Wednesday, April 24, 2024

ၵူၼ်းၼမ်ႉတူႈ သွင်ၵေႃႉ ထုၵ်ႇၵႃးၽႃႇ ထိုင်တီႈၶႃႁၵ်း ၵေႃႉၼိုင်ႈ

Must read

ၵူၼ်းၼမ်ႉတူႈ သွင်ၵေႃႉ ထုၵ်ႇၵႃးၽႃႇသႂ်ႇ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ယၢမ်းလဵဝ် လႆႈသူင်ႇယူတ်းယႃတူဝ် ဝႆႉတီႈႁူင်းယႃယဝ်ႉ ဝႃႈၼႆ။

ဝၼ်းတီႈ 21/2/2024 ယၢမ်းၵၢင်ဝၼ်း 12 မူင်းၶိုင်ႈ ၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်လမ်းၼိုင်ႈသေ ထုၵ်ႇၵႃးၽႃႇသႂ်ႇ တီႈႁိမ်းပႃႇႁဵဝ်ႈ တၢင်းၶဝ်ႈဢွၵ်ႇဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ တႃႇၵေႃႉၼိုင်ႈ လႆႈတိူဝ်ႉမၢတ်ႇၸဵပ်း ထိုင်တီႈၶႃႁၵ်း ၼႆယဝ်ႉ။

- Subscription -
ၵူၼ်းၼမ်ႉတူႈ ထုၵ်ႇၵႃးၽႃႇ ၶႃႈႁၢၵ်း
Photo by – ၵူၼ်းပိုၼ်ႉတီႈ/ ၵေႃႉထုၵ်ႇၵႃးၽႃႇ ထိုင်တီႈလႆႈတိူဝ်ႉမၢတ်ႇၸဵပ်း ၶႃႁၢၵ်း

ၵူၼ်းပိုၼ်ႉတီႈ ၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတၢင်းမၼ်း ပဵၼ်ၼႆ ၵူၼ်းမိူင်းသွင်ၵေႃႉၼႆႉ သွၼ်ႉရူတ်ႉၶိူင်ႈ မႃးၸွမ်းၵၼ် ၽွင်းၵႂႃႇမႄးၶိူင်ႈၵႃး (ၶလွင်ႊ) တီႈၼႂ်းဝဵင်းၼမ်ႉတူႈၼႆႉသေ ဢွၵ်ႇၵႂႃႇၸူးတီႈၵႃးၶဝ် ဢၼ်ၵွႆဝႆႉ တီႈမိူင်းမေႃႇၼၼ်ႉ။ ၽိူဝ်ႇထိုင်တီႈပွတ်းတၢင်း မီးၵႃးလမ်းၼိုင်ႈ မႃးၽႃႇသႂ်ႇ ၶဝ်သွင်ၵေႃႉ။ ၵႃးလမ်းၼၼ်ႉ ပဵၼ်ၵႃးသိုၵ်း TNLA ယဝ်ႉၵေႃႈ ႁေႃႈမႃးဢမ်ႇမႅၼ်ႈၾၢႆႇမၼ်း ႁေႃႈမႃးဝႆးသေ မႃးၽႃႇသႂ်ႇၶဝ် ၵေႃႉႁေႃႈရူတ်ႉၶိူင်ႈၼၼ်ႉ သဵၼ်ၵႂႃႇ ၵႆဝႃႈၵႆယဝ်ႉ။ ၵေႃႉသွၼ်ႉတင်းလင်တႄႉ လႆႈတိူဝ်ႉမၢတ်ႇၸဵပ်းႁႅင်း ယွၼ်ႉၺႃးႁူဝ်ၵႃး ၽႃႇသႂ်ႇၵမ်းသိုဝ်ႈလႄႈ ထိုင်တီႈ ၶႃပေႃးႁၵ်းဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၸူး ၽူႈၶၢၼ်ပၢၵ်ႇ သိုၵ်း TNLA ၵေႃႈ ဢမ်ႇလႆႈ။

ၽူႈႁူႉႁၼ်ၸွမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းတဢၢင်း 2 ၵေႃႉၼႆႉ ဢၢၼ်းဢဝ်ၵူၼ်းမိူင်း ဢၼ်မၢတ်ႇ ၸဵပ်း ၶႃႁၵ်းဝႆႉၼၼ်ႉ ၵႂႃႇတီႈတပ်ႉပၢင်သဝ်းၶဝ် ၵူၺ်းၵႃႈ ၵူၼ်းၵေႃႉၶႃႁၵ်းၼၼ်ႉ ဢမ်ႇၽွမ်ႉလႄႈ ထူဝ်းႁႃပီႈၼွင်ႉမၼ်းမႃး ႁပ်ႉဢဝ်ၵႂႃႇႁူင်းယႃ။ ထိုင်မႃးဝၼ်းတီႈ 22 ၼႆႉ လႆႈၶဝ်ႈႁွင်ႈၽႃႇတတ်းယဝ်ႉ။ ၸဝ်ႈရူတ်ႉၶိူင်ႈတႄႉ လႆႈတိူဝ်ႉမၢတ်ႇၸဵပ်း တီႈဢႅဝ်။ တုၵ်းယွၼ်း ႁႂ်ႈၶဝ်မႃးသၢႆႈတႅၼ်း ပၼ်ၵႃႈယူတ်းယႃဢေႃႈ ႁဵတ်းၼႆသေ ယဝ်ႉၵႂႃႇတႄႉ ဢမ်ႇ ၶႂ်ႈႁႂ်ႈမၼ်းပဵၼ်ၶႃႈ”- ဝႃႈၼႆ။

ၵူၼ်းၼမ်ႉတူႈ သွင်ၵေႃႉ ဢၼ်ထုၵ်ႇၵႃးၽႃႇသႂ်ႇၼၼ်ႉ ပဵၼ်ၽူႈၸၢႆးတင်းသွင် တေမီးဢႃယု 40 ပၢႆ ၵေႃႉၶႃႁၵ်း ၼၼ်ႉ ပဵၼ်ၵူၼ်းပွၵ်ႉ 12 ဝဵင်းၼမ်ႉတူႈ။ ယဝ်ႉၵေႃႈ မၼ်းၸၢႆး ပဵၼ်ၵူၼ်းႁေႃႈၵႃးတၢင်ႇၵုၼ်ႇ ၵႂႃႇမႃး ၼမ်ႉတူႈ – လႃႈသဵဝ်ႈ – မူႇၸေႊ ၸိူဝ်းၼႆႉ။  

ၶၢဝ်းတၢင်း ၽႅၼ်ၵၢၼ်ယၼ်ႇသိုၵ်း 1027 ၼႆႉမႃး ယူႇတီႈ တပ်ႉသိုၵ်းတဢၢင်း TNLA ၵုမ်းလႆႈဝႆႉ တင်းမူတ်း 7 ဝဵင်း မိူၼ်ၼင်ႇ – ဝဵင်းၼမ်ႉသၼ်ႇ၊ မၢၼ်ႈတူင်ႈ၊ ၼမ်ႉတူႈ၊ မိူင်းငေႃႉ၊ မိူင်းလူင်၊ ၼမ်ႉၶမ်းလႄႈ ၵူတ်ႉၶၢႆ ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း