ၶိူင်ႈမိၼ် သိုၵ်းမၢၼ်ႈ ပၼ်ႇလဵပ်ႈၶိုၼ်ႈလူင်း တီႈဝဵင်းမူႇၸေႊၼႆႉ မီး 5 ဝၼ်းထပ်းၵၼ်ယဝ်ႉ ႁဵတ်းႁႂ်ႈၵူၼ်း မိူင်းမႆႈၸႂ် ၵူဝ်ပဵၼ်ပၢင်တိုၵ်းယႂ်ႇထႅင်ႈ။
တႄႇဢဝ် ဝၼ်းတီႈ 29/3/2024 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 2/4/2024 ၼႆႉ ၶိူင်ႈမိၼ်မႅင်းမီႈ (ႁၢႆးသၵီး) ၶွင်သိုၵ်းမၢၼ်ႈ မႃးပၼ်ႇလဵပ်ႈၶိုၼ်ႈလူင်း တီႈဝဵင်းမူႇၸေႊ လႅၼ်လိၼ်တႆး – ၶႄႇ ၸိုင်ႈတႆးပွတ်းႁွင်ႇ ၼိုင်ႈဝၼ်းလႂ် ၶိုၼ်ႈလူင်း ဢမ်ႇယွမ်း 2-3 ပွၵ်ႈ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “တႄႇဢဝ် ဝၼ်းတီႈ 29 လိူၼ်ပူၼ်ႉမႃး ၶိူင်ႈမိၼ်သိုၵ်းမၢၼ်ႈ (ႁၢႆးသၵီး) ၼႆႉ လုၵ်ႉတၢင်းၸေႊလၢၼ်ႉ ပၼ်ႇမႃးတၢင်းမူႇၸေႊၼႆႉ ၶႂ်ႈဝႃႈ ၵူႈဝၼ်းယဝ်ႉ။ မၢင်ဝၼ်းမႃး 1 လမ်း မၢင်ဝၼ်းၵေႃႈ 2 လမ်း။ ယဝ်ႉၵေႃႈ ၶိုၼ်ႈလူင်း ၸိူဝ်းၼႆႉ 1 ဝၼ်း 2-3 ပွၵ်ႈၶႃႈဢေႃႈ”- ဝႃႈ ၼႆ။
ၼႂ်းဝၼ်းတီႈ 2/4/2024 ၼႆႉၵူၺ်း ၶိူင်ႈမိၼ် သိုၵ်းမၢၼ်ႈ ၶိုၼ်ႈလူင်း တီႈဝဵင်းမူႇၸေႊၼႆႉ တင်းမူတ်း 3 ပွၵ်ႈ။ မိူဝ်ႈဝၼ်းတီႈ 1 ၼၼ်ႉသမ်ႉ 2 ပွၵ်ႈ ၼႆယဝ်ႉ။
“ႁၼ်ၶိူင်ႈမိၼ် သိုၵ်းမၢၼ်ႈ ၶိုၼ်ႈလူင်းမႃး ၶၢဝ်းတၢင်း 4-5 ဝၼ်းထပ်းၵၼ်ၼႆႉ မၼ်းပဵၼ်ဢၼ်လၢၵ်ႇလၢႆး တႃႇႁဝ်း ၵူၼ်းမိူင်းဝႆႉဢၼ်ၼိုင်ႈ ဢမ်ႇႁူႉဝႃႈ တီႈမူႇၸေႊႁဝ်းၼႆႉ တေၵိူတ်ႇၶိုၼ်ႈသင်။ ၵူၼ်းမိူင်း ၵမ်ႈၼမ်ၵေႃႈ ဢွၼ်ၵၼ်ၸွမ်းတူၺ်းလွင်ႈၶဝ် ၶိုၼ်ႈလူင်းယူႇ ၶဝ်မႃးႁဵတ်းသင်တႄႉတႄႉ မႃးသူင်ႇၵူၼ်းသိုၵ်းၶဝ်ႁႃႉ၊ မႃးသူင်ႇမၢၵ်ႇမိုဝ်ႉၸိုၼ်းယၢမ်း ၶွင်ၵိၼ်ယႅမ်ႉႁႃႉ ဢမ်ႇၼၼ် မႃးပူတ်ႈလႅၵ်ႈၵူၼ်းၶဝ်ႁႃႉ ၼႆၸိူဝ်းၼႆႉ ၽႂ်ၵေႃႈ ပႆႇႁူႉ လွင်ႈတၢင်းမၼ်းလီလီ။ ပၢင်တိုၵ်းတႄႉ ၵူဝ်မၼ်းပဵၼ်ထႅင်ႈၵူၺ်းယဝ်ႉ”- ၵူၼ်းပိုၼ်ႉတီႈ မူႇၸေႊ သိုပ်ႇလၢတ်ႈၼႄၼင်ႇၼႆ။
ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်တႆး – ၶႄႇ ဝဵင်းၼိုင်ႈ ယဝ်ႉၵေႃႈ ပဵၼ်ဝဵင်းပၢႆးမၢၵ်ႈမီး ၵႃႉၶၢႆ ၵေႃႈၸႂ်ႈ။ မိူဝ်ႈပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉ ပႃးၸႄႈဝဵင်းမူႇၸေႊၼႆႉ ဝဵင်းၼိုင်ႈ။ တႄႇဢဝ် ဝၼ်းတီႈ 11/1/2024 ၼၼ်ႉမႃး တူဝ်တႅၼ်း ၸုမ်းဢူၺ်းလီ 3 ၸုမ်းလႄႈ သိုၵ်းမၢၼ်ႈ ႁူပ်ႉဢုပ်ႇၵၼ် တီႈဝဵင်းၶုၼ်ႊမိင်ႊ ၸိုင်ႈမိူင်းၶႄႇသေ ၸင်ႇဢုပ်ႇဢူဝ်းတူၵ်းလူင်း ၵိုတ်းတိုၵ်းၵၼ်မႃး ႁၢၼ်ႉတေႃႇထိုင်ယၢမ်းလဵဝ်။
ဝၢႆးပၢင်တိုၵ်း ယဵၼ်လူင်းယဝ်ႉ ၵူၼ်းမိူင်းမူႇၸေႊ ယဵပ်ႇၺႃးမၢၵ်ႇမႅင်းၾင်လိၼ်/ မၢၵ်ႇႁၢင်ႈၵၢင်သေ တႅၵ်ႇတိူဝ်ႉသႂ်ႇ လူႉတၢႆမၢတ်ႇၸဵပ်း ဢမ်ႇယွမ်း 10 ယဝ်ႉ ၼႂ်းၶၢဝ်းတၢင်း လိူၼ်ၵျႅၼ်ႊၼိဝ်ႊရီႊလႄႈ လိူၼ်ၾႅပ်ႊပိဝ်ႊရီႊၼႆႉ ဝႃႈၼႆ။
ယဝ်ႉၵေႃႈ ၼႂ်းလိူၼ်မၢတ်ႊၶျ်ပူၼ်ႉမႃးၼႆႉ ၵူၼ်းမူႇၸေႊ ထုၵ်ႇတီႉၺွပ်း ဢဝ်ပဵၼ်တူဝ်ယိူဝ်ႇလႄႈ ၺႃးၸူၼ် ၸွမ်းတၢင်း ၸိူဝ်းၼႆႉ မီးမွၵ်ႈ 10 ၵေႃႉယဝ်ႉ ဝႃႈၼႆ။
