ၸုမ်းၼႅင်ႈသၢၼ်ႁႅင်းၵၢၼ် မိူင်းထႆး ပွတ်းႁွင်ႇ 10 ၸုမ်းပၢႆ ႁူပ်ႉဢုပ်ႇၵၼ် တီႈဝဵင်းၵဵင်းမႂ်ႇ တႃႇၵႄႈလိတ်ႈပၼ်ႁႃ ႁႅင်း ၵၢၼ်ၸိူဝ်းဢမ်ႇလႆႈႁပ်ႉ လွင်ႈၽဵင်ႇပဵင်းပဵၼ်ထမ်း။
ဝၼ်းတီႈ 4/4/2024 ယၢမ်းၵၢင်ၼႂ် 9 မူင်းထိုင် 5 မူင်း ဝၢႆးဝၼ်း (ၶၢဝ်းယၢမ်းထႆး) ၸုမ်းၼႅင်ႈသၢၼ်ႁႅင်းၵၢၼ် မိူင်းထႆး ပွတ်းႁွင်ႇ ႁူပ်ႉဢုပ်ႇၵၼ် တီႈႁိမ်းၽၵ်းတူတႃႈပႄး ႁူင်းႁႅမ်း ဢႃႊ မူဝ်ႊလႃႊ (AMORA) ဝဵင်းၵဵင်းမႂ်ႇ ၸိုင်ႈထႆး ၼႆယဝ်ႉ။
ၼႂ်းပၢင်ႁူပ်ႉထူပ်းၼၼ်ႉ လႆႈဢုပ်ႇဢူဝ်းၵၼ် ၵဵဝ်ႇလူၺ်ႈ လွင်ႈလႆႈႁူပ်ႉထူပ်းပၼ်ႁႃ ႁႅင်းၵၢၼ် ၸိူဝ်းပူၼ်ႉမႃးလႄႈ လၢႆး ၵႄႈလိတ်ႈပၼ်ႁႃႁႅင်းၵၢၼ် ၸိူဝ်းဢမ်ႇလႆႈ လွင်ႈၽဵင်ႇပဵင်းပဵၼ်ထမ်း မႃးၸိူဝ်းၼၼ်ႉ ဝႃႈၼႆ။
ၼၢင်းၸေႃးယဵၼ်ႇ ၾၢႆႇပၼ်တၢင်းႁူႉႁႅင်းၵၢၼ် တၢင်တူဝ်ႁႅင်းၵၢၼ်သေ မွၵ်ႇလၢတ်ႈပၼ် တၢင်းႁၼ်ထိုင်ၵႂႃႇ ၼႂ်းပၢင်ၵုမ်ၼႆႉဝႃႈ – “မိူဝ်ႈလဵဝ် ႁႅင်းၵၢၼ်ယၢၼ်မိူင်း ၸိူဝ်းမႃးတူၵ်းမိူင်းထႆး ၼႆႉ ၵမ်ႈၼမ် လႆႈႁဵတ်းဝတ်းဝႂ်လၢႆသႅၼ်း ၼမ်ၼႃႇပူၼ်ႉတီႈ။ ႁႅင်းၵၢၼ်ၵေႃႈ တႅၵ်ႇယူႇပဵၼ် လၢႆ သႅၼ်း မိူၼ်ၼင်ႇ – ႁႅင်းၵၢၼ် MOU ၊ မၢင်ၸိူဝ်းယိပ်းဝႂ် CI ၊ မၢင်ၸိူဝ်း ပဵၼ်ဝတ်းဝႂ် 10 ပီ ၸိူဝ်း ၼႆႉ။ ပေႃးလဵၼ်းပေႃးလၢႆးၵႂႃႇမူတ်းဢေႃႈ”- ဝႃႈၼႆ။
သိုပ်ႇလၢတ်ႈဝႃႈ – “တီႈတႄႉမၼ်း ၵူၼ်းမႃးၵိၼ်ၸၢင်ႈႁႃငိုၼ်းၼႆႉ ပဵၼ်ႁႅင်းၵၢၼ်မိူၼ်ၵၼ် မူတ်းၵူၺ်း။ ႁႂ်ႈၶဝ်ယိပ်းဝႂ်သင်ဝႆႉၵေႃႈ ၶဝ်တိုၼ်းပဵၼ်ႁႅင်းၵၢၼ်ၵူၺ်း။ ယွၼ်ႉဝတ်းဝႂ်ၸိူဝ်းၼႆႉသေ ႁဵတ်းႁႂ်ႈႁႅင်းၵၢၼ်ႁဝ်း ဢမ်ႇလႆႈၽွင်ႈၽဵင်ႈပဵင်း၊ လႆႈယၢပ်ႇၽိုတ်ႇ သဵင်ႈၶၢဝ်းယၢမ်းၸွမ်းမၼ်းၼမ်။ တီႈတႄႉမၼ်း ႁႅင်းၵၢၼ်မၢင်ၸိူဝ်း ၶဝ်ဢမ်ႇႁပ်ႉႁူႉ လွင်ႈၸိူဝ်းၼႆႉ ၶဝ်ဢမ်ႇပွင်ႇၸႂ်လီလီ။ မိူၼ်ႁဵတ်းႁႂ်ႈပိူင်မိပ်ႇငႅၼ်းႁႂ်ႈႁႅင်းၵၢၼ်ၶဝ် ယူႇယၢပ်ႇၵိၼ်းၸႂ်မႃး ၵူႈဝၼ်းၵူၺ်း”- ဝႃႈၼႆ။
ၼႂ်းပၢင်ႁူပ်ႉထူပ်းၼႆႉ မီးတူဝ်တႅၼ်းလၢႆၸုမ်း ၶဝ်ႈႁူမ်ႈ လၢတ်ႈၼႄလွင်ႈတူင်ႉၼိုင် ၸုမ်းၽႂ် မၼ်း မိူၼ်ၼင်ႇ – ၸုမ်း MAP Foundation ၊ Empower ၊ HDRF ၊ BEAM education Foundation ၊ ၸုမ်း NGOs ၊ ၸုမ်း LGBT ၊ ၸုမ်းသိုဝ်ႇႁႅင်းၼုမ်ႇ၊ ၸုမ်းမႄႈဝၢၼ်ႈ၊ လုၵ်ႈႁဵၼ်းၸၼ်ႉၸွမ် ၵဵင်းမႂ်ႇ (ၾၢႆႇတူင်ႇဝူင်းၵူၼ်း) လႄႈ ပႃးၸဵမ် ၸုမ်းသိုဝ်ႇၶၢဝ်ႇ မိူၼ် ၼင်ႇ – Chiang Mai News ၊ Thai PBS ၊ Prachatai ၊ LANNER ၊ ၸုမ်းၶၢဝ်ႇၽူႈတွႆႇႁွၵ်ႈ ဢိၵ်ႇပႃးထႅင်ႈ ၸုမ်းတူင်ႉ ၼိုင်တူင်ႇဝူင်းၵူၼ်းထႅင်ႈ လၢႆၸုမ်း။
ၼႂ်းပၢင်ၵုမ်ၼႆႉ တူၵ်းလူင်းလႆႈၸႂ်ၵၼ်ဝႃႈ – “တေတူင်ႉၼိုင် တုၵ်းယွၼ်း ႁႂ်ႈၽူႈၵဵဝ်ႇၶွင်ႈၶဝ် မူၼ်ႉမႄးပၵ်းပိူင်ႁႅင်းၵၢၼ် ႁႂ်ႈထိုင်ၸၼ်ႉလုမ်ႈၾႃႉ ၊ 5 ပီလႂ်ၼိုင်ႈပွၵ်ႈ ႁႂ်ႈၽူႈၵဵဝ်ႇၶွင်ႈၶဝ် ပိၼ်ႇ ပၢႆႇလႅၵ်ႈလၢႆႈပၵ်းပိူင်ႁႅင်းၵၢၼ်၊ ႁႂ်ႈမီးလွင်ႈၽဵင်ႇပဵင်းပဵၼ်ထမ်း ၊ မိူဝ်းၼႃႈမႃး ႁႂ်ႈမီးပၵ်းပိူင်ႁႅင်း ၵၢၼ် ဢၼ်မီးၸၼ်ႉလႄႈ ႁႅင်းၵၢၼ် ၵူႈၸၼ်ႉထၢၼ်ႈၵေႃႈ ႁႂ်ႈလႆႈမီးသုၼ်ႇလႆႈသုၼ်ႇပဵၼ် လူၺ်ႈဢမ်ႇမီးပေႃႈလဵင်ႉၼၢႆးၸၢင်ႈ ၵိၼ်ၸိၵ်းတွၵ်ႇၸွၵ်း” – ဝႃႈၼႆ။
ပေႃးထိုင်မႃး ဝၼ်းတီႈ 1/5/2024 ၼႆႉၵေႃႈ ယူႇတီႈ ၸုမ်းၼႅင်းသၢၼ်ႁႅင်းၵၢၼ် မိူင်းထႆးပွတ်း ႁွင်ႇၼႆႉ တေၼမ်းႁႅင်း ၵၢၼ်ယၢၼ်မိူင်း တီႈဝဵင်းၵဵင်းမႂ်ႇ ၵူႈၸၼ်ႉထၢၼ်ႈ ႁူမ်ႈၵၼ်ၼႄဢဵၼ်ႁႅင်း ဢွၵ်ႇၼႄၵၢင်ၸႂ် တီႈၽၵ်းတူတႃႈပႄး ဝဵင်းၵဵင်းမႂ်ႇ ယၢမ်းဝၢႆးဝၼ်း 1 မူင်း ထိုင် 9 မူင်းၵၢင်ၶမ်ႈ တႃႇတုၵ်းယွၼ်း သုၼ်ႇလႆႈႁႅင်းၵၢၼ် ၼႂ်းဝၼ်းႁႅင်းၵၢၼ်လုမ်ႈၾႃႉ ဝႃႈၼႆ။
