႃႈ ၵူၼ်းပႅၵ်ႇၼႃႈပႅၵ်ႇတႃ တူင်ႉၼိုင်ၵႂႃႇမႃးၸွမ်းပွၵ်ႉ ၸွမ်းယွမ်ႇလႄႈ ၵူၼ်းမိူင်းလႆႈၵူဝ်လႆႈႁႄ မၢင်ၶိုၼ်းၼွၼ်းပေႃးဢမ်ႇလပ်းလႆႈၼႆ – ၼၢင်းယိင်း ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈ ၼႄၼင်ႇၼႆ။

“တီႈတႃႈၶီႈလဵၵ်း လွင်ႈပိုတ်းယိုဝ်းၵၼ် လွင်ႈၽူႈလၵ်ႉၵူၼ်းၸူၼ် လွင်ႈတီႉၺွပ်းပဵၼ်တူဝ်ယိူဝ်ႇ ၸိူဝ်း ၼႆႉ ပဵၼ်မႃးၶိူဝ်းယႂ်းၵေႃႈ ဢမ်ႇမီးၸုမ်းလႂ်တီႉၺွပ်း ၵူၼ်းၵေႃႇၵၢၼ်ႁၢႆႉ ၸိူဝ်းၼႆႉ။ တႃႇတေၺွပ်းလႆႈ ၵေႃႈ ဢမ်ႇငၢႆႈ။ လွင်ႈၶႃႈၵၼ်တၢႆၸိူဝ်းၼႆႉၵေႃႈ ယွၼ်ႉပိူၼ်ႈထုၵ်ႇၼီႈထုၵ်ႇၶွတ်ႇၵၼ်ႁႃႉၼႆ ႁဝ်းၵေႃႈ ဢမ်ႇလႆႈႁူႉၸၵ်းၸွမ်းၵၢၼ်ပိူၼ်ႈ။ ၵၢင်ၶမ်ႈ ၵၢင်ၶိုၼ်းၵေႃႈ မီးၵူၼ်းပႅၵ်ႇၼႃႈၵႂႃႇမႃး ၸွမ်းပွၵ်ႉၸွမ်းယွမ်ႇ မႃႁဝ်ႇပေႃးပၼ်းၵႂႃႇသဵင်ႈ ၼွၼ်းပေႃးဢမ်ႇလပ်းဢေႃႈ။ တၢင်းၼွၵ်ႈႁိူၼ်းၵေႃႈ ဢမ်ႇႁတ်းဢွၵ်ႇ ယဝ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 18/02/2024 ယၢမ်းဝၢႆးဝၼ်း 4 မူင်းၶိုင်ႈ ၼၼ်ႉၵေႃႈ ႁၢၼ်ႉၶၢႆၵုၼ်ႇယွႆႈ ၶွင်ၽူႈ ၵွၼ်းပွၵ်ႉ ဢၼ်ပိုတ်ႇဝႆႉ တၢင်းၶဝ်ႈဝတ်ႉဝၢၼ်ႈႁွင်ႇ ပွၵ်ႉႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း လႅၼ်လိၼ်တႆး – ထႆးၼႆႉ ထုၵ်ႇၵူၼ်းဢမ်ႇႁူႉၾၢႆႇ ဢမ်ႇယွမ်း 6 ၵေႃႉ ၶဝ်ႈၸူၼ် သွၵ်ႈတဝ် ဢဝ်ၶူဝ်းၵုၼ်ႇလႄႈ ငိုၼ်းတွင်းၵႂႃႇ တင်းၼမ်။ လွင်ႈ ၼႆႉ ပဵၼ်ယွၼ်ႉဢမ်ႇပၼ်ၶွၼ်ႇၸွမ်းၼင်ႇ ၸုမ်းဢမ်ႇႁူႉၾၢႆႇၶဝ် ၵဵပ်းယွၼ်းလႄႈၸင်ႇပဵၼ် – ၵူၼ်းပိုၼ်ႉတီႈလၢတ်ႈ။