ၵူၼ်းၶၢႆၵုၼ်ႇယွႆႈ တီႈမူႇၸေႊ ၵေႃႉၼိုင်ႈ ထုၵ်ႇတီႉၺွပ်း ဢဝ်ပဵၼ်တူဝ်ယိူဝ်ႇ

ၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇယွႆႈ တီႈဝဵင်းမူႇၸေႊ ထုၵ်ႇၸုမ်းဢမ်ႇႁူႉၾၢႆႇ တီႉၺွပ်းဢဝ်ၵႂႃႇပဵၼ်တူဝ်ယိူဝ်ႇ (ပြန်ပေးဆွဲ) သေ ယွၼ်းငိုၼ်းၶႄႇ 20 သႅၼ်ယႂၼ်ႊ။

ဝၼ်းတီႈ 4/2/2024 ယၢမ်းႁူဝ်ၶမ်ႈ 6:45 မူင်း ၸၢႆးဢွင်ႇၽိဝ်းတူႇ ဢႃယု 29 ပီ ၸဝ်ႈၶွင်ႁၢၼ်ႉၶၢႆၶူဝ်းၵုၼ်ႇယွႆႈ တီႈပွၵ်ႉၵၢတ်ႇ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇၵူၼ်းဢမ်ႇႁူႉၾၢႆႇ 4 ၵေႃႉ ယိပ်းၵွင်ႈပွတ်း/ ယၢဝ်းၸေးမိုဝ်းသေ ၶဝ်ႈတီႉၺွပ်းၵုမ်းတူဝ်မၼ်းၸၢႆး ဢွၵ်ႇႁၢၼ်ႉၵႂႃႇ တေႃႇထိုင်ယၢမ်းလဵဝ် ပႆႇပွႆႇ ယွၼ်းငိုၼ်း 20 သႅၼ်ယႂၼ်ႊ ႁႂ်ႈၵႂႃႇထုတ်ႇဢဝ် တူဝ်ဢွၵ်ႇ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ်ၼႆႉ တိုၵ်ႉငူပ်ႉငီႉၵၼ်ယူႇၶႃႈ ယွၼ်ႉၶဝ်ယွၼ်းငိုၼ်းၼမ်ၼႃႇ ဢႃးလႃးလႄႈ တၢင်းၾၢႆႇၼႆႉ ဢမ်ႇၸၢင်ႈပၼ်လႆႈ။ ၶိုၼ်းမႄးဢုပ်ႇၵၼ်သေ တၢင်းၾၢႆႇၵူၼ်းႁၢႆႉၼၼ်ႉ လၢတ်ႈဝႃႈ ႁႂ်ႈႁၢင်ႈႁႅၼ်း ဝႆႉ ငိုၼ်းၶႄႇ 1 သႅၼ်ယႂၼ်ႊၼႆၶႃႈ။ တေႃႇထိုင်ယၢမ်းလဵဝ် ၶဝ်ပႆႇလၢတ်ႈသင်မႃး ဝႃႈတေလႆႈၵႂႃႇပၼ်တီႈလႂ်”- ဝႃႈၼႆ။

ၵူၼ်းႁၢႆႉ 4 ၵေႃႉ ဢၼ်မႃးတီႉၺွပ်းဢဝ်တူဝ် ၸၢႆးဢွင်ႇၽိဝ်းတူႇၵႂႃႇၼႆႉ ၼႂ်းၼၼ်ႉ တႃႇသွင်ၵေႃႉ ၼုင်ႈသိူဝ်ႈၼႃလၢႆးၶဵဝ် မူၵ်ႉ ၼႃႈဝႆႉ ယဝ်ႉၵေႃႈ ယိပ်းၵွင်ႈပွတ်းဝႆႉတင်းသွင်။ တႃႇၵေႃႉၼိုင်သမ်ႉ သႂ်ႇသိူဝ်ႈၼႃႈလမ် ၽႃႈပူၵ်ႉၶေႃးသီၶွင်ႇ တိုဝ်းမူၵ်ႇႁူဝ်ၼႅပ်း သႂ်ႇၽႃႈတူပ်းသူပ်း (Mask) သေ ယိပ်းၵွင်ႈယၢဝ်းဝႆႉ။ ထႅင်ႈၵေႃႉၼိုင်ႈ သႂ်ႇသိူဝ်ႈၼႃသီၶဵဝ် ပူၵ်းၼႃႈ ယိပ်းၵွင်ႈပွတ်းဝႆႉ ၼႂ်းၵွင်ႈ CCTV တီႈႁၢၼ်ႉၶၢႆၶူဝ်းၵုၼ်ႇ ၸၢႆးဢွင်ႇၽိဝ်းတူႇ ထၢႆႇတၢင်ႇဝႆႉၼင်ႇၼႆ။

“ၵေႃႉပဵၼ် ပီႈၼွင်ႉလုၵ်ႈလၢင်းၼၢင်းမေး မၼ်းၸၢႆးတႄႉ ပေႃးႁွင်ႉပေႃးႁႆႈ ၼွၼ်းပေႃးဢမ်ႇလပ်းဢေႃႈ မၼ်းၸၢႆးသမ်ႉ မီး လုၵ်ႈဢွၼ်ႇလဵၵ်ႉဝႆႉၵေႃႉၼိုင်ႈ။ မိူဝ်ႈဝူင်ႈပူၼ်ႉမႃးၼၼ်ႉ ၵေႃႉပဵၼ်ပေႃႈမႄႈ မၼ်းၸၢႆး ၶၢႆႉၵႂႃႇမၼ်းတလေး ယွၼ်ႉပၢင်တိုၵ်းသေ  မိူဝ်ႈၼၼ်ႉ ပေႃႈမႄႈ ၸၢႆးဢွင်ႇၽိဝ်းတူႇၼႆႉ ႁွင်ႉၵႂႃႇၸွမ်းယူႇ ၵူၺ်းၵႃႈ မၼ်းၸၢႆးသမ်ႉ မီးဝႆႉလုၵ်ႈလဵၵ်ႉ သဵၼ်ႈတၢင်းၵေႃႈယၢပ်ႇ လႄႈ ဢမ်ႇပဵၼ်ၸွမ်းၵႂႃႇ ႁဵတ်းၼၼ်ၶႃႈဢေႃႈ”- ၵူၼ်းပိုၼ်ႉတီႈ မူႇၸေႊ သိုပ်ႇလၢတ်ႈၼႄၼင်ႇၼႆ။

ၸၢႆးဢွင်ႇၽိဝ်းတူႇ ဢႃယု 29 ပီၼႆႉ မီးဝႆႉ လုၵ်ႈဢွၼ်ႇလဵၵ်ႉ ဢႃယုမွၵ်ႈ 8 လိူၼ်ဝႆႉ ၵေႃႉၼိုင်ႈ ၼႆယဝ်ႉ။