လူင်ပွင်ၸိုင်ႈမိူင်းဢိင်းၵလဵတ်ႈပိုၼ်ၽၢဝ်ႇဝႃႈ တႃႇၵႅတ်ႇၶႄႁႄႉၽေး မၢၵ်ႇမႅင်းၾင်လိၼ်ၼၼ်ႉ လူင်ပွင်ၸိုင်ႈမိူင်းဢိင်းၵလဵတ်ႈ တေၵမ်ႉၸွႆႈမိူင်းႁူမ်ႈတုမ်မၢၼ်ႈ တႃႇငိုၼ်း ဢမေႊရိၵၼ်ႊ 1 လၢၼ်ႉ တေႃႊလႃႊ ဝႃႈၼႆ။
ဝၼ်းတီႈ 20 လိူၼ်ၾႅပ်ႊပိဝ်ႊရီႊၼၼ်ႉ ၸွမ်ၽွင်းလူင်မိူင်းဢိင်းၵလဵတ်ႈလၢတ်ႈဝႃႈ – ၼႂ်းပီ 2022 ၼႆႉၵူၼ်းမိူင်းႁူမ်ႈတုမ် တၢႆယွၼ်ႉၽေးမၢၵ်ႇမႅင်းၾင်လိၼ်လႄႈ မၢၵ်ႇၵွင်ႈၸိုၼ်းယၢမ်းယွၼ်ႉပၢင်တိုၵ်းသိုၵ်းသိူဝ် ဢမ်ႇယွမ်း 500 ၵေႃႉ။ ၼႂ်းပီ 2022 ၼၼ်ႉ လုမ်ႈၾႃႉၼႆႉ မိူင်းမၢၼ်ႈပဵၼ်မိူင်းဢၼ်မီးၵူၼ်းမိူင်းလူႉတၢႆယွၼ်ႉၽေးမၢၵ်ႇမႅင်းၾင်လိၼ် ၼမ်သုတ်းထိ 5 ဝႃႈၼႆ။
ၸွမ်ၽွင်းလူင် မိူင်းဢိင်းၵလဵတ်ႈလၢတ်ႈဝႃႈ – ငိုၼ်းၵမ်ႉၸွႆႈၸိူဝ်းၼႆႉ ပိူင်လူင်တေၸႂ်ႉ တႃႇပၼ်ပိုၼ်ႉႁူႉၵူၼ်းမိူင်း ႁႂ်ႈလွတ်ႈၽေးမၢၵ်ႇမႅင်းၾင်လိၼ် ၼႂ်းပိုၼ်ႉတီႈဢၼ်မီးၽေးသိုၵ်းသိူဝ်ၼၼ်ႉ ပႃးဝႆႉၼင်ႇၼႆ။
ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး ၼႂ်းမိူင်းႁူမ်ႈတုမ်ပတ်းပိုၼ်ႉ မီးၸုမ်းယိပ်းၵွင်ႈၵၢင်ႇၼမ်မႃးၵူႈမိုဝ်ႉၵူႈဝၼ်း၊ ယွၼ်ႉပၢင်တိုၵ်းသိုၵ်းသိူဝ်သေ ၵူၼ်းမိူင်းဢၼ်ၺႃးၽေးမၢၵ်ႇမႅင်းၾင်လိၼ်သေမၢတ်ႇၸဵပ်းလူႉတၢႆမႃးၵူႈမိုဝ်ႉၵူႈဝၼ်း။ ၼႂ်းၼၼ်ႉ ၵူၼ်းမိူင်းၶျၢင်းလႄႈမိူင်းတႆး ထူပ်းၽေးမၢၵ်ႇမႅင်းႁၢႆႉၸႃႉလိူဝ်ပိူၼ်ႈ တီႈသိုဝ်ႇၶၢဝ်ႇ RFA ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ