Sunday, April 14, 2024

ႁၢၼ်ႉၶၢႆၶမ်း ၼႂ်းၵၢတ်ႇတၢင်ႉယၢၼ်း ၺႃးၸူၼ် ယိုဝ်းပႃးၸဝ်ႈၶွင်ႁၢၼ်ႉတၢႆၸွမ်း

Must read

မိူဝ်ႈၼႆႉ ဝၼ်းတီႈ 13/2/2024 ယၢမ်းၵၢင်ဝၼ်းမွၵ်ႈ 12 မူင်း ႁၢၼ်ႉၶၢႆၶမ်း (သစ္စာ) ၼႂ်းၵၢတ်ႇလူင် ဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၺႃးၸူၼ် ၶဝ်ႈယိုဝ်းၸဝ်ႈၶွင်ႁၢၼ်ႉလူႉတၢႆထင်တီႈ ၵေႃႉၼိုင်ႈလႄႈ သုမ်းပႃးၶမ်းထႅင်ႈ တင်းၼမ်။

ၵူၼ်းပိုၼ်ႉတီႈ ဝဵင်းတၢင်ႉယၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်းၶႃႈဢေႃႈ ၵူၼ်းဢၼ်ၶဝ်ႈမႃးၸူၼ်ၼႆႉ ၵူႈ ၵေႃႉထၢင်ႇဝႃႈ ပဵၼ်ၵူၼ်းမႃးသိုဝ်ႉၶမ်းၵူၺ်း။ ႁဵတ်းၼၼ်သေ ၸူၼ်ဢဝ်ၶမ်းၵႂႃႇဢေႃႈ။ ယဝ်ႉၵေႃႈ ယိုဝ်းပႃးၸဝ်ႈ ႁၢၼ်ႉၼၼ်ႉ တၢႆထင်တီႈ။ တီႈႁၢၼ်ႉၼၼ်ႉ မီးၸဝ်ႈမၼ်းၵေႃႉလဵဝ်ၵူၺ်းလႄႈ ဢမ်ႇႁူႉဝႃႈ ၸူၼ်ၼႆႉ ပဵၼ်ၸုမ်းလႂ်။ သုမ်းၵႂႃႇၶမ်း ၵႃႈႁိုဝ်ၵေႃႈ ဢမ်ႇႁူႉ”- ဝႃႈၼႆ။

- Subscription -

သိုပ်ႇလၢတ်ႈဝႃႈ – “ၼႂ်းၵွင်ႈ CCTV တီႈႁၢၼ်ႉၶၢႆၶမ်း (သစ္စာ) တၢင်ႇဝႆႉတႄႉ ၵူၼ်းၸူၼ်ၼၼ်ႉ ၸၵ်ႉဢဝ်ၵႂႃႇသၢႆၶေႃး ၼႂ်း ႁၢၼ်ႉၼၼ်ႉ တင်းၼမ်။ ဝၢႆးသေ မီးလွင်ႈယိုဝ်းၵၼ်ယဝ်ႉ ၵူၼ်းၼႂ်းၵၢတ်ႇဢွၼ်ၵၼ်ပိၵ်ႉႁၢၼ်ႉပိၵ်ႉသႅင်ႇသေ မိူဝ်းမူတ်း ဢေႃႈ။ ပလိၵ်ႈမၢၼ်ႈၶဝ်ၵေႃႈ မႃးတူၺ်းတီႈႁၢၼ်ႉၼၼ်ႉသေ ဢမ်ႇပၼ်ၵူၼ်းႁိမ်းႁွမ်းၶဝ်ႈၸမ်”- ဝႃႈၼႆ။

ၸဝ်ႈၶွင်ႁၢၼ်ႉၶၢႆၶမ်း တိတ်ႉၸႃႇ (သစ္စာ) ဢၼ်ၺႃးယိုဝ်းတၢႆၼႆႉ ပဵၼ်ၸၢႆးၵျေႃႇဢူး ဢႃယု 50 ပီ (ၸၢဝ်းၶႄႇ) မၼ်း ၸၢႆး ၺႃးယိုဝ်းတီႈမၢၵ်ႇႁူဝ်ၸႂ်။ ၵူၼ်းႁၢႆႉ ဢၼ်ၶဝ်ႈၸူၼ် ၼႂ်းႁၢၼ်ႉၶမ်းၼႆႉ တေမီးဢႃယုမွၵ်ႈ 40 ပီ – ယူႇတီႈ SSPP Info ႁၢႆးငၢၼ်းဝႆႉၼင်ႇၼႆ။

“မိူဝ်ႈလဵဝ် တီႈဝဵင်းတၢင်ႉယၢၼ်းၼႆႉ လႆႈၵူဝ်ဢေႃႈ။ မိူၼ်ၼင်ႇ ႁၢၼ်ႉၶမ်းၺႃးၸူၼ်ၸိူင်ႉၼႆ ဢမ်ႇသူႈမီးၶႃႈ။ ၵမ်းၼႆႉ ၶႅၼ်း ႁဵတ်းႁႂ်ႈၵူၼ်းမိူင်း တူၵ်းၸႂ်တိုၼ်ႇသၢၼ်ႇ မိူၼ်မိူဝ်ႈၼႆႉ ၽႂ်ၵေႃႈၼႅတ်ႈသိမ်းႁၢၼ်ႉသေပွၵ်ႈမိူဝ်းႁိူၼ်း။ ပေႃးမိူဝ်း ၼႃႈမႃး တေပဵၼ်ႁိုဝ်ထႅင်ႈတႄႉ ဢမ်ႇႁူႉၶႃႈ မႆႈၸႂ်ဢေႃႈ”-  ၵူၼ်းပိုၼ်ႉတီႈ ဝဵင်းတၢင်ႉယၢၼ်း သိုပ်ႇလၢတ်ႈၼႄၼင်ႇ။

မိူဝ်ႈဝၼ်းတီႈ 3/1/2024 ပူၼ်ႉမႃးၼၼ်ႉၵေႃႈ ႁၢၼ်ႉၶၢႆၶမ်း ၼႂ်းၵၢတ်ႇလူင် ဝဵင်းလၢႆးၶႃႈ ၺႃးၸူၼ် လႆႈၵႂႃႇသၢႆၶေႃး ၶမ်းလႄႈ မူင်းၶူၺ်း (မႅင်းၶူၺ်း/ ၸွပ်ႇမိုဝ်း) ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း