ၾူၼ်ယႂ်ႇလူမ်းလူင်သေ ၾႃႉၽႃႇၺႃး ဝူဝ်းၵူၼ်းမိူင်းယႆ လူႉတၢႆထင်တီႈ 13 တူဝ် သုမ်းငိုၼ်း ဢမ်ႇယွမ်း 50 သႅၼ်ပျႃး။
ဝၼ်းတီႈ 17/4/2024 ယၢမ်းၵၢင်ၼႂ်ၸဝ်ႉ 4 မူင်းၶိုင်ႈ ၾူၼ်ယႂ်ႇလူမ်းလူင်သေ ၾႃႉၽႃႇၺႃးဝူဝ်း ၵူၼ်းဝၢၼ်ႈပဵင်းသႃႇ ဢိူင်ႇႁူဝ်ယ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ လူႉတၢႆ 13 တူဝ် ႁဵတ်းႁႂ်ႈၸဝ်ႈဝူဝ်း ဢွၼ်ၵၼ်တူၵ်းၸႂ် ယွၼ်ႉဢမ်ႇတွၼ်ႈယၢမ်ႈၺႃးမႃး ၸိူင်ႉၼႆသေပွၵ်ႈ ဝႃႈၼႆ။
ၸဝ်ႈၶွင်ဝူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးၵၢင်ဝၼ်းၼႆ ဝူဝ်းၼႆႉ ၶဝ်တေၵႂႃႇႁႃၵိၼ် တၢင်ႇတီႈတၢင်ႇလႅၼ်သေ ပေႃးၶမ်ႈမႃး ၶဝ်မႃးၼွၼ်း တႂ်ႈႁူမ်ႈမၢၵ်ႇလၢင်း တူၼ်ႈယႂ်ႇယႂ်ႇၼႆႉဢေႃႈ ။ ၵၢင်ၼႂ်ၼၼ်ႉသမ်ႉ ၽုင်ဝူဝ်းၸိူဝ်းၼႆႉ ပႆႇတၼ်းၽၢတ်ႇတူၼ်ႈမႆႉလူင်ၼၼ်ႉ ၾူၼ်သမ်ႉတူၵ်းႁႃႇယႂ်ႇ လူမ်းႁႅင်း ၾႃႉၽႃႇၾႃႉမႅပ်ႈဢေႃႈ။ မၼ်းလႅပ်ႈတေၽႃႇသႂ်ႇ တူၼ်ႈမႆႉ ၵူၺ်းၵႃႈ သမ်ႉၽႃႇၺႃးပႃးၽုင်ဝူဝ်း ၸိူဝ်းၼႆႉဢေႃႈ။ ပႃးဝူဝ်းၶႃႈ 2 တူဝ်၊ ဝူဝ်းၵူၼ်းၼႂ်းဝၢၼ်ႈ ၸိူဝ်းၼႆႉၵေႃႈ ပႃးၶႃႈဢေႃႈ ႁူမ်ႈၵၼ် 13 တူဝ်”- ဝႃႈၼႆ။
ဝူဝ်းၵူၼ်းဝၢၼ်ႈပဵင်းသႃႇ ဢၼ်လႆႈလူႉတၢႆၵႂႃႇ 13 တူဝ်ၼၼ်ႉ ယၢမ်းလဵဝ် ၵႃႈၶၼ်ဝူဝ်း ၼိုင်ႈတူဝ်လႂ် တေမီး 6 သႅၼ်ပျႃးတေႃႇထိုင် 8 သႅၼ်ပျႃး။ ၾႃႉၽႃႇဝူဝ်းတၢႆပဵၼ်ၽုင်ၸိူင်ႉၼႆ တီႈဢိူင်ႇႁူဝ်ယ မိူင်းယႆၼႆႉ ဢမ်ႇတွၼ်ႉမီးမႃးၸိူင်ႉၼႆသေပွၵ်ႈ။ ၼႆႉသမ်ႉ ၵိုင်ႉၵၢင်ႉမႃးပဵၼ်ၼႆလႄႈ ႁဵတ်းႁႂ်ႈၵူၼ်းဝၢၼ်ႈလႄႈ ၸဝ်ႈဝူဝ်းၶဝ် ဢွၼ်ၵၼ်တူၵ်းၸႂ်ႁႅင်း။
ဢိင်ၼိူဝ် လွင်ႈတုမ်ႉတိူဝ်ႉလူႉသုမ်း ၸိူဝ်းၼႆႉသေ ယူႇတီႈ ၵူၼ်းဝၢၼ်ႈၶဝ် ဢွၼ်ၵၼ်တၢင်ႇယိုၼ်ႈ ယွၼ်းတၢင်းၸွႆႈထႅမ် တီႈၽူႈၵဵဝ်ႇၶွင်ႈဝႆႉယဝ်ႉ ၵူၺ်းၵႃႈ ပႆႇႁၼ်တုမ်ႉတွပ်ႇသင်မႃး ဝႃႈၼႆ။
“ဢၼ်ၾႃႉၽႃႇၸိူင်ႉၼႆၼႆႉ ဢမ်ႇတွၼ်ႉမီးမႃးသေပွၵ်ႈ။ ၽႂ်ၵေႃႈ ဢွၼ်ၵၼ်တူၵ်းၸႂ် ယွၼ်ႉဢမ်ႇ ယၢမ်ႈႁၼ်ယၢမ်ႈ ၺႃး။ လွင်ႈၸွႆႈထႅမ်ၵေႃႈ ၸွင်ႇတေလႆႈဢမ်ႇလႆႈပႆႇႁူႉ။ ယၢမ်းလဵဝ် ႁဝ်းၶႃႈ တၢင်ႇ ယွၼ်းတၢင်းၸွႆႈထႅမ်တီႈ ၽူႈမီးပုၼ်ႈ ၽွၼ်း ၾၢႆႇၽေးသၽႃႇဝၶဝ်ဝႆႉယဝ်ႉ ၸွင်ႇၶဝ်တေၸွႆႈထႅမ် ဢမ်ႇၸွႆႈထႅမ်တႄႉ ဢမ်ႇႁူႉ။ တၢင်ႇတႄႉ တၢင်ႇလၢတ်ႈဝႆႉယဝ်ႉ”- ၸဝ်ႈဝူဝ်း သိုပ်ႇလၢတ်ႈၼႄၼင်ႇၼႆ။
ၵူၼ်းဝဵင်းမိူင်းယႆၼႆႉ ၵမ်ႈၼမ် ၽုၵ်ႇမၢၵ်ႇတဝ်ႈၶဝ်ႈၼမ်ႉ လဵင်ႉၼႃႈႁိူၼ်းယေးၵၼ်။ မၢင်ၸိူဝ်း လဵင်ႉသတ်းႁိူၼ်း မိူၼ်ၼင်ႇ မူႇ ၊ ၵႆႇ ၊ ဝူဝ်း ၊ ၵႂၢႆး ၸိူဝ်းၼႆႉ လဵင်ႉၼႃႈႁိူၼ်းပႃး ၼႆယဝ်ႉ။
မိူဝ်ႈပီ 2022 ၼၼ်ႉ ၵူၼ်းဝၢၼ်ႈၸၢင်ႉႁိူၼ်း 3 ၵေႃႉ ပေႃႈမႄႈလုၵ်ႈ ၵႂႃႇပိတ်းၼဵင်ႈ ၼႂ်းသူၼ်သေ ပွၵ်ႈႁိူၼ်း ၺႃးသၢႆ ၾႃႉၽႃႇသိတ်ႈသႂ်ႇသေ ထိုင်တီႈလူမ်ႉလိုမ်းတူဝ်ၵႂႃႇ တီႈၵၢင်ပၢင်ႇၸွမ်းတၢင်း ၼႂ်းၵႄႈ သူၼ်ၼဵင်ႈတၢင်း ဝၢၼ်ႈၸၢင်ႉႁိူၼ်း ၼႂ်းဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၼႆယဝ်ႉ။
