တႃႇတေလူတ်းယွမ်းလွင်ႈၵႂၼ်းၾႆးဢုၺ် မိူင်းမူဝ်းၼႆႉသေ ၸွမ်ၽွင်းလူင်ၸိုင်ႈထႆး သဵတ်ႇထႃ ထဝီးသိၼ် လၢတ်ႈဝႃႈ ၼႂ်းပီ 2025 တေမႃးၼႆႉ တေဢမ်ႇသိုဝ်ႉၶဝ်ႈၵၢပ်ႇ မိူင်းႁိမ်းႁွမ်းယဝ်ႉ ဝႃႈၼႆ။
ဝၼ်းတီႈ 16 လိူၼ်မၢတ်ႊၶျ် 2024 ၼႆႉ ၸွမ်ၽွင်းလူင် သဵတ်ႇထႃ ထဝီးသိၼ် ႁွတ်ႈထိုင်ဝဵင်းၵဵင်းမႂ်ႇသေ သပ်းၸႅင်ႈၶၢဝ်ႇဝႃႈ – ဝၼ်းမိူဝ်ႈၼႆႉ မိူင်းထႆးထူပ်းပၼ်ႁႃ မွၵ်ႇၵႂၼ်းမိူင်းမူဝ်း ႁၢဝ်ႈႁႅင်း ပဵၼ်ယွၼ်ႉ မိူင်းႁိမ်း ႁွမ်း ၸုတ်ႇၽဝ်ႁႆႈၼႃးပႃႇထိူၼ်ႇလႄႈ ႁဵတ်းႁႂ်ႈ ၵႂၼ်းၾႆးၼႆႉ တုမ်ႉတိူဝ်ႉပၢႆးယူႇလီ ၵူၼ်းမိူင်းႁၢဝ်ႈႁႅင်း – ဝႃႈၼႆ။
ၵွပ်ႈၼႆလႄႈ ၼင်ႇႁိုဝ် ၵႂၼ်းၾႆးတေယွမ်းၵႂႃႇၼၼ်ႉ သင်ဝႃႈ မိူင်းထႆးဢမ်ႇသိုဝ်ႉၶဝ်ႈၵၢပ်ႇၼႆ ၸဝ်ႈသူၼ် ၸဝ်ႈႁႆႈ ၸိူဝ်းယူႇႁိမ်းလႅၼ်လိၼ် တေလႅၵ်ႈလၢႆႈၵၢၼ်ၽုၵ်ႇသွမ်ႈ။ ပေႃးလႅၵ်ႈလၢႆႈၵၢၼ်ၽုၵ်ႇသွမ်ႈၼႆ ၵၢၼ် ၽဝ်ႁႆႈၽဝ်သူၼ် တေလူတ်းယွမ်း – ဝႃႈၼႆ။
ၼႂ်းပီ 2025 ၼႆႉ မိူင်းထႆး တေဢမ်ႇႁပ်ႉသိုဝ်ႉၶဝ်ႈၵၢပ်ႇ မိူင်းမၢၼ်ႈ၊ မိူင်းလၢဝ်း၊ မိူင်းၵမ်ႇပေႃးတီးယႃး။ ယူႇတီႈ ၽူႈၼမ်းမိူင်းထႆးသေ လႆႈဢုပ်ႇဢူဝ်းၵၼ်တင်း သိုၵ်းမၢၼ်ႈ ယိုတ်းမိူင်းလႄႈ ၽူႈၼမ်း မိူင်းၵမ်ႇပေႃး တီးယႃး ယဝ်ႉလီငၢမ်းယဝ်ႉ ဝႃႈၼႆ။
ဢၢင်ႈဢိင် – BBC
