ၵူၼ်းၼမ်ႉလၼ်ႈ ၽူႈယိင်းၵေႃႉၼိုင်ႈ ၺႃးၸူၼ်ၸွမ်းတၢင်း ႁိမ်းၵေႃလိၵ်ႈလၢႆး သုမ်းၵႂႃႇငိုၼ်းၶမ်း 10 သႅၼ်ပျႃးပၢႆ။
ဝၼ်းတီႈ 31/3/2024 ယၢမ်းဝၢႆးဝၼ်း 4 မူင်းၶိုင်ႈ ၼၢင်းယိင်း ၵေႃႉၼိုင်ႈ ၺႃးၸူၼ် တီႈႁိမ်းၵေႃလိၵ်ႈလၢႆး ၼႂ်းၵၢင်ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ လႆႈၵႂႃႇငိုၼ်းတင်းၶမ်း ၶၼ်ငိုၼ်းဢမ်ႇယွမ်း 10 သႅၼ်ပျႃး ၼႆယဝ်ႉ။
ပီႈၼွင်ႉၸမ်ၸႂ် ၼၢင်းယိင်း ၵေႃႉၺႃးၸူၼ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်း ၺႃးၸူၼ်ၸွမ်းတၢင်း၊ ၽွင်းမၼ်းၼၢင်း တိုၵ်ႉၵိုတ်းရူတ်ႉဝႆႉ ႁိမ်းတၢင်းၼၼ်ႉ မီးၵူၼ်းၶီႇရူတ်ႉၶိူင်ႈမႃးသွင်ၵေႃႉ ပႃးလႅဝ်းသေ ၸၼ်ဢဝ်ထူင်ပႃး မၼ်းၼၢင်းယဝ်ႉ ႁေႃႈရူတ်ႉၶိူင်ႈလႅၼ်ႈပၢႆႈ။ ၵူၼ်းၸူၼ်ၼၼ်ႉ လႆႈၵႂႃႇငိုၼ်းမွၵ်ႈ 3 သႅၼ်။ ၾူၼ်းၵႃႈၶၼ် မွၵ်ႈ 2 သႅၼ် လုၵ်ႈၼိုင်ႈလႄႈ မၢတ်ႇၺၢပ်ႈၶမ်း ၵႃႈၶၼ်ငိုၼ်း မွၵ်ႈ 4 သႅၼ် 1 ဢၼ် ႁူမ်ႈတင်းမူတ်း ဢမ်ႇယွမ်း 10 သႅၼ်ပျႃး”- ဝႃႈၼႆ။
မိူဝ်ႈဝၼ်းတီႈ 31/3/2024 ယၢမ်းၵၢင်ဝၼ်းမွၵ်ႈ 11 မူင်း ၼႆႉၵေႃႈ ၵူၼ်းၶၢႆၶွင်ၵိၼ်ပၢင်ႇလၢႆႇ (ပင်လယ်စာ) တီႈၼႂ်းၵၢတ်ႇဝဵင်းမူႇၸေႊ ၵေႃႉၼိုင်ႈ ၼၼ်ႉၵေႃႈ မိူဝ်ႈၽွင်းမၼ်းၸၢႆး ႁေႃႈရူတ်ႉၶိူင်ႈပွၵ်ႈႁိူၼ်းၼၼ်ႉ ထုၵ်ႇၸုမ်းဢမ်ႇႁူႉၾၢႆႇ ၶီႇၵႃးမႃးသေ တီႉဢဝ်မၼ်းၸၢႆး ၵႂႃႇပဵၼ်တူဝ်ယိူဝ်ႇ (ပြန်ပေးဆွဲ) တီႈပွၵ်ႉပၢႆးၸၢၵ်ႈ ဝဵင်းမူႇၸေႊ ၵေႃႉၺႃးတီႉၺွပ်းၵႂႃႇၼႆႉ တေမီးဢႃယုမွၵ်ႈ 40 ပီ။
ၼႂ်းလိူၼ်မၢတ်ႊၶျ်ၼႆႉၵူၺ်း ၵူၼ်းမူႇၸေႊ ၺႃးတီႉၺွပ်း ဢဝ်ႁဵတ်းတူဝ်ယိူဝ်ႇလႄႈ ၺႃးၸူၼ်ၸွမ်းတၢင်း ၸိူင်ႉၼႆၼႆႉ တေမီးမွၵ်ႈ 10 ၵေႃႉယဝ်ႉ ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 3 ပီပၢႆၼႆႉ ႁဵတ်းႁႂ်ႈဝၢၼ်ႈမိူင်း ဢမ်ႇမီးလွင်ႈၼိမ်သဝ်း ၽူႈလၵ်ႉၸၵ်ႉၶုတ်ႈ ၵေႃႈ ယိင်ႈၶႅၼ်းၼမ်ႁႅင်း။ ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းဢွၼ်ၵၼ်မႆႈၸႂ် လွင်ႈႁူမ်ႇလူမ်ႈသၢႆၸႂ်လႄႈ ၶူဝ်းၶွင်ငိုၼ်းၶမ်း။ ပေႃးၺႃး ၽူႈလၵ်ႉၸၵ်ႉၶုတ်ႈ မႃးၸူၼ်ဢဝ်ၶူဝ်းၶွင်ၵႂႃႇၸိုင် ဢမ်ႇႁူႉဝႃႈတေၵႂႃႇ တိူင်ႇလၢတ်ႈတီႈလႂ် ဢမ်ႇမီးမူႇလႂ် ၸုမ်းလႂ် မႃးဢဝ်ပုၼ်ႈၽွၼ်း တူၺ်းပၼ်လွင်ႈႁူမ်ႇလူမ်ႈသၢႆၸႂ် ဝႃႈၼႆ။
