ထဝ်ႈယိင်း ၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ ၽူႈၸၢႆးသွင်ၵေႃႉ ပိတ်ႉ(ထိပ်ႇ) ရူတ်ႉၶိူင်ႈမၼ်းၼၢင်းလူမ်ႉသေ ၶိုင်ဢၢင်ႈၸူၼ် ဢဝ်ရူတ်ႉၶိူင်ႈပၢႆႈ ယွၼ်ႉၵူၼ်းႁိမ်းႁွမ်းၼၼ်ႉ တၼ်းဢွၵ်ႇမႃးၸွႆႈၶိုတ်း။

ဝၼ်းတီႈ 21/04/2024 ယၢမ်းၵၢင်ဝၼ်း ပႃႈသၢၼ်ႇလိၼ်းမေႇ ၵူၼ်းပွၵ်ႉႁွင်ႇ ႁေႃႈရူတ်ႉၶိူင်ႈလမ်းၼိုင်ႈသေ တေၵႂႃႇႁဵတ်းသမၢတ်ႉၵၢတ်ႉ တီႈၵၢတ်ႇၸၢင်ႉၽိူၵ်ႇ (ဆင်ဖြူစျေး) ၼၼ်ႉ ၺႃးၽူႈၸၢႆးသွင်ၵေႃႉ ႁေႃႈရူတ်ႉၶိူင်ႈၸွမ်းလင် လမ်း ၼိုင်ႈသေ ထိုင်မႃးတီႈယွမ်ႇၽူၺ်းႁုင်း ပွၵ်ႉတေႃႇယွတ်ႈ ဝဵင်းမူႇၸေႊၼႆႉ ပိတ်ႉရူတ်ႉ ၶိူင်ႈမၼ်းၼၢင်းလူမ်ႉသေ ၶိုင် ၸူၼ် ႁိမ်ဢဝ်ရူတ်ႉၶိူင်ႈပၢႆႈ ၼႆယဝ်ႉ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း လုၵ်ႉတီႈပွၵ်ႉႁွင်ႇသေ ႁေႃႈရူတ်ႉၶိူင်ႈ လူင်းမႃးတၢင်းၽူၺ်းႁုင်း တေၵႂႃႇတၢင်းမင်ႇၵလႃႇမူႇၸေႊ ဢွၵ်ႇၵႂႃႇတၢင်းသဵၼ်ႈတၢင်းလူင်ၼၼ်ႉ ၺႃးၵူၼ်းႁၢႆႉ 2 ၵေႃႉ ပဵၼ် ၽူႈၸၢႆး သွၼ်ႉရူတ်ႉၶိူင်ႈမႃးၸွမ်းလင် မၼ်းၼၢင်း လမ်းၼိုင်ႈသေ ၵူၼ်းႁၢႆႉ ၵေႃႉဢၼ်သွၼ်ႉတၢင်းလင်ၼၼ်ႉ ပိတ်ႉရူတ်ႉၶိူင်ႈမၼ်းၼၢင်းလူမ်ႉပႅတ်ႈ။ ၵမ်းၼႆႉ ပႃႈသၢၼ်ႇလိၼ်းမေႇၼႆႉ ၼႅတ်ႈလုၵ်ႉၶိုၼ်ႈမႃး ဢဝ်ရူတ်ႉၶိူင်ႈမၼ်းၵမ်းလဵဝ် ဢၢင်ႈၶီႇထႅင်ႈ ၵူၼ်းႁၢႆႉၼၼ်ႉ ႁိမ်ရူတ်ႉၶိူင်ႈမၼ်း ၵူၼ်းႁိမ်းႁွမ်းၼၼ်ႉ လႆႈငိၼ်းသေလႅၼ်ႈဢွၵ်ႇမႃးၸွႆႈ ၵူၼ်းႁၢႆႉ ၼၼ်ႉတႄႉ ဢမ်ႇတၼ်းလႆႈသင် ၶီႇရူတ်ႉ ၶိူင်ႈၶဝ်ပၢႆႈၵႂႃႇ ၸိူင်ႉၼၼ်ၶႃႈဢေႃႈ”- ဝႃႈၼႆ။

ပႃႈသၢၼ်ႇလိၼ်းမေႇၼႆႉ ယွၼ်ႉသႂ်ႇမူၵ်ႇႁူဝ်ရူတ်ႇၶိူင်ႈဝႆႉလႄႈ တီႈၵွၵ်းႁူဝ်တႄႉ ဢမ်ႇတၼ်းပဵၼ်သင် ၵူၺ်းၵႃႈ လႆႈတိူဝ်ႉမၢတ်ႇၸဵပ်းႁႅင်း ၸွမ်းၼႃႈလွၵ်ႈ၊ ၸွမ်းမိုဝ်း ၸိူဝ်းၼႆႉ။ ၽူႈၸၢႆးသွင်ၵေႃႉၼၼ်ႉ ပဵၼ်ၽႂ်ၸုမ်းလႂ် ဢၼ်ဝႃႈၼၼ်ႉတႄႉ တေႃႇထိုင်ယၢမ်းလဵဝ် ပႆႇမီးၽႂ်ႁူႉ ဝႃႈၼႆ။

မိူဝ်ႈဝၼ်းတီႈ 17/03/2024 ယၢမ်းဝၢႆးဝၼ်း မီးၸုမ်းဢမ်ႇႁူႉၾၢႆႇ ႁေႃႈၵႃးလမ်းၸွမ်း ၵူၼ်းလႅၵ်ႈငိုၼ်းၶႄႇ – မၢၼ်ႈ တီႈပွၵ်ႉၼိူဝ် ဝဵင်းမူႇၸေႊ ၼၼ်ႉၵေႃႈ ဢီးရူတ်ႉၶိူင်ႈ ၵူၼ်းလႅၼ်ႈငိုၼ်းလူမ်ႉသေ ၸူၼ်ဢဝ်ငိုၼ်းၶႄႇ ဢၼ်သႂ်ႇဝႆႉတႂ်ႈတီႈ ၼင်ႈရူတ်ႉၶိူင်ႈၼၼ်ႉၵႂႃႇ ငိုၼ်းၶႄႇ 3 မိုၼ်ႇယႂၼ်ႊပၢႆလႄႈ ငိုၼ်းမၢၼ်ႈ ၵမ်ႈၽွင်ႈ ဝႃႈၼႆ။

ၼႂ်းလိူၼ်မၢတ်ႊၶျ်တင်း ဢေႊပရိူဝ်ႊၼႆႉ ၵူၼ်းမူႇၸေႊ ၺႃးၸုမ်းဢမ်ႇႁူႉၾၢႆႇ ၶဝ်ႈတီႉၺွပ်းဢဝ် ပဵၼ်တူဝ်ယိူဝ်ႇ (ပြန်ပေးဆွဲ) မႃးၶိူဝ်းယႂ်း ၶၢဝ်းတၢင်းသွင်လိူၼ်ၼႆႉ ၺႃးတီႉၵႂႃႇ ဢမ်ႇယွမ်း 10 ယဝ်ႉ။ တင်ႈတႄႇ သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈၵူၼ်းမူႇၸေႊ ဢမ်ႇမီးလွင်ႈႁူမ်ႇလူမ်ႈ ယိင်ႈၶႅၼ်း ႁဵတ်းႁႂ်ႈၽူႈလၵ်ႉၸၵ်ႉၶုတ်ႈလႄႈ ၸုမ်းယိပ်းၵွင်ႈ လိူင်ႇၼမ်ႁႅင်းၵူၺ်း ဝႃႈၼႆ။