ၶၢဝ်းတၢင်းသွင်လိူၼ် ထပ်းၵၼ်မႃးၼႆႉ ၵူၼ်းမူႇၸေႊ ယဵပ်ႇၺႃးမၢၵ်ႇမႅင်းၾင်လိၼ်/ မၢၵ်ႇႁၢင်ႈၵၢင် တႅၵ်ႇသႂ်ႇ ဢမ်ႇယွမ်း 10 ၵေႃႉယဝ်ႉ။
ဝၼ်းတီႈ 22/2/2024 ယၢမ်းဝၢႆးဝၼ်း 3 မူင်း ၼၢႆးမႆၶမ်းၺုၼ်ႉ ဢႃယု 67 ပီ ၵူၼ်းဝၢၼ်ႈပွၵ်ႉၸၢၼ်း ၵႂႃႇႁႃၶႅမ် ယူးပတ်း (သႅမ်ယူးပတ်း) တၢင်းမၢၼ်ႈမႂ်ႇ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ယဵပ်ႇၺႃးမၢၵ်ႇမႅင်းၾင် လိၼ်သေ တႅၵ်ႇတိူဝ်ႉသႂ်ႇမၼ်းၼၢင်း လႆႈမၢတ်ႇၸဵပ်းႁၢဝ်ႈႁႅင်း ဝႃႈၼႆ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵူၼ်းပွၵ်ႉၸၢၼ်း ၵေႃႉၼိုင်ႈ ၵႂႃႇယဵပ်ႇၺႃးမၢၵ်ႇမႅင်း တီႈႁိမ်းမၢၼ်ႈမႂ်ႇသေ တႅၵ်ႇတိူဝ်ႉသႂ်ႇတီႈတိၼ်၊ တီႈပုမ်၊ ၸွမ်းၼႃႈ၊ ၶႅၼ်မိုဝ်း ၸိူဝ်းၼႆႉ လႆႈမၢတ်ႇၸဵပ်းႁၢဝ်ႈႁႅင်း ၼႆၶႃႈဢေႃႈ။ လႆႈငိၼ်းဝႃႈ တေလႆႈတႅပ်းပႅတ်ႈတိၼ်ၼႆၶႃႈဝႃႇ”- ဝႃႈၼႆ။
ယၢမ်းလဵဝ် ၼၢႆးမႆၶမ်းၺုၼ်ႉ ဢႃယု 67 ပီၼႆႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃပႃႇႁူဝ်ႇ ဝဵင်းမူႇၸေႊ (ဗဟိုဆေးရုံ) ယဝ်ႉ ဝႃႈၼႆ။
“မိူဝ်ႈၶဝ် တေၵႂႃႇဢဝ်သႅမ်ယူးပတ်းၼၼ်ႉ ၶဝ်ထၢမ်သိုၵ်းမၢၼ်ႈ ၸိူဝ်းပႂ်ႉဝႆႉ ၸွမ်းႁိမ်းႁွမ်းၼၼ်ႉယူႇ ႁူၺ်ႈၸိူဝ်းၼႆႉ ၸွင်ႇမီး မၢၵ်ႇမႅင်း။ သိုၵ်းမၢၼ်ႈဝႃႈ ဢမ်ႇမီးၼႆလႄႈ ၸင်ႇၶဝ်ႈၵႂႃႇႁႃသႅမ်သေ ယဵပ်ႇၺႃးမၢၵ်ႇမႅင်းတႅၵ်ႇသႂ်ႇ ၼၢႆးမႆၶမ်းၺုၼ်ႉ။ မၼ်း ၼၢင်းသဵၼ်တူၵ်းၵႂႃႇထိုင်ၵူၼ်ႈႁူၺ်ႈပုၼ်ႉဢေႃႈ။ မိူဝ်ႈၽွင်း ၵႂႃႇဢဝ်တူဝ်ဢွၵ်ႇမႃးၼၼ်ႉ လႆႈဢဝ်ဢွၵ်ႇမႃး ယၢပ်ႇယၢပ်ႇ ယဵၼ်းယဵၼ်းၼႆၶႃႈဢေႃႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼင်ႇၼႆ။
ဢိင်ၼိူဝ် လွင်ႈမၢၵ်ႇမႅင်းၾင်လိၼ် တႅၵ်ႇတိူဝ်ႉသႂ်ႇၼႆႉ ပဵၼ်မၢၵ်ႇၸုမ်းလႂ် မႃးႁင်ႈၵၢင်ဝႆႉတႄႉ ပႆႇႁူႉ ဝႃႈၼႆ။
ၼႂ်းလိူၼ်ၾႅပ်ႊပိဝ်ႊရီႊ 2024 ၼႆႉၵူၺ်း ၵူၼ်းမူႇၸေႊ ယဵပ်ႇၺႃးမၢၵ်ႇမႅင်း တႅၵ်ႇတိူဝ်ႉသႂ်ႇ 3 ၵေႃႉယဝ်ႉ မိူၼ်ၼင်ႇ – လုင်းၸၢႆး မွင်ႇ ဢႃယု 63 ပီ ၵူၼ်းဝၢၼ်ႈပၢင်ႇၶမ်း၊ ၵူၼ်းဝၢၼ်ႈၸၢၼ်းသႃႇ ဢိူင်ႇတိုင်းလူင် ထႅင်ႈၵေႃႉၼိုင်ႈလႄႈ ၼၢႆးမႆၶမ်းၺုၼ်ႉ ဢႃ ယု 67 ပီၼႆႉ ဝႃႈၼႆ။
ၶၢဝ်းတၢင်းသွင်လိူၼ်မႃးၼႆႉ ၵူၼ်းမူႇၸေႊ ယဵပ်ႇၺႃးမၢၵ်ႇမႅင်ၾင်လိၼ်/ မၢၵ်ႇႁၢင်ႈၵၢင် တႅၵ်ႇတိူဝ်ႉသႂ်ႇ လႆႈမၢတ်ႇၸဵပ်းႁၢဝ်ႈ ႁႅင်းၼႆႉ မီးၵႂႃႇ 10 ၵေႃႉယဝ်ႉ။ ၼႂ်းၼၼ်ႉ ၽူႈၸၢႆး 8 ၵေႃႉ၊ ယိင်း 2 ၵေႃႉလႄႈ ၵႂၢႆးလူႉတၢႆၸွမ်း 1 တူဝ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ