ၽွင်းဝၢၼ်ႈမိူင်းသုၵ်ႉယူႇၼႆႉ သိုၵ်းၵဝ်ႈၵၢင်ႉ MNDAA ပိုတ်ႇပၢင်တေႃႇလွင်း ၶိုၵ်ႉယႂ်ႇ တီႈၵၢင်ဝဵင်းသႅၼ်ဝီ မီးၵူၼ်းတေႃႇလွင်း ၵိုၼ်းၶွၼ်ႈ ၵူႈၶၢဝ်း။
တႄႇဢဝ် ႁၢင်လိူၼ်ၾႅပ်ႊပိဝ်ႊရီႊ 2024 ၼႆႉမႃး တေႃႇထိုင်ယၢမ်းလဵဝ် သိုၵ်းၵဝ်ႈၵၢင်ႉ MNDAA ပဵၼ်ၸဝ်ႈ တႅင်ႇလူင်သေ ပိုတ်ႇပၢင်တေႃႇလွင်းမႃး တီႈပၢင်ႇလိူၼ်သီႇ ၵၢင်ဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ပဵၼ်သိုၵ်းၵဝ်ႈၵၢင်ႉ ၵမ်းလဵဝ် ၶႃႈယဝ်ႉ ဢၼ်ပဵၼ် ၸဝ်ႈတႅင်ႇလူင်မၼ်းသေ ပိုတ်ႇပၢင်တေႃႇလွင်းမႃးၼႆႉ။ ပၢင်တေႃႇလွင်း တီႈသႅၼ်ဝီၼႆႉ ၶဝ်တႄႇ ပိုတ်ႇမႃး တင်ႈတႄႇပီမႂ်ႇၶႄႇၼၼ်ႉသေ ၼိုင်ႈတီႈလႂ် ၶဝ်ပိုတ်ႇၼိုင်ႈဢိတ်းၼိုင်ႈဢွတ်း ၵႂႃႇၸိူင်ႉၼၼ်သေ ထိုင်မႃးႁၢင်လိူၼ်ၾႅပ်ႊပိဝ်ႊရီႊ ၼၼ်ႉ ၶဝ်ၶိုၼ်းၶၢႆႉမႃးၶွၼ်ႈတီႈလဵဝ် တီႈပၢင်ႇလိူၼ်သီႇၼႆႉသေ မႃးၸတ်း ႁဵတ်းယႂ်ႇလူင် တေႃႇထိုင်ယၢမ်းလဵဝ် ၼႆႉၶႃႈယဝ်ႉ”- ဝႃႈၼႆ။
တီႈၼႂ်းပၢင်တေႃႇလွင်းၼၼ်ႉ မီးဝႆႉ မိူၼ်ၼင်ႇ – ၽၢႆႉၵိဝ်း၊ မၢၵ်ႇၵိင်ႈလွႆ၊ လေးၵွင်ႇၵိၼ်ႇလႄႈ ဢိၵ်ႇထႅင်ႈ လၢႆလၢႆဢၼ် ဝႃႈၼႆ။
“ၽွင်းဝၢၼ်ႈမိူင်းသုၵ်းၼႆႉ ၵူၼ်းၵႂႃႇတေႃႇၵႂႃႇလွင်းၵေႃႈ ၶႂ်ႈဝႃႈၵိုၼ်းၵူႈဝၼ်းၵူႈၶိုၼ်းၶႃႈယဝ်ႉ။ ဢၼ်ၶဝ်မႃး ပိုတ်ႇပၢင်တေႃႇလွင်း ၸိူင်ႉၼႆၼႆႉ ဢမ်ႇၶႅမ်ႉၶႃႈ ပေႃးပဵၼ်လႆႈတႄႉ ဢမ်ႇၶႂ်ႈႁႂ်ႈမီးပၢင်တေႃႇလွင်း တေဢဝ် ၵူၼ်းမိူင်းႁဝ်း လုၵ်ႈ ဢွၼ်ႇၼုမ်ႇႁဝ်းလူႉၵူၺ်း”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ပၢင်တေႃႇလွင်းၼႆႉ တေၸတ်းႁဵတ်းတေႃႇထိုင် လိူၼ်ႁႃႈ (သွၼ်းၼမ်ႉ) ဝႃႈၼႆ။
ယွၼ်ႉၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီပွတ်းႁွင်ႇ 3 ၸုမ်းၼႆႉသေ ႁဵတ်းႁႂ်ႈၵူၼ်းမိူင်းသႅၼ်ဝီ ပၢႆႈၽေးသိုၵ်းၼပ်ႉႁူဝ်မိုၼ်ႇ ႁိူၼ်းယေးဝတ်ႉမုၼ်ၸဝ်ႈ လူႉၵွႆယွၵ်းယွႆ ထုၵ်ႇၾႆးမႆႈ မွၵ်ႈ 600 လင် ၵူၼ်း မိူင်းလူႉတၢႆ ၵိုၵ်းႁိူၼ်းယေး ၸိူဝ်းၼႆႉၵေႃႈ မီးၼမ် ၼႆယဝ်ႉ။
