ဝၢႆးသိုၵ်းမၢၼ်ႈ ပိုၼ်ၽၢဝ်ႇ ဢွၵ်ႇပၵ်းပိူင်မၢႆမီႈၵဵပ်းသိုၵ်းယဝ်ႉ ၵူၼ်းမိူင်း ၼႂ်းဝဵင်းတႃႈၶီႈလဵၵ်း ၺႃးတီႉၺွပ်းၵႂႃႇ ဢမ်ႇယွမ်း 10 ယဝ်ႉ ယွၼ်ႉဢမ်ႇမီးမၢႆၾၢင် (မၢတ်ႉပူင်ႇတိၼ်ႇ) ဝႃႈၼႆ။
တႄႇဢဝ် လိူၼ်ၾႅပ်ႊပိဝ်ႊရီႊ 2024 ၼႆႉ ယူႇတီႈ ပလိၵ်ႈမၢၼ်ႈလႄႈ သိုၵ်းမၢၼ်ႈ ယိုတ်းမိူင်း ႁူမ်ႈၵၼ် လူင်းၵူတ်ႇထတ်း ၵူၼ်းပိုၼ်ႉတီႈ ၼႄၶေႃႈဢၢင်ႈဝႃႈ ၵူတ်ႇထတ်းသဵၼ်ႈမၢႆႁူဝ်ၵူၼ်း (ဝႂ်မုင်ႉႁေႃႁိူၼ်း) လႄႈ တႃႇၽဵဝ်ႈလၢင်ႉၵူၼ်းလႅၼ်ၼိူဝ် ဢွၼ်ႊလၢႆႊၼႆသေ ၶဝ်ႈတီႉၺွပ်းၵူၼ်းမိူင်း ၼႂ်းပွၵ်ႉပႃႇလႅင် (1) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ် တႆး – ထႆး ဢမ်ႇယွမ်း 10 ၵေႃႉယဝ်ႉ ဝႃႈၼႆ။
ၵူၼ်းတႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းယူႇႁိမ်း ပၢင်မၢၵ်ႇၼင် ၾၢႆႇလင်ၵၢတ်ႇဢႃးၶႃႇၼႆႉ ၺႃး တီႉၵႂႃႇ 9 ၵေႃႉ။ တီႈႁိမ်းႁၢၼ်ႉၶၢႆၾူၼ်းဢူးတီႇ (ဉီးတီ) ၼႂ်းပွၵ်ႉပႃႇလႅင် (1) ၼႆႉၵေႃႈ ၺႃးတီႉၵႂႃႇ 4 ၵေႃႉ။ ယဝ်ႉၵေႃႈ ၼႂ်း ပွၵ်ႉပႃႇလႅင်ၼႆႉၵူၺ်း ၶဝ်မႃးၸႅတ်ႈသဵၼ်ႈမၢႆၶႅၵ်ႇ ထႅင်ႈႁိူၼ်းယေးလင်ၼိုင်ႈသေ တီႉၵႂႃႇထႅင်ႈ 3 ၵေႃႉ။ ၼႂ်းၼၼ်ႉ တႃႇ ၵေႃႉၼိုင်ႈ တၼ်းပၢႆႈလွတ်ႈဢေႃႈ။ ယွၼ်ႉယူႇၸမ်ႁဝ်းလႄႈ လႆႈႁူႉၸွမ်းၼင်ႇၼႆ။ တၢင်ႇပွၵ်ႉ တၢင်ႇဝၢၼ်ႈၵေႃႈ တေလႅပ်ႈ ၺႃးတီႉၵႂႃႇတင်းၼမ်ယူႇ”- ဝႃႈၼႆ။
ၵမ်ႈၼမ် ၵူၼ်းမိူင်း ဢၼ်ထုၵ်ႇသိုၵ်းမၢၼ်ႈတီႉၺွပ်းၵႂႃႇၼၼ်ႉ ပဵၼ်ၵူၼ်းၸိူဝ်းဢမ်ႇၼႄလႆႈမၢႆၾၢင် (မၢတ်ႉပူင်ႇတိၼ်ႇ) ယဝ်ႉၵေႃႈ ပဵၼ်ၵူၼ်းႁိူၼ်းလဵဝ်ၵၼ်သေတႃႉ ပေႃးဢမ်ႇပႃးသဵၼ်ႈၸိုဝ်ႈၼႂ်းဝႂ်မုင်ႉႁေႃႁိူၼ်းၵေႃႈ ၺႃးတီႉမိူၼ်ၵၼ်။
ၽူႈယိင်း ဢႃယု 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸိူဝ်းၺႃးတီႉၺွပ်းၼႆႉ ၵမ်ႈၼမ်ပဵၼ်ၵူၼ်း ၸိူဝ်းဢမ်ႇမီး မၢတ်ႉပူင်ႇတိၼ်ႇ။ ယဝ်ႉၵေႃႈ ၵူၼ်းဢၼ်ဢမ်ႇပႃး ၼႂ်းသဵၼ်ႈမၢႆမုင်ႉႁေႃႁိူၼ်း ၸိူဝ်းၼၼ်ႉဢေႃႈ။ ၸိူဝ်းမီးပီႈၼွင်ႉတႄႉ ၼႅတ်ႈၵႂႃႇထုတ်ႇဢွၵ်ႇမႃး ၵမ်းလဵဝ်ၵေႃႈမီး။ ၸိူဝ်းဢမ်ႇမီးတႄႉ ၶဝ်ဢဝ်ၵႂႃႇၶင်ဝႆႉတီႈလႂ်တႄႉ ဢမ်ႇႁူႉၶႃႈ”- ဝႃႈၼႆ။
ၵူၼ်းၸိူဝ်း မီးပီႈၼွင်ႉသေ ၺႃးတီႉၺွပ်းၵႂႃႇၼၼ်ႉ ပေႃးမီးငိုၼ်းၵႂႃႇထုတ်ႇဢဝ်ၵမ်းသိုဝ်ႈၸိုင် သိုၵ်းမၢၼ်ႈၼၼ်ႉ ပွႆႇပၼ် တူဝ် ၵမ်းလဵဝ်။ ၼိုင်ႈၵေႃႉလႂ် လႆႈပၼ် 2,000 ဝၢတ်ႇထိုင် 3,000 ဝၢတ်ႇ။ ပေႃးတီႉၺွပ်းၵႂႃႇ လၢႆဝၼ်းသေ ၸင်ႇၵႂႃႇ ထုတ်ႇဢွၵ်ႇမႃးၸိုင် သိုၵ်းမၢၼ်ႈၶဝ် တေယွၼ်းငိုၼ်းၼမ် ယဝ်ႉၵေႃႈ တေဢမ်ႇပွႆႇတူဝ်ဢွၵ်ႇမႃးငၢႆႈ ဝႃႈၼႆ။
ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်းလႅၼ်လိၼ် ယဝ်ႉၵေႃႈ ပဵၼ်ဝဵင်းၵႃႉၶၢႆပၢႆးမၢၵ်ႈမီးၵေႃႈၸႂ်ႈ ၵွပ်ႈၼႆလႄႈ ၵူၼ်း မိူင်းမၢၼ်ႈ တၢင်းထုင်ႉပဵင်း ၸိူဝ်းၼၼ်ႉ မႃးယူႇသဝ်း ႁႃႁဵတ်းၵၢၼ်လဵင်ႉတွင်ႉၼမ်။ လိူဝ်ၼၼ်ႉ ၵူၼ်းၼုမ်ႇတၢင်ႇတီႈသီႇ လႅၼ် မႃးႁဵတ်းၵၢၼ်ဢွၼ်ႊလၢႆႊၵေႃႈၼမ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ