လူင်ပွင်ၸိုင်ႈ မိူင်းၶႄႇ ပိုၼ်ၽၢဝ်ႇႁႃတူဝ် ႁူဝ်ၼႃႈယႂ်ႇ ၸုမ်းၵျႃးၽႅၼ်ႉ 2 ၵေႃႉ သင်ၽူႈလႂ် ၽႂ်ထူပ်းႁၼ် ၸႅင်ႇၶၢဝ်ႇပၼ် ၸိုင် တေမီးငိုၼ်းသူးတွၼ်ႈပၼ် 1 သႅၼ်ယႂၼ်ႊ ထိုင် 5 သႅၼ်ယႂၼ်ႊ။
ပူၼ်ႉမႃး မိူဝ်ႈဝၼ်းတီႈ 5/2/2024 ၸဝ်ႈၼႃႈတီႈၶႄႇလႄႈ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ ႁူမ်ႈၵၼ် ဢဵၼ်ႁႅင်း ရူတ်ႉ ၵႃး မွၵ်ႈ 5 လမ်း ၸွမ်းသွၵ်ႈႁႃတီႉၺွပ်း ႁူဝ်ၼႃႈယႂ်ႇ ၸုမ်းၵျႃးၽႅၼ်ႉ 2 ၵေႃႉ ဢၼ်ႁွင်ႉၸိုဝ်ႈဝႃႈ – Chen Yanban လႄႈ Sheng Yankui ထိုင်တၢတ်ႇႁၢႆးပႃ ၼႂ်းၸႄႈဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸိူဝ်းၼႆႉ။
ၵူၼ်းပိုၼ်ႉတီႈ မိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်သိုၵ်းၶႄႇႁႃႉ သိုၵ်းဝႃႉႁႃႉ ဢမ်ႇႁူႉ ၶဝ်ၶီႇၵႃးမႃး မွၵ်ႈ 4-5 လမ်းၼႆႉ မႃးၸွမ်းႁႃ ႁူဝ်ၼႃႈယႂ်ႇ ၸုမ်းၵျႃးၽႅၼ်ႉ 2 ၵေႃႉၼႆၶႃႈဝႃႇ တၢင်းတၢတ်ႇႁၢႆးပႃ မိူင်းသူႈၼႆႉၶႃႈဢေႃႈ ၵူၼ်းဢၼ်ၶဝ် မႃးသွၵ်ႈႁႃၼၼ်ႉ ၸွင်ႇတီႉၺွပ်းလႆႈ ဢမ်ႇတီႉၺွပ်းလႆႈတႄႉ ဢမ်ႇႁူႉၶႃႈ”- ဝႃႈၼႆ။
ဢိင်ၼိူဝ် လွင်ႈႁူဝ်ၼႃႈယႂ်ႇ ၸုမ်းၵျႃးၽႅၼ်ႉ 2 ၵေႃႉၼႆႉသေ ယူႇတီႈ ၸဝ်ႈၼႃႈတီႈၶႄႇၶဝ် ဢွၵ်ႇလိၵ်ႈပိုၼ်ၽၢဝ်ႇ ႁႃတူဝ်မႃး မိူဝ်ႈဝၼ်းတီႈ 25/1/2024 ၼၼ်ႉသေ သင်ၽူႈလႂ် ၽႂ်ထူပ်းႁၼ်ၸိုင် ႁႂ်ႈၸႅင်ႈၸူးၸဝ်ႈၼႃႈတီႈၶႄႇ ၵမ်ႈလဵဝ် ယဝ်ႉၵေႃႈ တေမီးငိုၼ်းသူးပၼ်ပႃး တီႈၵူၼ်းၸႅင်ႈၶၢဝ်ႇၸူး ဝႃႈၼႆ။
သိုဝ်ႇၶၢဝ်ႇ Kit Thit Media ဢွၵ်ႇဝႆႉဝႃႈ – မိူဝ်ႈဝၼ်းတီႈ 5/2/2024 ယၢမ်းၵၢင်ၼႂ် သိုၵ်းဝႃႉ UWSA တီႉၺွပ်းလႆႈ ၸုမ်း ၵျႃးၽႅၼ်ႉ ၼႂ်းၼႃႈတီႈၽွင်းငမ်းတူဝ်ၵဝ်ႇ တပ်ႉသိုၵ်းဝႃႉ ၵုမ်းၵမ်ၼၼ်ႉသေ မွပ်ႈဢၢပ်ႈပၼ် လူင်ပွင်ၸိုင်ႈၶႄႇ 24 ၵေႃႉ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 30/1/2024 ၼၼ်ႉၵေႃႈ တၢမ်တူဝ် ၸဝ်ႈၼႃႈတီႈၶႄႇ မႃးႁပ်ႉဢဝ် ၸုမ်းၵျႃးၽႅၼ်ႉ 10 ၵေႃႉ တီႈဝၢင်းၶိူင်ႈမိၼ် ၼေႇပျီႇတေႃႇ ၵႂႃႇမိူင်းၶႄႇ ၸွမ်းၼင်ႇ သိုၵ်းမၢၼ်ႈ တီႉၺွပ်းၵုမ်းဝႆႉ ၼႂ်းၼၼ်ႉ ပႃးၽူႈမီးၸၼ်ႉ ၼႂ်းပျီႇတူႉၸိတ်ႉၵဝ်ႈၵၢင်ႉ(ၵဝ်ႇ) လႄႈ လၢဝ်းပၢၼ်းၶႄႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ