ၾႆးမႆႈ သူၼ်ဢွႆႈ ၵူၼ်းမိူင်းၼမ်ႉၶမ်း လူႉသုမ်း ၼပ်ႉႁူဝ်သိပ်းဢေႊၶိူဝ်ႊ ယွၼ်ႉဢဝ်ၾႆးၸုတ်ႇႁူင်းၽိုင်ႈသေ ထုၵ်ႇၾႆးလၢမ်းမႆႈ ဝႃႈၼႆ။
ဝၼ်းတီႈ 18/2/2024 ယၢမ်းၵၢင်ဝၼ်းမွၵ်ႈ 11 မူင်း ၾႆႈမႆႈ သူၼ်ဢွႆႈ ၵူၼ်းဝၢၼ်ႈႁူဝ်သၢႆး ၼႂ်းၸႄႈဝဵင်းၼမ်ႉၶမ်း ၸႄႈ တွၼ်ႈမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇၾႆးမႆႈ လူႉသုမ်း ဢမ်ႇယွမ်း 10 ဢေႊၶိူဝ်ႊ ၸဝ်ႈသူၼ် ဢၼ် လႆႈလူႉသုမ်းၵႂႃႇ တင်းမူတ်း 4 ၵေႃႉ ၼႆယဝ်ႉ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ ပဵၼ်လုၵ်ႈၼွင်ႉၶဝ် ဢဝ်ၾႆးၸုတ်ႇႁူင်းၽိုင်ႈသေ ထုၵ်ႇ ၾႆးလၢမ်းမႆႈ သူၼ်ဢွႆႈ ၶွင်ၵူၼ်းဝၢၼ်ႈႁူဝ်သၢႆးၼႆၶႃႈ။ တင်းမူတ်း လူႉသုမ်း ဢမ်ႇယွမ်း 10 ဢေႊၶိူဝ်ႊ ၸဝ်ႈသူၼ် ဢၼ်လႆႈလူႉသုမ်းၵႂႃႇၼၼ်ႉ 1 ၵေႃႉလႂ် ဢမ်ႇယွမ်း 1 ဢေႊၶိူဝ်ႊၶႃႈ”- ဝႃႈၼႆ။
ၸဝ်ႈသူၼ်ဢွႆႈ ဢၼ်လႆႈလူႉသုမ်းၵႂႃႇၼၼ်ႉ တင်းမူတ်း 4 ၵေႃႉ။ ၼႂ်းၼၼ်ႉ ၸၢႆးၽူဝ်းမွင်ႇ လူႉသုမ်း 3 ဢေႊၶိူဝ်ႊ၊ ၼၢင်း မူၺ်ၶမ်း 4 ဢေႊၶိူဝ်ႊ၊ ၶိင်းဢၢႆႈၸၢႆးထီးသႅင် 3 ဢေႊၶိူဝ်ႊလႄႈ ၸၢႆးတိၼ်ႇဝုၼ်း 1 ဢေႊၶိူဝ်ႊ ၸိူဝ်းၼႆႉ။
