ဢိင်ၼိူဝ် ငဝ်းလၢႆးဝၢၼ်ႈမိူင်း ဢမ်ႇၼိမ်သဝ်းသေ ပွႆးလိူၼ်သီႇ မိူင်းၵိုင် ပီၼႆႉ တေဢမ်ႇၸတ်းႁဵတ်း ယဝ်ႉ – ၽူႈၶဝ်ႈႁူမ်ႈ ၵေႃႇမတီႇ ဝတ်ႉမူၺ်ႇတေႃႇလၢတ်ႈ။

ၼႂ်းပီ 2024 ၼႆႉ တီႈဝတ်ႉမူၺ်ႇတေႃႇ ဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တေ ဢမ်ႇၸတ်းႁဵတ်းပွႆးလိူၼ်သီႇမူၼ်း ၵိုၼ်းၶွၼ်ႈ မိူၼ်ၵူႈပီယဝ်ႉ ယွၼ်ႉငဝ်းလၢႆး ၼႂ်းပိုၼ်ႉတီႈ ဢမ်ႇၼိမ် သဝ်းလႄႈ မီးၸုမ်းယိပ်းၵွင်ႈၵၢင်ႇ တီႉၺွပ်းၵူၼ်းမိူင်း ၶဝ်ႈႁၢပ်ႇထၢမ်းၵၢၼ်သိုၵ်း ၸိူဝ်းၼႆႉ ဝႃႈၼႆ။

ၽူႈၶဝ်ႈႁူမ်ႈ ၵေႃႇမတီႇ ဝတ်ႉမူၺ်ႇတေႃႇ လၢတ်ႈတီႈၽူႈတွႆႇႁွၵ်ႈဝႃႈ – “ပွႆးလိူၼ်သီႇ ပီၼႆႉတႄႉ ဢမ်ႇ ပဵၼ်ယဝ်ႉ ပေႃးပိူၼ်ႈမႃးလူႇမႃးဝႆႈတႄႉ ႁပ်ႉတွၼ်ႈယူႇၶႃႈ။ မိူင်းၵိုင်ႁဝ်းၼႆႉ တူၵ်းယူႇၼႂ်းၵၢင် ပိူၼ်ႈဝႆႉ လႄႈ ၸုမ်းယိပ်းၵွင်ႈၵၢင်ႇ ၾၢႆႇလႂ်မႃးၵေႃႈ မၼ်းငၢႆႈ ပေႃးၵူၼ်းမႃးပွႆး ပဵၼ်ၵႂႃႇသေၸိူဝ်ႉသေပိူင်တႄႉ ႁဝ်းၶႃႈ ဢမ်ႇၸၢင်ႈဢဝ်ပုၼ်ႈၽွၼ်းပၼ်ပိူၼ်ႈလႆႈလႄႈ ၸႂ်ႁဝ်းၵေႃႈ တေဢမ်ႇၵျေႃႇ”- ဝႃႈၼႆ။

ယၢမ်းလဵဝ် တီႈဝဵင်းမိူင်းၵိုင်ၼႆႉ ၵူၼ်းမိူင်းတေၵႂႃႇလႂ်ၵေႃႈ တေလႆႈယွၼ်းဝႂ်ႁပ်ႉႁွင်း တီႈလုင်းႁဵင်ယဝ်ႉ ၸင်ႇတေၵႂႃႇမႃး ၶဝ်ႈဢွၵ်ႇဝဵင်းလႆႈ ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈမိူင်းၵိုင်ၼႆႉ ပိူၼ်ႈၵဵပ်းသိုၵ်းၶႃႈ ဢေႃႈ ယဝ်ႉ ၵေႃႈ တေၵႂႃႇတၢင်းလႂ်ၵေႃႈ လူဝ်ႇလႆႈမီးဝႂ်ႁပ်ႉႁွင်း တီႈလုင်းႁဵင်ယဝ်ႉ ၸင်ႇၵႂႃႇမႃးလႆႈ။ လိူဝ် ၼၼ်ႉ ပေႃးယၢမ်းႁူဝ်ၶမ်ႈၼႆ ၵူၼ်းမိူင်းၼႆႉ ဢမ်ႇႁတ်းၵႂႃႇလႂ်ယဝ်ႉ ၵူဝ်ၶႃႈဢေႃႈ”- ဝႃႈၼႆ။

ၵူႈပီ ပေႃးထိုင်ၶၢဝ်းပွႆးလိူၼ်သီႇၼႆႉ ၵူၼ်းမိူင်းဝဵင်းၵိုင်လႄႈ ၵူၼ်းတၢင်ႇတီႈတၢင်ႇဝဵင်း ဢွၼ်ၵၼ်မႃး ႁဵတ်းသုမ်ႉႁဵတ်းသွင်းသေ ၶၢႆၶူဝ်းၵုၼ်ႇ ၶွင်ၵိၼ်ယႅမ်ႉၵၼ် ပီၼႆႉ ယွၼ်ႉဢမ်ႇမီးပွႆးလႄႈ တႃႇၵူၼ်းမိူင်း တေလႆႈငိုၼ်းၸူၵ်းငိုၼ်းၸၢႆႇတႄႉ ပဵၼ်ဝႆႉလွင်ႈယၢပ်ႇ ဝႃႈၼႆ။

ၵူၼ်းၵႃႉၶၢႆ ၸွမ်းပွႆးလိူၼ်သီႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ်ၼႆႉ မိူင်းသုၵ်ႉၸိူင်ႉၼႆ သေ တၢင်းၶၢႆၵေႃႈပိူၼ်ႈဢမ်ႇႁၢင်ႈႁႅၼ်းဝႆႉ မိူဝ်ႈၵူႈပီတႄႉ ပေႃးဝႃႈ ၸမ်လိူၼ်သီႇမႃးၼႆ ႁဝ်းတေႁၢင်ႈ ႁႅၼ်းၶူဝ်းၵုၼ်ႇဝႆႉ တႃႇတေၵႂႃႇၶၢႆၼႂ်းပွႆး။ ၵွပ်ႈၼႆလႄႈ ပီၼႆႉတႄႉ လွင်ႈႁႃၵိၼ်ယႅမ်ႉၼႆႉ မၼ်းယၢပ်ႇ ၽိုတ်ႇၼၼ်ႉယဝ်ႉ တွၼ်ႈတႃႇ ၵူၼ်းၵႃႉၶၢႆ ႁဝ်းၶဝ်တႄႉ”- ဝႃႈၼႆ။

လိူဝ်သေ ပွႆးလိူၼ်သီႇ မိူင်းၵိုင်ယဝ်ႉ မိူၼ်ၼင်ႇ ပွႆးလိူၼ်သီႇ ပေႃႇၵျူဝ်ႇ ဝဵင်းသီႇပေႃႉၵေႃႈ တေဢမ်ႇ ၸတ်းႁဵတ်းယႂ်ႇလူင် မိူၼ်မိူဝ်ႈၵူႈပီယဝ်ႉ တေမီးပၢင်လူႇတၢၼ်းၵၢပ်ႈသွမ်းလႄႈ တဵၵ်းၶမ်းၽြႃး ၸိူင်ႉ ၼၼ်ၵူၺ်း ဝႃႈၼႆ။