မီးၵူၼ်း 4 ၵေႃႉ ယိပ်းၵွင်ႈယၢဝ်းသေ ၶဝ်ႈၸူၼ်ၵူၼ်းမူႇၸေႊ လႆႈၵႂႃႇၵႃးလမ်းၼိုင်ႈလႄႈ ရူတ်ႉၶိူင်ႈ လမ်းၼိုင်ႈ။
ဝၼ်းတီႈ 19/04/2025 ယၢမ်းၵၢင်ၶမ်ႈ 8:45 မူင်း ၸုမ်းဢမ်ႇႁူႉၾၢႆႇ မီးႁႅင်းၵူၼ်း 4 ၵေႃႉ ယိပ်းၵွင်ႈယၢဝ်း လဝ်းၼိုင်ႈသေ ၶဝ်ႈၸူၼ်ႁၢၼ်ႉမႄးရူတ်ႉၵႃး (ၵူဝ်ႇဢူး ဝွတ်ႉသျွပ်ႉ) တီႈပွၵ်ႉႁူဝ်ၼႃး ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၸူၼ်ၼၼ်ႉ ၶီႇၵႃး Crown သီလမ်မႃး လမ်းၼိုင်ႈ ပဵၼ်ၵူၼ်းၸၢႆး 4 ၵေႃႉ ယိပ်းၵွင်ႈယၢဝ်းၼိုင်ႈလဝ်း။ ၶဝ်မႃး ၸူၼ်ဢဝ်ၵႂႃႇ ရူတ်ႉၶိူင်ႈသႅၼ်း Scoopy လမ်းၼိုင်ႈလႄႈ ၵႃး Crown သီၶၢဝ် လမ်းၼိုင်ႈ။ ရူတ်ႉၶိူင်ႈၼၼ်ႉတႄႉ မီးၵႃႈၶၼ်ၵႃႈႁိုဝ်တႄႉ ဢမ်ႇႁူႉ။ ၵႃးၼၼ်ႉတႄႉ တေမီးၶၼ်မၼ်းမွၵ်ႈ 200 သႅၼ်ပျႃးၼႆႉ”- ဝႃႈၼႆ။
ဢိင်ၼိူဝ်လွင်ႈၼႆႉ တီႈၵွင်ႈထၢႆႇ CCTV ဢၼ်လႆႈထၢႆႇဝႆႉသေ ပိုၼ်ၽၢဝ်ႇဢွၵ်ႇဝႆႉၼၼ်ႉ – မီးၵူၼ်းၸၢႆး 4 ၵေႃႉ ၶီႇၵႃး Crown သီလမ် မႃးလမ်းၼိုင်ႈ။ ၼႂ်း 4 ၵေႃႉၼၼ်ႉ တႃႇၵေႃႉၼိုင်ႈ ပႂ်ႉဝႆႉၼိူဝ်ၵႃး။ တႃႇ 3 ၵေႃႉသမ်ႉ ၶဝ်ႈၸူၼ်။ ၵူၼ်းၸူၼ်ၸိူဝ်းၼၼ်ႉ တိုဝ်းမၢၵ်ႇႁူဝ်ငႅပ်း၊ သႂ်ႇၽႃႈတူမ်းသူပ်း (Mask) ၊ သႂ်ႇသိူဝ်ႈၶႅၼ်ယၢဝ်း၊ ၵူၼ်ယၢဝ်းၵၼ်ၵူႈၵေႃႉ။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 20/04/2025 ယၢမ်းႁူဝ်ၶမ်ႈမွၵ်ႈ 7 မူင်း ၼၼ်ႉၵေႃႈ ရူတ်ႉၶိူင်ႈၵူၼ်းမိူင်း လမ်းၼိုင်ႈ ဢၼ်ၵိုတ်းဝႆႉတီႈၼႃႈႁၢၼ်ႉၵႅတ်းၶူၼ်ႁူဝ် ႁိမ်းယေးငိုၼ်း ၵၢမ်ႇပေႃးၸ မၢႆ (1) ဝဵင်းမူႇၸေႊ ၼၼ်ႉၵေႃႈ ၺႃးလၵ်ႉၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ