ၾႆးမႆႈ ႁူင်းၸၢၵ်ႈႁဵတ်းၸေႈ Recycle တီႈဝဵင်းသမုတ်ႇသၶွၼ်း မိူင်းထႆး လူႉသုမ်းၼမ်။

ဝၼ်းတီႈ 30/04/2024 ယၢမ်းၵၢင်ၶမ်ႈ ၾႆးမႆႈ ႁူင်းၸၢၵ်ႈႁဵတ်းၸေႈ တီႈဝဵင်းသမုတ်ႇသၶွၼ်း မိူင်းထႆး ႁၢဝ်ႈႁႅင်း ၸႂ်ႉရူတ်ႉၵႃးၶႄၾႆး 30 လမ်း ႁူတ်းၸွႆႈတေႃႇထိုင်မိူင်းလႅင်းၵေႃႈ ၾႆးပႆႇမွတ်ႇ ဝႃႈၼႆ။

ၾႆးၼႆႉ တႄႇမႆႈတီႈၵွင်ၸေႈၵဝ်ႇ ဢၼ်မီးတၢင်းလင်ႁူင်းၸၢၵ်ႈၼၼ်ႉမႃး ၸဵမ်မိူဝ်ႈၶၢဝ်းယၢမ်းဝၢႆးဝၼ်းမိူဝ်ႈ ဝၼ်းတီႈ 30 လၢမ်းမႆႈၶဝ်ႈပႃးႁူင်းၸၢၵ်ႈ။ ႁူင်းၸၢၵ်ႈၼႆႉသမ်ႉ ယႂ်ႇၵႂၢင်ႈ မွၵ်ႈ 5 ဢေႊၶိူဝ်ႊလႄႈ ႁဵတ်းႁႂ်ႈၶႄယၢပ်ႇ။ လႆႈၸႂ်ႉရူတ်ႉ ၵႃးႁူတ်းၼမ်ႉ 20 လမ်းသေ ႁူတ်းတင်းၶိုၼ်းၵေႃႈ ဢမ်ႇပေႉ။ ထိုင်တီႈလႆႈဢဝ်ရူတ်ႉၵႃးႁူတ်းၼမ်ႉ တီႈၵုင်းထဵပ်ႈမႃး ၸွႆႈထႅင်ႈ 10 လမ်း ၼႆယဝ်ႉ။

ၵူၼ်းၶႄၾႆး ၶဝ်လၢတ်ႈဝႃႈ – တႃႇတေမွတ်ႇၾႆးလႆႈ တင်းမူတ်းၼႆႉ လႅပ်ႈတေလႆႈၸႂ်ႉၶၢဝ်းယၢမ်းထႅင်ႈ မွၵ်ႈ 2 ဝၼ်းၼႆႉယူႇ – ဝႃႈၼႆ။

တီႈႁိမ်းႁူင်းၸၢၵ်ႈၼၼ်ႉ ဢမ်ႇမီးႁိူၼ်းယေး ၵူၼ်းမိူင်းယူႇသဝ်းလႄႈ လွင်ႈလူႉသုမ်းၵူၼ်းဝၢၼ်ႈတႄႉ ဢမ်ႇမီး။

ပီၼႆႉ သၢႆလူမ်းမႆႈလတ်းၼႂ်းထုင်ႉၵုၼ်ဢေႊသျိူဝ်ႊလႄႈ ႁႅင်းလူမ်းမႆႈသုင်ႁႅင်း။ ထိုင်တီႈ လႆႈၾၢင်ႉၽေးၾႆးလီလီ – ၸုမ်းၶႄၾႆးၵေႃႈလၢတ်ႈ ၼင်ႇၼႆ။

ဢၢင်ႈဢိင် – The Nation