ၵူၼ်းမၢတ်ႇမၢၵ်ႇၵွင်ႈတီႈပၢင်တိုၵ်း တပ်ႉသိုၵ်းတဢၢင်းၶဝ်ႈယိုဝ်းႁူင်းCasino တေႃႇလွင်း တီႈမူႇၸေႈၼၼ်ႉ တၢႆတီႈႁူင်းယႃမိူင်းၶွၼ်ထႅင်ႈၵေႃႉၼိုင်ႈလႄႈ ယၢမ်းလဵဝ်မီးၵူၼ်းတၢႆယွၼ်ႉပၢင်တိုၵ်းၼၼ်ႉ 21 ယဝ်ႉ။
ၵေႃႉဢၼ်လုတၢႆတီႈႁူင်းယႃမိူင်းၶွၼ် မိူဝ်ႈဝၼ်းထိ 16 ၼၼ်ႉ ၸိုဝ်ႈႁွင်ႉဝႃႈ ၸၢႆးယီႈလႅင်ႇ။ ပဵၼ်ၵူၼ်းၼမ်ႉၶမ်း။
ဝၼ်းပဵၼ်ပၢင်တိုၵ်းၼၼ်ႉ ၸၢႆးယီႈလႅင်ႇလႄႈမေးၼၢင်း ဢိၵ်ႇဢူၺ်းၵေႃႉမၼ်းၵေႃႉၼိုင်ႈ လုၵ်ႉမူႇၸေႈ တေမိူဝ်းၼမ်ႉၶမ်း ။ၺႃး သိုၵ်းတဢၢင်းယိုဝ်းၵၢင်တၢင်းဝႃႈၼႆ။
ၵူၼ်းႁူႉၸၵ်းၸၢႆးယီႈလႅင်ႇလၢတ်ဝႃႈ- “ၸၢႆးၶဝ်ၼႆႉပဵၼ်ၵူၼ်းပွၵ်ႉၼိူဝ် ၼမ်ႉၶမ်း။ မႃးႁဵတ်းၵၢၼ်တီႈမူႇၸေႈ။ ၼႂ်ၼၼ်ႉၶႃတေမိူဝ်းပွႆးပၢင်ၶႅၵ်ႇတီႈၼမ်ႉၶမ်းၶိုၼ်း။ မိူဝ်းၺႃးယိုဝ်းလႄႈ ဢူၺ်းၵေႃႉမၼ်းတၢႆထင်တီႈ ။ မေးၼၢင်းမၼ်းမၢတ်ႇၸဵပ်းတီႈႁူဝ်ၶဝ်ႇ။ တူဝ်ၸၢႆးယီႈလႅင်ႇသမ်ႉ မၢၵ်ႇၵွင်ႈတိူဝ်ႉတီႈၶေႃးလႄႈ တီႈဢႅဝ်။ ၵႂႃႇဢဝ်ဢွၵ်ႇတီႈႁူင်းယႃမိူင်းၶွၼ်။ မိူဝ်ႈသိုၼ်းၼၼ်ႉပေႃးထွၼ်ဢွၵ်ႊသီႊၵျိၼ်ႊၵေႃႈ တၢႆၵႂႃႇႁေယဝ်ႉယိုင်”- ဝႃႈၼႆ။
မိူဝ်ႈဝႃး လုၵ်ႈလၢင်းၼၢင်းမေး ဢဝ်တူဝ်တၢႆမႃးၼမ်ႉၶမ်းသေ တေလုမ်းလႃးသၢင်းၵဵဝ်ႇပၼ်ဝႃႈၼႆ။
ဝၼ်းထိ 12 လိူၼ်မေႊၼၼ်ႉ သိုၵ်းတဢၢင်း TNLA ၶဝ်ႈယိုဝ်းႁူင်းတေႃႇလွင်း ဢၼ်မီးတီႈ ႁူဝ်ၶူဝ်ၼမ်ႉပေႃႉ၊ ယိုဝ်းပႃး တႃႈႁိူဝ်း ၼွင်ယၢင်းဢၼ်တေၶၢမ်ႈၼမ်ႉမၢဝ်းလႄႈယိုဝ်းပႃးတီႈ ၸေႈလၢၼ်ႉ ။ လႆႈပဵၼ်ပၢင်တိုၵ်းၵၼ်တင်း ပီႇတုၸိတ်ႉမဵဝ်ႉမ ၊ ပီႇတုၸိတ်ႉပၢၼ်းသေးလႄႈပလိၵ်ႈႁူမ်ႈၵၼ်။ ႁဵတ်းႁႂ်ႈၵူၼ်းမိူင်း မၢတ်ႇၸဵပ်း 27 ပၢႆ လုတၢႆ 19 ထင်တီႈ။ ၵူၼ်းမၢတ်ႇၸဵပ်းၼၼ်ႉသူင်ႇယူတ်းယႃတူဝ်တီႈႁူင်းယႃလၢႆလၢႆတီႈ။ ဢၼ်သူင်ႇၵႂႃႇယႃတူဝ်တီႈဝဵင်းလိူဝ်ႇၼၼ်ႉ ၵႂႃႇတၢႆတီႈ ပၢင်ႇဢူႈလူင် ၵေႃႉၼိုင်ႈ လႄႈ တၢႆတီႈမိူင်းၶွၼ် ၵေႃႉၼိုင်ႈ ။ ၵူၼ်းတၢႆမီး 21 ၵေႃႉ။ ၼႂ်း 21 ၵေႃႉၼႆႉပႃးၵူၼ်းမိူင်းၶႄႇ သၢမ်ၵေႃႉ။
