ၸၢႆးပေႃႈလုၵ်ႈဢွၼ်ႇ ၵေႃႉဢၼ်ၵၼ်ႉၸၼ်လုၵ်ႈဢွၼ်ႇ 8 ၶူပ်ႇၵူၼ်းႁိမ်းႁိူၼ်းၼၼ်ႉ ပလိၵ်ႈတီႉၺွပ်း ၵႂႃႇယဝ်ႉဝႃႈၼႆသေတႃႉမီးၶၢဝ်ႇဢွၵ်ႇမႃးဝႃႈ မၼ်းၸၢႆးဢၢၼ်းလႅၼ်ႈပၢႆႈလႄႈပလိၵ်ႈယိုဝ်းတၢႆယဝ်ႉၼႆလႄႈ ၵူၼ်းၼႂ်းပွၵ်ႉၼႂ်းယွမ်ႇ ဢမ်ႇႁၢၼ်ႉၸႂ်၊ ၶႂ်ႈႁႂ်ႈလႆႈႁပ်ႉတူတ်ႈတၢမ်ႇ တွၼ်ႈတႃႇလွင်ႈၽဵင်ႇပဵင်းဢွၼ်ႇယိင်း ဝႃႈၼႆ။
ၵေႃႉဢၼ်ၵၼ်ႉၸၼ်လုၵ်ႈဢွၼ်ႇယိင်းဢႃယု 8 ၶူပ်ႇၼႆႉပဵၼ် တူႇရဵင်ႇထုၼ်း ဢႃယု 29 ပီ ပဵၼ်ပေႃႈ လုၵ်ႈဢွၼ်ႇ ၵေႃႉၼိုင်ႈၼင်ႇၵဝ်ႇ။ မၼ်းၸၢႆးၵၼ်ႉၸၼ်လုၵ်ႈဢွၼ်ႇမိူဝ်ႈဝၼ်းတီႈ 30 /7/2025 ။ ထိုင်မႃးဝၼ်းတီႈ 31/7/2025 ပလိၵ်ႈတႃႈၶီႈလဵၵ်းမႃးတီႉၺွပ်းဢဝ်မၼ်းၸၢႆးၵႂႃႇၵုမ်းၶင်။
ၸုမ်းၸွႆႈထႅမ်ၼႂ်းပိုၼ်ႉတီႈ ဢွၼ်ၵၼ်ႁႃလႄႈႁၼ်တူဝ်တၢႆလုၵ်ႈဢွၼ်ႇၼၼ်ႉၶိုၼ်းမိူဝ်ႈဝၼ်းတီႈ 4/8/2025။ ၵူၼ်းပိုၼ်ႉတီႈဢွၼ်ၵၼ်တုၵ်းယွၼ်းႁႂ်ႈလႆႈလွင်ႈၽဵင်ႇပဵင်းၼႆလႄႈ ထိုင်မႃးဝၼ်းတီႈ 6/8/2025 မီးၶၢဝ်ႇဢွၵ်ႇမႃးဝႃႈ မၼ်းၸၢႆးပၢႆႈဢွၵ်ႇၶွၵ်ႈသေဢၢၼ်းလႅၼ်ႈပၢႆႈလႄႈပလိၵ်ႈလမ်းယိုဝ်းတၢႆယဝ်ႉဝႃႈၼႆ။
လွင်ႈၼႆႉၵူၼ်းၼႂ်းပွၵ်ႉၼႂ်းယွမ်ႇပႃးၸဵမ်ပေႃႈမႄႈပီႈၼွင်ႉၾၢႆႇလုၵ်ႈဢွၼ်ႇယိင်း ဢၼ်ထုၵ်ႇၵၼ်ၸၼ် (မငဵင်းၼိၼ်းၼွႆႇ ဢႃယု 8 ၶူပ်ႇ) ၼၼ်ႉၵေႃႈလၢတ်ႈဝႃႈဢမ်ႇလႆႈႁၼ်တူဝ်တၢႆလႄႈဢမ်ႇလႆႈႁူႉၸွမ်းဝႃႈၼႆ။
“လုၵ်ႈဢွၼ်ႇဢၼ်ထုၵ်ႇၵၼ်ႉၸၼ်ၶႃႈႁႅမ်ၼၼ်ႉဢႃယုၵေႃႈ ပႆႇတဵမ် ၊ ပေႃႈမႄႈၶဝ်ၵေႃႈ ပဵၼ်ၵူၼ်းႁဵတ်း ၵိၼ် ဝၼ်းလႂ်ဝၼ်းၼၼ်ႉ ဢမ်ႇၸႂ်ႈၵူၼ်းတဵမ်ထူၼ်ႈလႄႈ ၶႂ်ႈလႆႈလွင်ႈၽဵင်ႇပဵင်း တွၼ်ႈတႃႇ မငဵင်းၼိၼ်းၼွႆႇ။ တူတ်ႈတၢမ်ႇဢၼ်ၵေႃႉပူၼ်ႉပႅၼ်လႆႈႁပ်ႉၼႆႉ ဢမ်ႇၶႂ်ႈႁႂ်ႈပဵၼ်ၸိူင်ႉၼႆ”- ဝႃႈၼႆ ။
လွင်ႈသိုၵ်းမၢၼ်ႈပလိၵ်ႈမၢၼ်ႈပိုၼ်ၽၢဝ်ႇဝႃႈ ယိုဝ်းၽူႈပူၼ်ႉပႅၼ် ၵၼ်ႉၸၼ်ၶႃႈႁႅမ်လုၵ်ႈဢွၼ်ႇယဝ်ႉၼႆၼၼ်ႉ ယူႇတီႈပေႃႈမႄႈလႄႈ ၵူၼ်းႁိမ်းႁွမ်းလုၵ်ႈဢွၼ်ႇ ပဵၼ်လွင်ႈဢမ်ႇယွမ်းႁပ်ႉလႆႈ ။
ၵူၼ်းၸမ်ၸႂ်မုင်ႉႁေႃႁိူၼ်း မငဵင်းၼိၼ်းၼွႆႇ (လုၵ်ႈဢွၼ်ႇထုၵ်ႇၵၼ်ႉၸၼ် ၶႃႈႁႅမ်တၢႆသေပွႆႇတူၵ်းၼမ်ႉၼၼ်ႉ) လၢတ်ႈၽူႈတွႆႇႁွၵ်ႈဝႃႈ -“ ဢမ်ႇၶႂ်ႈႁႂ်ႈပၼ်တင်းၽိတ်း မဝ်မဝ်ၸိူင်ႉၼႆသေ ႁႂ်ႈမၼ်းယဝ်ႉၵႂႃႇၸိူင်ႉၼႆၵူၺ်း ၊ ပေႃးတူၺ်းၶိုၼ်းပိူင်ပဵၼ် လၢၼ်ယိင်းႁဝ်းၶႃႈ ၺႃးၵၼ်ႉၸၼ်ၶႃႈႁႅမ်တၢႆၼၼ်ႉၼႆ ၸုမ်းၵူၼ်းႁၢႆႉၼႆႉ မၼ်းဢမ်ႇလႅပ်ႈၸႂ်ႈမီးၵေႃႉလဵဝ် ၊ လွင်ႈၼႆႉၵေႃႈ ၶႂ်ႈႁႂ်ႈပလိၵ်ႈ ၵူတ်ႇထတ်းပၼ်ပႃးထႅင်ႈ ၊ ပေႃးပဵၼ်ၸုမ်းတႄႉၼႆ ၶႂ်ႈႁႂ်ႈ ၶဝ်လႆႈႁပ်ႉတူတ်ႈတၢမ်ႇ- ႁႂ်ႈၵူၼ်းတၢင်းၼွင်ႈတၢင်းလင်ပေႃးလၢပ်ႇ ”- ဝႃႈၼႆ ။
သိုၵ်းမၢၼ်ႈပလိၵ်ႈမၢၼ်ႈလၢတ်ႈဝႃႈ လႆႈယိုဝ်း တူႇရဵင်ႇထုၼ်း ၵေႃႉပူၼ်ႉပႅၼ်လူၶၢႆၶႃႈႁႅမ်လုၵ်ႈဢွၼ်ႇၼၼ်ႉ တၢႆယဝ်ႉဝႃႈၼႆသေတႃႉ ယူႇတီႈၵူၼ်းမိူင်း ဢမ်ႇမီးၽႂ်ႁၼ်ၶၢပ်ႈတူဝ်တၢႆ။
ၸုမ်းပရႁိတပိုၼ်ႉတီႈၵေႃႈတႅမ်ႈတၢင်ႇ ဝႆႉဝႃႈ – “ လႆႈၶေႃႈယိုၼ်ယၼ်တီႈႁူင်းပလိၵ်ႈ ဝႃႈ မၼ်းၸၢႆးဢၢၼ်းလႅၼ်ႈပၢႆႈလႄႈ ၺႃးယိုဝ်းတၢႆပႅတ်ႈၸွမ်းတၢင်း”- ဝႃႈၼႆ ။
လုၵ်ႈဢွၼ်ႇၵေႃႉၺႃးၵၼ်ႉၸၼ်လူလၢႆၶႃႈႁႅမ်တၢႆသေဝိုတ်ႉထိုမ်ႈတူၵ်းၼမ်ႉၼႆႉၸိုဝ်ႈႁွင်ႉ မငဵင်းၼိၼ်းၼွႆႇ( မငြိမ်းနှင်းနွယ်) ဢႃယု 8 ၶူပ်ႇ ယူႇ ဝၢၼ်ႈႁွင်ႇ ႁွင်ႈလိုၵ်ႉ ဝဵင်းတႃႈၶီႈလဵၵ်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ