သဵင်မၢၵ်ႇတႅၵ်ႇ လင်ႁႅင်းထႅင်ႈ တၢင်းၾၢႆႇႁွင်ႇဝဵင်းလၢႆးၶႃႈ ၵမ်းၼိုင်ႈ ႁဵတ်းႁႂ်ႈၵူၼ်းမိူင်း ဢွၼ်ၵၼ်တူၵ်းၸႂ် ဝႃႈၼႆ။
ဝၼ်းတီႈ 19/3/2024 ယၢမ်းၵၢင်ၶမ်ႈ 8 မူင်းၶိုင်ႈ သဵင်မၢၵ်ႇတႅၵ်ႇ လင်ႁႅင်း ၵမ်းၼိုင်ႈ တၢင်းၾၢႆႇႁွင်ႇဝဵင်း တီႈ တပ်ႉသိုၵ်းမၢၼ်ႈ ၶမယ 515 ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁဵတ်းႁႂ်ႈ ၵူၼ်းမိူင်း ၵမ်ႈၼမ် ဢွၼ် ၵၼ်တူၵ်းၸႂ် မၢင်ၸိူဝ်းထၢင်ႇပဵၼ်ပၢင်တိုၵ်း ဝႃႈၼႆ။
ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇတႅၵ်ႇ ဢၼ်တပ်ႉၶဝ် ႁၢင်ႈၵၢင်ဝႆႉၼၼ်ႉ ၶႃႈဢေႃႈ။ တူဝ်သတ်းၵႂႃႇၽႃႇၺႃးႁိုဝ် ဢမ်ႇၼၼ် ၵိင်ႇမႆႉတူၵ်းသႂ်ႇလႄႈ တႅၵ်ႇႁိုဝ်ၼႆတႄႉ ၽႂ်ၵေႃႈ ပႆႇႁူႉ တႅတ်ႈတေႃးၶႃႈ။ မၢၵ်ႇတႄႉ တႅၵ်ႇၵမ်းၼိုင်ႈၵူၺ်း။ ႁဝ်းထၢင်ႇဝႃႈ ပိူၼ်ႈယိုဝ်းၵၼ်ယူဝ်ႉ ၼႆၵွၼ်ႇဢေႃႈ”- ဝႃႈၼႆ။
တပ်ႉသိုၵ်းမၢၼ်ႈ ၶမယ 515 ၼႆႉ မီးဝႆႉ တၢင်းၾၢႆႇႁွင်ႇဝဵင်းလၢႆးၶႃႈ ယၢၼ်ဝဵင်းမွၵ်ႈ 1 လၵ်း ဝႃႈၼႆ။
“တႅၵ်ႇလင်ႁႅင်းဢေႃႈ ဢမ်ႇႁူႉဝႃႈ တႅၵ်ႇတီႈလႂ်တႄႉတႄႉ ဢၼ်လႆႈငိၼ်းသဵင်တႅၵ်ႇမႃးတႄႉ တၢင်းၾၢႆႇႁွင်ႇ ဝဵင်းၼၼ်ႉ ဢေႃႈ။ ယွၼ်ႉဝႃႈ မိူဝ်ႈၶမ်ႈဝႃးၼႆႉ တီႈၼိူဝ်ဝဵင်းၼႆႉ လႆႈငိၼ်းသဵင်ၵွင်သဵင်မွင်းႁႅင်းၼႃႇလႄႈ ဢမ်ႇတၼ်းလႆႈသတိထွမ်ႇလီလီၶႃႈ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 27/2/2024 ယၢမ်းႁူဝ်ၶမ်ႈမွၵ်ႈ 7 မူင်း သဵင်မၢၵ်ႇတႅၵ်ႇ လင်ႁႅင်း တၢင်းၾၢႆႇတပ်ႉသိုၵ်းမၢၼ်ႈ ၾၢႆႇႁွင်ႇဝဵင်းလၢႆးၶႃႈ ၵမ်းၼိုင်ႈ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်းၵမ်ႈၼမ် တူၵ်းၸႂ် ၵူဝ်ပဵၼ်ပၢင်တိုၵ်း ၼႆယဝ်ႉ ။
ယၢမ်းလဵဝ် ၼႂ်းၸႄႈဝဵင်းလၢႆးၶႃႈၼႆႉ မီးဝႆႉ သိုၵ်းမၢၼ်ႈ ယိုတ်းမိူင်း၊ ပျီႇတူႉၸိတ်ႉ မၢၼ်ႈပၢင်ႇ (758) ၊ သိုၵ်း SSPP လႄႈ သိုၵ်း RCSS ၸိူဝ်းၼႆႉ တူင်ႉၼိုင်ယူႇဝႆႉ ဝႃႈၼႆ။
