သိုၵ်းမၢၼ်ႈ တင်ႈၸႂ် ပွႆႇမၢၵ်ႇလူင် သႂ်ႇၼႂ်းဢိူင်ႇဝၢၼ်ႈယဵၼ်ႇ ၸႄႈဝဵင်းသီႇသႅင်ႇ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းမိူင်းတၢႆထင်တီႈ 2 ၵေႃႉ မၢတ်ႇၸဵပ်း 7 ၵေႃႉ။
ဝၼ်းတီႈ 17/2/2024 ယၢမ်းႁူဝ်ၶမ်ႈ သိုၵ်းမၢၼ်ႈ တပ်ႉၶမယ 425 လႄႈ 426 ႁူမ်ႈတင်း ပျီႇတူႉၸိတ်ႉပဢူဝ်း PNO ဢၼ်ပၵ်းတပ်ႉဝႆႉတီႈ ဝၢၼ်ႈယဵၼ်ႇၼၼ်ႉ ပွႆႇမၢၵ်ႇလူင် ၸူးတၢင်းဝၢၼ်ႈထမ်းယမ်း (ထမ်းယမ်းကျေးရွာ) လႄႈ ဝၢၼ်ႈထီႇတမ်ႇ (ထီ တမ်ကျေးရွာ) ၼႂ်းဢိူင်ႇဝၢၼ်ႈယဵၼ်ႇ ၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၸၢၵ်ႇမၢၵ်ႇတိူဝ်ႉသႂ်ႇ လုၵ်ႈဢွၼ်ႇ ဢႃယု 6 လိူၼ်လႄႈ ၽူႈၸၢႆး ၵေႃႉၼိုင်ႈ လူႉတၢႆထင်တီႈ။
ၵူၼ်းပိုၼ်ႉတီႈ ဝဵင်းသီႇသႅင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်မၢၵ်ႇသိုၵ်းမၢၼ်ႈ ယိုဝ်းမႃး တူၵ်းသႂ်ႇၼႂ်းဝၢၼ်ႈ ထမ်းယမ်း (ဝၢၼ်ႈၸၢဝ်းပဢူဝ်း) တိူဝ်ႉသႂ်ႇ လုၵ်ႈဢွၼ်ႇ ဢႃယု 6 လိူၼ် တၢႆၵေႃႉၼိုင်ႈယဝ်ႉၵေႃႈ ၽူႈၸၢႆး ၵေႃႉ ၼိုင်ႈ။ လိူဝ်ၼၼ်ႉ ၸၢၵ်ႇမၢၵ်ႇတိူဝ်ႉသႂ်ႇ ပေႃႈမႄႈလုၵ်ႈဢွၼ်ႇၼၼ်ႉ လႆႈတိူဝ်ႉမၢတ်ႇၸဵပ်းတင်းသွင်ၽူဝ်မေးၶႃႈ”- ဝႃႈ ၼႆ။
ယဝ်ႉၵေႃႈ မၢၵ်ႇလူင် သိုၵ်းမၢၼ်ႈၼႆႉၵူၺ်း တူၵ်းသႂ်ႇထႅင်ႈ တီႈဝၢၼ်ႈထီႇတမ်ႇ (ထီတမ်ကျေးရွာ) ၼၼ်ႉၵေႃႈ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းဝၢၼ်ႈ လႆႈမၢတ်ႇၸဵပ်းထႅင်ႈ 5 ၵေႃႉ။
ယွၼ်ႉပၢင်တိုၵ်း တီႈဝဵင်းသီႇသႅင်ႇၼႆႉသေ ၼႂ်းဝူင်ႈထီႉသွင် လိူၼ်ၾႅပ်ႊပိဝ်ႊရီႊ 2024 ၼႆႉ ၸုမ်းပျီႇတူႉၸိတ်ႉပဢူဝ်း PNO ပႂ်ႉၵူတ်ႇထတ်း ၵူၼ်းမိူင်းၵႂႃႇမႃးႁၢဝ်ႈႁႅင်း ၼႂ်းၵႄႈဝၢၼ်ႈလိၼ်လႅင် – ဝၢၼ်ႈမႆႉတိုင်းသုင် ၼႂ်းဢိူင်ႇၵုင်းသုတ်း။ သင်ပဵၼ်ၵူၼ်း ၸိူဝ်းယိပ်းမၢႆၾၢင် တၢင်းမိူင်းယၢင်းလႅင်ၸိုင် ၼိုင်ႈၶႅၼ်းတီႉမတ်ႉၸႅတ်ႈထၢမ် ပေႃႉထုပ်ႉႁၢဝ်ႈႁႅင်း ဝႃႈၼႆ။
“မိူဝ်ႈဝၼ်းတီႈ 4 ပူၼ်ႉမႃးၼႆႉ ၸုမ်းပျီႇတူႉၸိတ်ႉၼႆႉၵူၺ်း ၶႃႈႁႅမ်ၵူၼ်းမိူင်းၵေႃႉၼိုင်ႈ မတ်ႉဝႆႉ ၼႂ်းႁွင်ႈၼမ်ႉတမ် ၽၢၵ်ႇ တႂ်ႈၶူဝ်လူင် ထိုင်မႃး 10 ၼႆႉ ၸင်ႇထူပ်းႁၼ် တူဝ်တၢႆ ၵူၼ်းမိူင်းၽူႈၶိုၼ်ႈမႃးသေ ယူႇတီႈ ၵူၼ်းဝၢၼ်ႈၵုင်းသုတ်း လႆႈလူင်းတတ်း ပႅတ်ႈ ၸိူၵ်ႈဢၼ်မတ်ႉဝႆႉၼၼ်ႉ ယူႇတီႈ ၵူၼ်းဝၢၼ်ႈမၢၵ်ႇၵွၵ်ႇ လႆႈဢဝ်တူဝ်တၢႆ ၵႂႃႇၾင်ပၼ်ၶႃႈဢေႃႈ ”- ၵူၼ်းဝဵင်းသီႇသႅင်ႇ သိုပ်ႇလၢတ်ႈၼင်ႇၼႆ။
တႄႇဢဝ်ႁၢင်လိူၼ်ၵျႅၼ်ႊၼိဝ်ႊရီႊ 2024 ၼႆႉမႃး သိုၵ်းမၢၼ်ႈ ယိုတ်းမိူင်းလႄႈ ပျီႇတူႉၸိတ်ႉပဢူဝ်း PNO တင်း တပ်ႉသိုၵ်း ပူတ်းပွႆႇၸိူဝ်ႉၸၢတ်ႈပဢူဝ်း PNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၸႄႈဝဵင်းသီႇသႅင်ႇၼႆႉသေ မီးလွင်ႈပိုတ်းယိုဝ်း မၢၵ်ႇ လူင်ၵူႈဝၼ်းလႄႈ ႁဵတ်းႁႂ်ႈႁိူၼ်းယေးလူႉၵွႆသေဢမ်ႇၵႃး ၵၢတ်ႇလူင် ၸိူဝ်းၼႆႉၵေႃႈ ထုၵ်ႇၾႆးမႆႈပႃးထႅင်ႈတင်းၼမ်။
လိူဝ်ၼၼ်ႉ ၵူၼ်းမိူင်း ဢွၼ်ၵၼ်ပၢႆႈမူၵ်းၸွမ်းထဵင်ႁႆႈၼႃး မၢင်ၸိူဝ်း ဢမ်ႇၶၢမ်ႇလႆႈ ပၢႆႈၶဝ်ႈမိူင်းထႆးၵေႃႈ မီးၵူႈဝၼ်း မၢင်ၸိူဝ်း ပၢႆႈၶဝ်ႈတင်းမုင်ႉႁေႃႁိူၼ်း ၸိူဝ်းၼႆႉၵေႃႈ မီးတင်းၼမ် – ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ