ထူပ်းႁၼ် ၽူႈၸၢႆးၵေႃႉၼိုင်ႈ ၼွၼ်းတၢႆဝႆႉ တီႈႁိမ်းၵဵၵ်ႉဢေႊသျိူဝ်ႊဝေႃႊ တၢင်းဢွၵ်ႇဝဵင်းၵျွၵ်ႉမႄး ဝႃႈၼႆ။
ဝၼ်းတီႈ 13/3/2024 ယၢမ်းၵၢင်ဝၼ်းမွၵ်ႈ 11 မူင်း ယူႇတီႈ ၸုမ်းၼမ်ႉၶူမ်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး လႆႈၵႂႃႇဢဝ်မႃး ၶၢပ်ႈတူဝ်တၢႆ ၽူႈၸၢႆးၵေႃႉၼိုင်ႈ ၼွၼ်းတၢႆဝႆႉ တီႈတႂ်ႈလၵ်းသဝ်ၾႆး ၶွင်ၾူၼ်း MPT ႁိမ်းၵဵၵ်ႉဢေႊသျိူဝ်ႊဝေႃႊ တၢင်းဢွၵ်ႇဝဵင်းၵျွၵ်ႉမႄး ၼႂ်းၸိုင်ႈတႆးပွတ်းႁွင်ႇ ၼႆယဝ်ႉ။
ၽူႈၶဝ်ႈၸုမ်းၼမ်ႉၶူင်း ၶႅၵ်ႇလီပၢင်ၸႃႇတႆး ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ လႆႈ ၵႂႃႇႁပ်ႉတူဝ်တၢႆမႃး ပဵၼ်ၽူႈၸၢႆး ဢႃယုတေမီးမွၵ်ႈႁိုဝ် ၸိုဝ်ႈဝႃႈႁိုဝ်ၸိူဝ်းၼႆႉတႄႉ ဢမ်ႇႁူႉၶႃႈ။ ယဝ်ႉၵေႃႈ ပဵၼ်ၵူၼ်းဝၢၼ်ႈလႂ် မိူင်းလႂ် ၸိူဝ်းၼႆႉၵေႃႈ ဢမ်ႇႁူႉၶႃႈ။ မိူဝ်ႈၽွင်း ၵႂႃႇဢဝ်ဢွၵ်ႇမႃးၼၼ်ႉ ၶၢပ်ႈတူဝ်မၼ်း ၸၢႆးပေႃးလမ်မူတ်းယဝ်ႉ လႅပ်ႈတေတၢႆမႃးမွၵ်ႈ 10 ဝၼ်းၼႆႉယဝ်ႉ။ ယွၼ်ႉသင်လႄႈ တၢႆတႄႉ ဢမ်ႇႁူႉၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး လႆႈသူင်ႇၽဝ်ပႅတ်ႈ တီႈပႃႇႁဵဝ်ႈ ႁူမ်ႈယဵၼ် (အေးချမ်းသာသုသာန်) ၼႆယဝ်ႉ။
လိူဝ်ၼၼ်ႉ မိူဝ်ႈဝၼ်းတီႈ 10/3/2024 ယၢမ်းၵၢင်ၶမ်ႈမွၵ်ႈ 7 မူင်း ၼၼ်ႉၵေႃႈ တီႈဝၢၼ်ႈၼမ်ႉတုမ် ပွၵ်ႉ 2 ဝဵင်းၵျွၵ်ႉမႄး ရူတ်ႉၶိူင်ႈလမ်းၼိုင်ႈ ပဵၼ်ၽေးၵိုင်ႉၵၢင်ႉလူမ်ႉသေ ၽူႈၸၢႆးသွင်ၵေႃႈ သွၼ်ႉမႃးၸွမ်းၵၼ် ၼၼ် တႃႇၵေႃႉၼိုင်ႈ လူႉတၢႆထင်တီႈ ပဵၼ်ၵူၼ်းဝၢၼ်ႈၵျွၵ်ႉတွင်ႇလႄႈ မၢတ်ႇၸဵပ်း ၵေႃႉၼိုင်ႈ ၼႆယဝ်ႉ။
ဝၼ်းတီႈ 13/3/2024 ယၢမ်းၵၢင်ဝၼ်း 12 မူင်းပၢႆ ၼႆႉၵေႃႈ ၵႃးတင်း ရူတ်ႉၶိူင်ႈၽႃႇၵၼ် ၼႂ်းၵႄႈပၢင်လူင် – လၢႆးၶႃႈ ၼႂ်းၸိုင်ႈတႆးပွတ်းၸၢၼ်း ဢွၼ်ႇၸၢႆးၼုမ်ႇ 2 ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်ၼၼ်ႉ လူႉတၢႆ ထင်တီႈ ၵေႃႉၼိုင်ႈ မၢတ်ႇၸဵပ်း ၶႃႁၵ်း ၵေႃႉၼိုင်ႈ ၼႆယဝ်ႉ။
