Sunday, April 14, 2024

သိုၵ်းမၢၼ်ႈ ယိုဝ်းၽူႈလၵ်ႉ တၢႆ 1 မၢတ်ႇ 1

Must read

ၽွင်းပီမႂ်ႇၶႄႇၼႆႉ မီးၽူႈၸၢႆး သွင်ၵေႃႉ ၶိုင်လၵ်ႉတတ်းသၢႆၾႆးၾႃႉသေ ထုၵ်ႇသိုၵ်းမၢၼ်ႈ ယိုဝ်းတၢႆ 1 မၢတ်ႇၸဵပ်း 1 တီႈဝဵင်းလႃႈသဵဝ်ႈ။

ဝၼ်းတီႈ 9/2/2024 ယၢမ်းၵၢင်ၼႂ်မွၵ်ႈ 3 မူင်း ၽူႈၸၢႆးသွင်ၵေႃႉ တိုၵ်ႉၶိုင်လၵ်ႉတတ်းသၢႆၾႆးၾႃႉယူႇၼၼ်ႉ ထုၵ်ႇသိုၵ်းမၢၼ်ႈ ယိုဝ်းတၢႆ တီႈၼႂ်းဝၢၼ်ႈႁၢတ်ႇၵႃ ဢိူင်ႇႁူးမူၼ်ႈ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မိူဝ်ႈၽွင်းၼၼ်ႉ တိုၵ်ႉပဵၼ်ၶၢဝ်းယၢမ်း  မႃႇသျႄႊလေႃး ဝႃႈၼႆ။

- Subscription -

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ပဵၼ်ၽူႈလၵ်ႉ 2 ၵေႃႉ (ၽူႈၸၢႆး) ၶဝ်ၶိုင်လၵ်ႉတတ်း သၢႆၾႆးၾႃႉ တီႈပွၵ်ႉၸၢၼ်း ဝၢၼ်ႈႁၢတ်ႇၵႃ ထုၵ်ႇယိုဝ်းတၢႆ 1 ၵေႃႉ မၢတ်ႇၸဵပ်း 1 ၵေႃႉ။ မိူဝ်ႈၽွင်းၼၼ်ႉ ယွၼ်ႉပဵၼ်ၶၢဝ်းပီမႂ်ႇ ၶႄႇလႄႈ ၵူၼ်းဝၢၼ်ႈထၢင်ႇဝႃႈ ၶႄႇၶဝ်ၸုၵ်ႇမူၵ်ႇတႅၵ်ႇ ၸိူင်ႉၼၼ်ၵူၺ်း။ ၵူၺ်းၵႃႈ တူဝ်တၢႆၵူၼ်းလၵ်ႉ ၼၼ်ႉတႄႉ ဢမ်ႇႁၼ် မႅၼ်ႈၶႃႈ။ ၵူၼ်းမၢတ်ႇၸဵပ်းၵေႃႈ ဢမ်ႇႁၼ်တီႉလႆႈၶႃႈ။ လႅပ်ႈသိုၵ်းၶဝ် ၵဵပ်းၽဵဝ်ႈၼႂ်းဝၼ်း ၼၼ်ႉ ၵမ်းလဵဝ်ၶႃႈယူဝ်ႉ”- ဝႃႈၼႆ။

ဢိင်ၼိူဝ် လွင်ႈၽူႈလၵ်ႉသွင်ၵေႃႉ ထုၵ်ႇသိုၵ်းမၢၼ်ႈ ယိုဝ်းတၢႆလႄႈ မၢတ်ႇၸဵပ်းၼႆႉ ပဵၼ်ၵူၼ်းတီႈလႂ်၊ ၸုမ်းလႂ် ႁၢၼ်ႉတေႃႇထိုင် ယၢမ်းလဵဝ် ပႆႇႁူႉ ၽူႈလၵ်ႉၵေႃႉမၢတ်ႇၸဵပ်းၼၼ်ႉတႄႉ ပၢႆႈလွတ်ႈဝႆႉ ဝႃႈၼႆ။

“မိူဝ်ႈလဵဝ် ပေႃးထိုင်ယၢမ်းႁူဝ်ၶမ်ႈ 6 မူင်းၼႆ ႁဝ်းၶႃႈ ၵူၼ်းမိူင်းတႄႉ ဢွၼ်ၵၼ်ၶဝ်ႈႁိူၼ်းယေးၽႂ်မၼ်းမူတ်းယဝ်ႉ လွင်ႈသိုၵ်း မၢၼ်ႈ ယိုဝ်းၵူၼ်းတၢႆၼႆႉ ဢမ်ႇၵႃးတီႈဝၢၼ်ႈႁၢတ်ႇၵႃၵူၺ်း ဢၼ်ၵူၼ်းမိူင်းထုၵ်ႇသိုၵ်းမၢၼ်ႈယိုဝ်းတၢႆၼႆႉ မၼ်းၼမ်ၼႃႇယဝ်ႉ။ ၶဝ်ဢမ်ႇဢွၵ်ႇၶၢဝ်ႇဢွၵ်ႇငၢဝ်းသင်ၵူၺ်းၶႃႈဢေႃႈ။ ဢၼ်ၺွပ်းလိပ်း/ တူဝ်တူင်ႉၵႂႃႇၵေႃႈ မီးတင်းၼမ်ၶႃႈယဝ်ႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ဝၢၼ်ႈႁၢတ်ႇၵႃ ဢိူင်ႇႁူးမူၼ်ႈၼႆႉ မီးၾၢႆႇႁွင်ႇဝဵင်းလႃႈသဵဝ်ႈ။ တင်ႇတႄႇ ပၢင်တိုၵ်း သိုၵ်းမၢၼ်ႈတင်းၸုမ်းဢူၺ်းလီ ပွတ်းႁွင်ႇ 3 ၸုမ်း ပိုတ်းယိုဝ်းၵၼ်မႃး ႁၢဝ်ႈႁႅင်း မိူဝ်ႈႁၢင်လိူၼ်ဢွၵ်ႊထိူဝ်ႊပိူဝ်ႊ 2023 ၼၼ်ႉသေ ယူႇတီႈ သိုၵ်းမၢၼ်ႈ ဢွၵ်ႇမၢႆမီႈႁၢမ်ႈ ၵူၼ်းမိူင်းဢွၵ်ႇၼွၵ်ႈႁိူၼ်းယေး (မႃႇသျႄႇလေႃး) ႁၢၼ်ႉတေႃႇထိုင်ယၢမ်းလဵဝ် ပႆႇပူတ်း။

ပူၼ်ႉမႃး မိူဝ်ႈဝၼ်းတီႈ 21/1/2024 ယၢမ်းၵၢင်ဝၼ်း 11 မူင်း သိုၵ်းမၢၼ်ႈ ယိုဝ်းၽူႈၸၢႆး ဢႃယု 40 ပၢႆ ၵေႃႉၼိုင်ႈ တီႈပွၵ်ႉ 5 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မိူဝ်ႈၽွင်းမၼ်းၸၢႆး ႁေႃႈရူတ်ႉၶိူင်ႈမႃး ထုၵ်ႇသိုၵ်းမၢၼ်ႈႁွင်ႉ ဢမ်ႇၵိုတ်းလႄႈ ၺႃးယိုဝ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း