လုၵ်ႈဢွၼ်ႇယိင်း ဢႃႇယု 6 ၶူပ်ႇယူႇပွၵ်ႉၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး ၺႃးၵူၼ်းႁိမ်းၶၢင်ႈ ႁိူၼ်းၵေႃႉၼိုင်ႈဢႃယု 26 ၶူပ်ႇ ၼၼ်ႉၵၼ်ႉၸၼ်၊ လႆႈၶဝ်ႈယူတ်းယႃတူဝ် 5 ဝၼ်းတီႈႁူင်းယႃလူင် တူၼ်ႈတီး ။
ၵေႃႉပဵၼ်မႄႈ လၢတ်ႈဝႃႈ- လုၵ်ႈၶႃႈလႆႈၶဝ်ႈႁူင်းယႃ 5 ဝၼ်း။ ၶႃႈတႄႉၶႂ်ႈလႆႈလွင်ႈၽဵင်ႇပဵင်းၵူၺ်း။ ၾၢႆႇပူၼ်ႉ ပႅၼ် မႃးထၢမ်ပၼ်ငိုၼ်းသၢႆႈတႅၼ်း ၶႃႈဢမ်ႇၶႂ်ႈလႆႈ ဢမ်ႇဢဝ်။ ၶႃႈၶႂ်ႈႁႂ်ႈလုမ်းတြႃး မီးမၢႆမီႈပၼ်တူတ်ႈတၢမ်ႇတၢႆမၼ်းၵူၺ်းယဝ်ႉ ဢၢႆႈၼၼ်ႉ- ဝႃႈၼႆ။
လွင်ႈၵၼ်ႉၸၼ်ၼႆႉပဵၼ်မိူဝ်ႈဝၼ်းတီႈ 17 /05/2018 ။ ၵေႃႉပဵၼ်မႄႈ လႆႈၵႂႃႇၸႅင်ႈပလိၵ်ႈ ပိုတ်ႇဢမုဝႆႉယဝ်ႉဝႃႈၼႆ။
ၵဵဝ်ႇၵပ်းလွင်ႈၼႆႉသေ မႄႈမၼ်းၼၢင်းလၢတ်ႈၼေဝႃ- ဝၼ်းၼၼ်ႉဝၢႆးဝၼ်း လုၵ်ႈၶႃႈ ဢၢပ်ႇၼမ်ႉယဝ်ႉ မႃးၼင်ႈမိူၼ်ႇမိုင်ယူႇတီႈလဵဝ်။ ဢမ်ႇလႅတ်း ဢမ်ႇသႅဝ်း မိူၼ်ၵူႈဝၼ်းလႄႈ ၶႃႈၸင်ႇထၢမ်တူၺ်း ဝႃႈပဵၼ်သင်။ မၼ်းလၢတ်ႈဝႃႈ ဢၢႆႈၸီႇတူႇၸူဝ်း ဢႃႇယု 26 ပီ ႁိမ်းၶၢင်ႇႁိူၼ်းႁဝ်ၼႆႉမႃးတဵၵ်းမၼ်း ၼႂ်းၵႄႈႁူဝ်ႉႁဝ်းတင်းၽႃႁိူၼ်းႁဝ်းၼႆႉၼႆ။ ၽိူဝ်ႇၶႃႈမႃးတူၺ်းယဝ်ႉ ႁိပ်ႈၼႅတ်ႈဢဝ်သူင်ႇႁူင်းယႃၵမ်းလဵဝ် ။ မေႃယႃၶဝ်ပၼ်ယႃႈလိုမ်းသေ ဢဝ်ၶဝ်ႈ ႁွင်ႈၽႃႇတတ်းၵမ်းလဵဝ် – ဝႃႈၼႆ။
ၵဵဝ်ႇၵပ်းလွင်ႈၼႆႉ တေႃႇၼေႃႇၶမ်းတဵင်း ၽူႈၵွၼ်းႁွင်ႈၵၢၼ် ႁွင်ႈၵၢၼ်ၾၢႆႇပူၵ်းပွင်ၸွႆႈ ထႅမ်ပိူင်ၵူၼ်း လူင်ပွင်ၸိုင်ႈမိူင်းတႆး လၢတ်ႈဝႃႈ တေၵမ်ႉၸွႆႈၵူႈလွင်ႈလွင်ႈ ပႃးၸဵမ်တႃႇပူၵ်းပွင်ပၢႆးၸႂ် လုၵ်ႈဢွၼ်ႇ ယိင်းၼၼ်ႉ ၶိုၼ်း ဝႃႈၼႆ။
တေႃႇသီႇတႃႇဢွင်ႇ ၸုမ်း Peace World Gender လၢတ်ႈဝႃႈ- မိူဝ်းၼႃႈမႃး ၼင်ႇႁိုဝ်တေဢမ်ႇပဵၼ် ထႅင်ႈ လွင်ႈပူၼ်ႉပႅၼ် ၵၼ်ႉၸၼ် လုၵ်ႈဢွၼ်ႇၼႆႉ ထုၵ်ႇလီပၼ်တၢင်းႁူႉႁႂ်ႈတူဝ်ႈထိုင်ၵူႈတီႈ။ ဢမ်ႇၶႂ်ႈ ႁႂ်ႈလုၵ်ႈဢွၼ်ႇ လႆႈတုမ်ႉတိူဝ်ႉပၢႆးတူဝ်ပၢႆးၸႂ် လၢႆလၢႆၵမ်း။ ပႃးၸဵမ်မၢႆမီႈပိူင်ပိုင်းၵေႃႈ ႁႂ်ႈမီးတူတ်ႈတၢမ်ႇ ႁၢဝ်ႈႁႅင်းတွၼ်ႈတႃႇ ၽူႈပူၼ်ႉပႅၼ်ၵၼ်ႉၸၼ်လုၵ်ႈဢွၼ်ႇ18 လူင်းတႂ်ႈ။ ယဝ်ႉၵေႃႈ တွၼ်ႈတႃႇၵူၼ်းပူၼ်ႉပႅၼ်ႁဵတ်းၽိတ်းၼၼ်ႉ လူတ်းယွၼ်ႇပၼ် တၢင်းၽိတ်းလႂ်၊ ပူတ်းပွႆႇပၼ်လႂ်ၸိူဝ်းၼႆႉ ဢမ်ႇထုၵ်ႇလီမီး – ဝႃႈၼႆ။
ယၢမ်းလဵဝ် ယူႇတီႈပလိၵ်ႈၼႂ်းပိုၼ်ႉတီႈ ၸေႈဝဵင်းတူၼ်ႈတီးၵေႃႈ တိၺွပ်းၵုမ်းၶင် ၸီႇတူႇၸူဝ်း ၽူႈပူၼ်ႉပႅၼ်ႁဵတ်းၽိတ်းၼၼ်ႉသေ သူင်ႇလုမ်းတြႃး ပိုတ်ႇဢမု ၶတီး ဝႆႉလူၺ်ႈမၢႆမီႈမၢတ်ႉတႃ 376 ဝႃႈၼႆ။
