မီးၸုမ်းဢမ်ႇႁူႉၾၢႆႇ သွၼ်ႉရူတ်ႉၶိူင်ႈမႃးၸွမ်းၵၼ်သေ ယိုဝ်းသႂ်ႇ ၵူၼ်းမိူင်း 2 ၵေႃႉ တီႈၼႃႈႁူင်းႁႅမ်း M2 Hotel တၢႆ 1 မၢတ်ႇ 1 ၼႆယဝ်ႉ။
ဝၼ်းတီႈ 17/2/2024 ယၢမ်းဝၢႆးဝၼ်း 2:34 မူင်း မီးၽူႈၸၢႆး သွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ ယိုဝ်းသႂ်ႇ ၵူၼ်းမိူင်း တီႈၼႃႈႁူင်းႁႅမ်း M2 Hotel ပွၵ်ႉၵၢတ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၵေႃႉလူႉတၢႆမၢတ်ႇၸဵပ်း ၼၼ်ႉ ပဵၼ်ၽူႈၸၢႆး ၵေႃႉၼိုင်ႈလႄႈ ၼၢင်းယိင်း ၵေႃႉၼိုင်ႈ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၵေႃႉထုၵ်ႇယိုဝ်းတၢႆၼၼ်ႉ ပဵၼ်ၽူႈၸၢႆး ၵေႃႉမၢတ်ႇၸဵပ်းသမ်ႉ ပဵၼ် ၼၢင်းယိင်း လႆႈႁူႉဝႃႈ ပဵၼ်ၸၢဝ်းၶႄႇ။ ဢၼ်ၶဝ် ၺႃးယိုဝ်းတႄႉ ပဵၼ်တီႈၼႃႈႁူင်းႁႅမ်း M2 Hotel ပွၵ်ႉၵၢတ်ႇ ၼႆႉၶႃႈ။ ၵူၼ်းႁၢႆႉ မႃးယိုဝ်းၼၼ်ႉ ပဵၼ်ၽူႈၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်ဢေႃႈ”- ဝႃႈၼႆ။
တီႈၼႂ်းၵွင်ႇထၢႆႇ CCTV ၶွင်ႁူင်းႁႅမ်း M2 Hotel တၢင်ႇဝႆႉၼိူဝ် Social Media ၼႆႉ ႁၢင်ႈၵူၼ်းႁၢႆႉ 2 ၵေႃႉၼၼ်ႉ ပဵၼ် ၽူႈၸၢႆး သွၼ်ႉရူတ်ႉၶိူင်ႈမႃးၸွမ်းၵၼ် လမ်းၼိုင်ႈ သႂ်ႇသိူဝ်ႈၼႃသီလမ်၊ ၵူၼ်ယၢဝ်း၊ သႂ်ႇၽႃႈတူမ်းသူပ်း (Mask) တင်း သွင်။ ယိပ်းၵွင်ႈပွတ်းသေ ယိုဝ်းသႂ်ႇ၊ ၵေႃႉယိုဝ်းသႂ်ႇၼၼ်ႉ ပဵၼ်ၵေႃႉသွၼ်ႉရူတ်ႉၶိူင်ႈ ၼႆယဝ်ႉ။
ဢိင်ၼိူဝ် လွင်ႈၼႆႉ ပဵၼ်ၼမ်ႉမိုဝ်းၽႂ် ၸုမ်းလႂ် မႃးယိုဝ်းသႂ်ႇတႄႉ ဢမ်ႇလႆႈႁူႉ။ ၼႂ်းပီ 2024 ၼႆႉ ပိူင်ပဵၼ်လွင်ႈယိုဝ်း ၶႃႈႁႅမ်ၵၼ် တၢႆၸိူင်ႉၼႆ တီႈဝဵင်းမူႇၸေႊၼႆႉ ပွၵ်ႈၼႆႉ ပဵၼ်ပွၵ်ႈႁႅၵ်ႈယဝ်ႉ ဝႃႈၼႆ။
မိူဝ်ႈပီ 2023 ပူၼ်ႉမႃးၼႆႉ ၵူၼ်းမူႇၸေႊ ထုၵ်ႇၸုမ်းဢမ်ႇႁူႉၾၢႆႇ ယိုဝ်းတၢႆ မွၵ်ႈ 10 ၵေႃႉ၊ မၢတ်ႇၸဵပ်း ဢမ်ႇယွမ်း 5 ၵေႃႉ။ ၵမ်ႈၼမ် ဢၼ်ထုၵ်ႇယိုဝ်းတၢႆၼၼ်ႉ ပဵၼ်ၼႂ်းလုၵ်ႈၸုမ်းပျီႇတူႉၸိတ်ႉလႄႈ ၽူႈႁၢပ်ႇၵၢၼ်လူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် ၸိူဝ်းၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ