ၵူၼ်းမူႇၸေႊ ၵႂႃႇႁႃၽိုၼ်းသေ ယဵပ်ႇၺႃးမၢၵ်ႇသိုၵ်းမၢၼ်ႈႁၢင်ႈၵၢင်ဝႆႉ ၸွမ်းႁိမ်လွႆၵိဝ်ႇလွၵ်ႇၼၼ်ႉ တႅၵ်ႇတိူဝ်ႉသႂ်ႇ ထိုင်တီႈ ၶႃပုတ်းတင်းသွင်ၶွၼ်။
ဝၼ်းတီႈ 11/2/2024 ယၢမ်းၵၢင်ၼႂ် ၽူႈၸၢႆး ၵေႃႉၼိုင်ႈ ၵူၼ်းဝၢၼ်ႈၸၢၼ်းသႃႇ ဢိူင်ႇတိုင်းလူင် ၸႄႈဝဵင်းမူႇၸေႊ ၵႂႃႇ ႁႃၽိုၼ်းသေ ယဵပ်ႇၺႃးမၢၵ်ႇ သိုၵ်းမၢၼ်ႈ ႁၢင်ႈၵၢင်ဝႆႉ ႁိမ်းလွႆၵိဝ်ႇလွၵ်ႇ (လွႆသူးတွင်း) ၼၼ်ႉ တႅၵ်ႇတိူဝ်ႉသႂ်ႇမၼ်းၸၢႆး ထိုင်တီႈ လႆႈတႅပ်ႈပႅတ်ႈၶႃသွင်ၶွၼ်။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵူၼ်းဝၢၼ်ႈၸၢၼ်းသႃႇ ၶႃႈဢေႃႈ မၼ်းၸၢႆး ၵႂႃႇႁႃ ၽိုၼ်းသေ ယဵပ်ႇၺႃးမၢၵ်ႇသိုၵ်းမၢၼ်ႈ ႁၢင်ႈၵၢင်ဝႆႉ တီႈႁိမ်းလွႆၵိဝ်ႇလွၵ်ႇၼၼ်ႉၶႃႈ။ သိုၵ်းမၢၼ်ႈသမ်ႉ ယူႇၼိူဝ်လွႆ ၸွမ်းႁိမ်းလွႆၼၼ်ႉ ၶဝ်သမ်ႉႁၢင်ႈၵၢင်ဝႆႉ မၢၵ်ႇၸိူင်ႉၼၼ်ၶႃႈဢေႃႈ။ ယၢမ်းလဵဝ် ၵူၼ်းဝၢၼ်ႈၸၢၼ်းသႃႇၼႆႉ လႆႈယူတ်းယႃတူဝ်ဝႆႉတီႈ ပႃႇႁူဝ်ႇသေးယူင်ႇ (ဗဟိုဆေးရုံ) မူႇၸေႊဝႆႉ”- ဝႃႈၼႆ။
ၶၢဝ်းတၢင်း 2 လိူၼ်မႃးၼႆႉ တီႈႁိမ်းလွႆၵိဝ်ႇလွၵ်ႇ (လွႆသူးတွင်း) ၼၼ်ႉ ၵူၼ်းမိူင်းယဵပ်ႇၺႃးမၢၵ်ႇသိုၵ်းမၢၼ်ႈ ႁၢင်ႈၵၢင်ဝႆႉ 3 ၵေႃႉ ယဝ်ႉ။ မိူဝ်ႈဝၼ်းတီႈ 29/1/2024 ယၢမ်းၵၢင်ၼႂ် 8 မူင်း ၸၢႆးၵျေႃႇမိၼ်ႉ ဢႃယု 38 ပီ ၵူၼ်းဝၢၼ်ႈၸၢၼ်းသႃႇ ၼၼ်ႉၵေႃႈ ၵႂႃႇႁႃ ၽိုၼ်းသေ ယဵပ်ႇၺႃးမၢၵ်ႇ။ ဝၼ်းတီႈ 30/1/2024 ယၢမ်းႁူဝ်ၶမ်ႈ 5 မူင်း ၸၢႆးမွင်ႇဢေး ၵူၼ်းဝၢၼ်ႈမႆႉသၵ်း ၼၼ်ႉၵေႃႈ ၵႂႃႇ ႁႃၶႅမ် ဢဝ်မႃးႁဵတ်းယူးပတ်းၼႆသေ ယဵပ်ႇၺႃးမၢၵ်ႇထႅင်ႈ။ ယဝ်ႉၵေႃႈ ဝၼ်းတီႈ 11 ၵူၼ်းဝၢၼ်ႈၸၢၼ်းသႃႇ ၼႆႉထႅင်ႈၵေႃႉ ၼိုင်ႈ ၼႆယဝ်ႉ။
ၼႂ်းလိူၼ်ၵျႅၼ်ႊၼိဝ်ႊရီႊလႄႈ ၾႅပ်ႊပိဝ်ႊရီႊ 2024 ၶၢဝ်းတၢင်း 2 လိူၼ်မႃးၼႆႉ ၵူၼ်းမူႇၸေႊ ယဵပ်ႇၺႃးမၢၵ်ႇမႅင်းၾင်လိၼ်/ ႁၢင်ႈၵၢင် တႅၵ်ႇတိူဝ်ႉသႂ်ႇ လႆႈမၢတ်ႇၸဵပ်းႁၢဝ်ႈႁႅင်းၼႆႉ တင်းမူတ်းမီးၵႂႃႇ 8 ၵေႃႉယဝ်ႉ။ ၼႂ်းၼၼ်ႉ ၽူႈၸၢႆး 7 ၵေႃႉ၊ ယိင်း 1 ၵေႃႉ လႄႈ ၵႂၢႆးလူႉတၢႆၸွမ်း 1 တူဝ် ဝႃႈၼႆ။
လိူဝ်ၼၼ်ႉ ဝၼ်းတီႈ 9/2/2024 ယၢမ်းဝၢႆးဝၼ်း 4 မူင်း ၵူၼ်းသီႇပေႃႉ ယဵပ်ႇၺႃးမၢၵ်ႇထႅင်ႈ ၵေႃႉၼိုင်ႈ ပဵၼ်ၽူႈၸၢႆး တီႈႁိမ်း ပႃႇႁဵဝ်ႈ ဝၢၼ်ႈၼွင်သိၵ်ႉၵျႃး ဝဵင်းသီႇပေႃႉ လႆႈတိူဝ်ႉမၢၵ်ႇၸဵပ်းႁႅင်း ယူႇတီႈ ၸုမ်းပရႁိတ လႆႈၵႂႃႇတေႃႉဢဝ်မႃးသူင်ႇတီႈယူတ်း ယႃ။
တီႈဝဵင်းသီႇပေႃႉၵေႃႈ မိူၼ်ၵၼ် ၶၢဝ်းတၢင်း 2 လိူၼ်မႃးၼႆႉ ၵူၼ်းမိူင်း ယဵပ်ႇၺႃးမၢၵ်ႇမႅင်းၾင်လိၼ်/ ႁၢင်ႈၵၢင် တႅၵ်ႇသႂ်ႇ ဢမ်ႇယွမ်း 6 ၵေႃႉယဝ်ႉ။ ၼႂ်းၼၼ်ႉ ၸၢႆး 5 ၵေႃႉ၊ ယိင်း 1 ၵေႃႉ။ ယဝ်ႉၵေႃႈ ၵႃးတၢင်ႇၵုၼ်ႇ 1 လမ်းလႄႈ ထူဝ်ႈ 1 လမ်း လူႉၵွႆၸွမ်း – ဝႃႈၼႆ။
