ၵူၼ်းၼမ်ႉတူႈ သွင်ၵေႃႉ ထုၵ်ႇၵႃးသိုၵ်း TNLA ၽႃႇသႂ်ႇသေ လႆႈတိူဝ်ႉမၢတ်ႇၸဵပ်း တႃႇၵေႃႉၼိုင်ႈ ထိုင်တီႈ ၶႃႁၵ်း လႆႈ ၶိုၼ်ႈႁူင်းယႃၼၼ်ႉ ယူႇတီႈ သိုၵ်း TNLA ၸွႆႈပၼ်ၵႃႈယူတ်းယႃၶိုၼ်း 20 သႅၼ်ပၢႆ – ၵူၼ်းပိုၼ်ႉ တီႈ ဝဵင်းၼမ်ႉတူႈလၢတ်ႈ။
ဝၼ်းတီႈ 1/3/2024 ယူႇတီႈ သိုၵ်းတဢၢင်း TNLA ၵပ်းၾူၼ်းၸူး ၵူၼ်းမၢတ်ႇၸဵပ်း ဢၼ်ထုၵ်ႇၵႃး ၵူၼ်း သိုၵ်းၶဝ် ၽႃႇသႂ်ႇ တီႈႁိမ်းပႃႇႁဵဝ်ႈ တၢင်းၶဝ်ႈဢွၵ်ႇဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ၼၼ်ႉ ယၢမ်းလဵဝ် ၸွႆႈပၼ်ၵႃႈယူတ်းယႃၶိုၼ်း 25 သႅၼ်ပျႃး ၼႆယဝ်ႉ။
ၵူၼ်းပိုၼ်ႉတီႈ ဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 1 ၼႆႉ ပႃးတင်းတူဝ်ၵူၼ်းၽႃႇ သွင်ၵေႃႉ ၼၼ်ႉသေ တင်းၸၶၢၼ်းမူးၶဝ် တီႈၼမ်ႉတူႈၼႆႉ သိုပ်ႇၾူၼ်းတွင်းပၢၼ်ႇမႃးတီႈ ၾၢႆႇၵူၼ်း ဢၼ်လႆႈၸဵပ်းၼႆႉ။ ယဝ်ႉၵေႃႈ ထၢမ်ပၼ်ၵႃႈယူတ်းယႃ တီႈၵူၼ်းဢၼ်ၾၢႆႇၸဵပ်းၼႆႉ ယူႇတီႈ ၵူၼ်းၾၢႆႇ မၢတ်ႇၸဵပ်းၼႆႉ လၢတ်ႈဝႃႈ တင်းမူတ်းသဵင်ႈ 25 သႅၼ်ၼႆသေ ယူႇတီႈ သိုၵ်းလွႆၶဝ် ဢူၼ်းငိုၼ်းပၼ်မႃး တင်း K-Pay ငိုၼ်း 25 သႅၼ်ပျႃးၶႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ မိူဝ်ႈဝၼ်းတီႈ 21/2/2024 ယၢမ်းၵၢင်ဝၼ်း 12 မူင်းၶိုင်ႈ ၽူႈၸၢႆးသွင်ၵေႃႉ သွၼ်ရူတ်ႉ ၶိူင်ႈမႃးၸွမ်း ၵၼ်လမ်းၼိုင်ႈသေ ထုၵ်ႇၵႃးသိုၵ်း TNLA ၽႃႇသႂ်ႇ တီႈႁိမ်းပႃႇႁဵဝ်ႈ တၢင်းၶဝ်ႈဢွၵ်ႇဝဵင်းၼမ်ႉတူႈ တႃႇၵေႃႉၼိုင်ႈ လႆႈတိူဝ်ႉမၢတ်ႇၸဵပ်း ထိုင်တီႈၶႃႁၵ်း ၼႆယဝ်ႉ။
ၵူၼ်းၼမ်ႉတူႈ သွင်ၵေႃႉ ဢၼ်ထုၵ်ႇၵႃးၽႃႇသႂ်ႇၼၼ်ႉ ပဵၼ်ၽူႈၸၢႆးတင်းသွင် တေမီးဢႃယု 40 ပၢႆ ၵေႃႉ ၶႃႁၵ်း ၼၼ်ႉ ပဵၼ်ၵူၼ်းပွၵ်ႉ 12 ဝဵင်းၼမ်ႉတူႈ။ ယဝ်ႉၵေႃႈ မၼ်းၸၢႆး ပဵၼ်ၵူၼ်းႁေႃႈၵႃး တၢင်ႇၵုၼ်ႇၵႂႃႇ မႃး ၼမ်ႉတူႈ – လႃႈသဵဝ်ႈ – မူႇၸေႊ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ