ၵူၼ်းမိူင်းထႆးလႄႈ မိူင်းႁူမ်ႈတုမ် ႁူမ်ႈလူၺ်ႈ ၵူၼ်းၼွၵ်ႈမိူင်း ၶဝ်ႈႁူမ်ႈဝႆႈသႃ ထၢတ်ႈတေႃႇၽြႃးပဵၼ်ၸဝ်ႈ တီႈဝဵင်းၵဵင်းမႂ်ႇ ၸိုင်ႈထႆး ၼႂ်းၶၢဝ်းတၢင်း 3 ဝၼ်းမႃးၼႆႉ မီးၵူၼ်းၶဝ်ႈဝႆႈသႃ ဢမ်ႇယွမ်း 2 သႅၼ်ယဝ်ႉ ဝႃႈၼႆ။
တႄႇဢဝ် ဝၼ်းတီႈ 5 – 8/3/2024 ယၢမ်းၵၢင်ၼႂ် 7 မူင်းထိုင် 9 မူင်း ၵၢင်ၶမ်ႈ ယူႇတီႈ လူင်ပွင်ၸိုင်ႈထႆး ပၢင်း ဢဝ်ထၢတ်ႈ တေႃႇၽြႃးပဵၼ်ၸဝ်ႈ၊ ထၢတ်ႈတေႃႇ ၸဝ်ႈသႃႇရိပုတ်ႉတြႃႇလႄႈ ၸဝ်ႈမႁႃႇမွၵ်ႇၵလၢၼ်ႇ ပိၵ်ႉသၢႆႉၶႂႃ မိုဝ်းၽြႃးပဵၼ် ၸဝ်ႈ တီႈမိူင်းၵြႃးဢိၼ်ႊတီႊယႃႊၼၼ်ႉမႃး ဝႆႉတီႈႁေႃၶမ်းလူင် ၼႂ်းသူၼ်မွၵ်ႇရၢတ်ႉၶျၽရိုၵ်း ဝဵင်းၵဵင်းမႂ်ႇ ၸိုင်ႈထႆး ၼင်ႇႁိုဝ် ၵူၼ်းမိူင်းပေႃးတေလႆႈ ဝႆႈသႃလူႇတၢၼ်း ၼႆယဝ်ႉ။
ၸွမ်းၼင်ႇ သိုဝ်ႇၶၢဝ်ႇထႆး ဢွၵ်ႇဝႆႉတႄႉ ၵူၼ်းမိူင်းၶဝ်ႈႁူမ်ႈဝႆႈသႃ ၼႂ်းဝၼ်းတီႈ 5 တင်းမူတ်း 31,988 ၵေႃႉ၊ ဝၼ်းတီႈ 6 သမ်ႉ 88,692 ၵေႃႉလႄႈ ဝၼ်းတီႈ 7 တႄႇဢဝ် ယၢမ်းၵၢင်ၼႂ် 7 မူင်းထိုင် 2 မူင်း ဝၢႆးဝၼ်း ၼႆႉ မီးၵူၼ်းၶဝ်ႈဝႆႈသႃ 94,236 ၵေႃႉယဝ်ႉ ဝႃႈၼႆ။
တႆးႁွတ်ႈ ၵဵင်းမႂ်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၵႂႃႇဝႆႈတႄႉ ၼမ်တႄႉၼမ်ဝႃႈၼၼ်ႉယဝ်ႉ သတ်ႉ ၼႅၼ်ႈလူင်ဝႆႉၶႃႈဢေႃႈ။ ၵူၺ်းၵႃႈ ထၢတ်ႈတေႃႇၽြႃးတႄႉ ပိူၼ်ႈတေဢဝ်ဝႆႉ ၼႂ်းႁူင်းႁေႃၶမ်းၼၼ်ႉ ႁဝ်းၶႃႈ လႆႈ ၶိုၼ်ႈၶူႈလႆၵႂႃႇ ၽႅဝ်တီႈၽၵ်းတူႁေႃၶမ်းလူင်ၼၼ်ႉသေဝႆႈ ဢမ်ႇလႆႈၶဝ်ႈဝႆႈၸမ်ၸမ်ၶႃႈ။ ၵမ်ႈၼမ် ဢၼ်ၵႂႃႇဝႆႈၼႆႉ တေပဵၼ်ပီႈၼွင်ႉထႆး – တႆး ၶႃႈဢေႃႈ”- ဝႃႈၼႆ။
လိူဝ်သေ တႆးႁွတ်ႈမိူင်းထႆးယဝ်ႉ မိူၼ်ၼင်ႇ ၵူၼ်းမိူင်းတႆး ၼႂ်းၸိုင်ႈတႆးပွတ်းဢွၵ်ႇၶူင်းလႄႈ ပွတ်းၸၢၼ်း ၸိူဝ်းၼႆႉ ၵေႃႈ ၶဝ်ႈၵႂႃႇဝႆႈသႃၼမ်။ ၵမ်ႈၼမ် တေႁဵတ်းဝႂ် 7 ဝၼ်း တီႈဝဵင်းမႄႈသၢႆၼၼ်ႉသေၵႂႃႇ ၼႆယဝ်ႉ။
