မိူဝ်ႈၼႆႉ ဝၼ်းတီႈ 23/2/2024 ယၢမ်းဝၢႆးဝၼ်းမွၵ်ႈ 4 မူင်း သဵင်ၵွင်ႈတႅၵ်ႇ ၼႂ်းဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ႁဵတ်းႁႂ်ႈၵူၼ်းမိူင်းဢွၼ်ၵၼ်တူၵ်းၸႂ် တိုၼ်ႇသၢၼ်ႈလႄႈ ၵူဝ်ပဵၼ်ပၢင် တိုၵ်းယႂ်ႇ။
ၵူၼ်းပိုၼ်ႉတီႈ ဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သဵင်ၵွင်ႈတႅၵ်ႇ မွၵ်ႈ 15 ၵမ်းၼႆႉ ဢမ်ႇႁူႉဝႃႈ ပဵၼ်ၸုမ်း လႂ်ယိုဝ်း ႁဝ်းၶႃႈ ဢမ်ႇႁတ်းဢွၵ်ႇတူၺ်းၵၼ် ၵူဝ်ၶႃႈဢေႃႈ။ သဵင်ၵွင်ႈတႅၵ်ႇၼႆႉ လႆႈငိၼ်းမႃးတၢင်းပွၵ်ႉ 4 ၼၼ်ႉၶႃႈ။ ပေႃးဝႃႈ လႆႈငိၼ်းသဵင်ၵွင်ႈတႅၵ်ႇယဝ်ႉၼႆၵေႃႈ ႁဝ်းၶႃႈၼႆႉ ဢွၼ်ၵၼ်တူၵ်းၸႂ်တိုၼ်ႇသၢၼ်ႈၵၼ်မူတ်းၶႃႈယဝ်ႉ မႆႈၸႂ် ၵူဝ်ပဵၼ်ပၢင်တိုၵ်း ၼၼ်ႉၶႃႈဢေႃႈ”- ဝႃႈၼႆ။
ဝၢႆးသဵင်ၵွင်ႈတႅၵ်ႇယဝ်ႉ မိူၼ်ၼင်ႇ ႁၢၼ်ႉၶၢႆၶူဝ်းၵုၼ်ႇယွႆႈ ၶွင်ၵိၼ်ယႅမ်ႉ ၸွမ်းၶၢင်ႈတၢင်း ၸိူဝ်းၼႆႉၵေႃႈ ဢွၼ်ၵၼ်ပိၵ်ႉဢိုတ်း ယဵၼ်သီႇမူတ်း ဝႃႈၼႆ။
ၵူၼ်းၼုမ်ႇ ဢွၼ်ႇယိင်း ဢႃယု 20 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းသဵင်ၵွင်ႈဢွၼ်ႇၵူၺ်းၶႃႈ ဢၼ်တႅၵ်ႇ တႄႉ သဵင်မၢၵ်ႇလူင်ၸိူင်ႉၼၼ်တႄႉ ဢမ်ႇလႆႈငိၼ်းၶႃႈ။ ၵူၺ်းၵႃႈ ပဵၼ်ၸုမ်းလႂ်ယိုဝ်းတႄႉ ဢမ်ႇလႆႈႁူႉ။ ဝၢႆးသဵင်ၵွင်ႈတႅၵ်ႇယဝ်ႉ ၼၼ်ႉ ႁၢၼ်ႉၶၢႆၶူဝ်းၵုၼ်ႇယွႆႉ ၶွင်ၵိၼ်ယႅမ်ႉ ၸိူဝ်းၼႆႉၵေႃႈ ပိၵ်ႉမူတ်းၶႃႈ။ ယၢမ်းလဵဝ် ၼႂ်းဝဵင်းမိူင်းသူႈၼႆႉ ယဵၼ်သီႇမူတ်းၶႃႈ ဢေႃႈ”- ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းမိူင်းသူႈၼႆႉ မီးဝႆႉ ၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉသမ်ႉ မိူၼ်ၼင်ႇ သိုၵ်းမၢၼ်ႈ ယိုတ်းမိူင်းလႄႈ ပႃႇတီႇမႂ်ႇသုင်ၸိုင်ႈတႆး SSPP ၸိူဝ်းၼႆႉ။
