လုၵ်ႈဢွၼ်ႇ ဢႃယု 10 ၶူပ်ႇလူင်းတႂ်ႈ ၵဵပ်းလဵၼ်ႈမၢၵ်ႇမႅင်းသေ တႅၵ်ႇတိူဝ်ႉသႂ်ႇ လူႉတၢႆထင်တီႈ 3 ၵေႃႉ ဝႃႈၼႆ။

ဝၼ်းတီႈ 3/2/2024 ယၢမ်းၵၢင်ၼႂ်မွၵ်ႈ 9 မူင်းၶိုင်ႈ လုၵ်ႈဢွၼ်ႇ 3 ၵေႃႉ တီႈဝၢၼ်ႈၸယၼ်းၵျီး (ဇယန်းကြီးကျေးရွာ) ၸႄႈ ဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇၼၼ်ႉ ၵဵပ်းလဵၼ်ႈမၢၵ်ႇမႅင်း လုၵ်ႈၼိုင်ႈသေ တႅၵ်ႇတိူဝ်ႉသႂ်ႇ ထိုင်တီႈလႆႈလူႉတၢႆ တင်း 3 ၵေႃႉ ယူႇတီႈ ၸုမ်းၼၢင်းယိင်း (TWO) ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၽူႈၶၢၼ်ပၢၵ်ႇ ၸုမ်းၼၢင်းယိင်း (TWO) လၢတ်ႈတီႈၽူႈတွႆႇႁွၵ်ႈဝႃႈ – “မၢၵ်ႇဢၼ်တႅၵ်ႇသႂ်ႇလုၵ်ႈဢွၼ်ႇၼၼ်ႉ ပဵၼ်မၢၵ်ႇမဵဝ်း ႁိုဝ်တႄႉ ဢမ်ႇလႆႈႁူႉၶႃႈ။ လုၵ်ႈဢွၼ်ႇသမ်ႉ ၵဵပ်းလဵၼ်ႈမၢၵ်ႇၼၼ်ႉသေ တႅၵ်ႇတိူဝ်ႉသႂ်ႇ လူႉတၢႆထင်တီႈ 2 ၵေႃႉ။ ထႅင်ႈၵေႃႉ ၼိုင်ႈသမ်ႉ တိူဝ်ႉမၢတ်ႇၸဵပ်းႁၢဝ်ႈႁႅင်းသေ မိူဝ်ႈၽွင်းတိုၵ်ႉတေဢဝ်သူင်ႇယူတ်းယႃၼၼ်ႉ လႆႈလူႉတၢႆၵႂႃႇၶႃႈဢေႃႈ”- ဝႃႈၼႆ။

မၢၵ်ႇမႅင်း ဢၼ်တႅၵ်ႇတိူဝ်ႉသႂ်ႇ လုၵ်ႈဢွၼ်ႇလႆႈလူႉတၢႆၵႂႃႇၼႆႉ ပဵၼ်ယွၼ်ႉပၢင်တိုၵ်း သိုၵ်းမၢၼ်ႈတင်း သိုၵ်း TNLA ပိုတ်းယိုဝ်း ၵၼ် မိူဝ်ႈၼႂ်းလိူၼ်ၻီႊသႅမ်ႊပိူဝ်ႊ 2023 ၼၼ်ႉ – ၵူၼ်းပိုၼ်ႉတီႈ ဝဵင်းၼမ်ႉသၼ်ႇလၢတ်ႈ။

ၵွပ်ႈၼႆလႄႈ မိူၼ်ၼင်ႇ – မၢၵ်ႇမႅင်း၊ ၶိူင်ႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်း ၶိူင်ႈၸႂ်ႉတိုဝ်းၼႂ်းၵၢၼ်သိုၵ် ၸိူဝ်းၼႆႉ သင်ထူပ်းႁၼ် မႅၼ်ႈၸိုင် ယႃႇပေၵႂႃႇယိပ်းဢဝ်မႃးလဵၼ်ႈ၊ ယႃႇပေၵႂႃႇထုပ်ႉသႂ်ႇမၢၵ်ႇမႅင်း ၸိူဝ်းၼၼ်ႉ – ယူႇတီႈ TWO ဢွၵ်ႇလိၵ်ႈ ပၼ်ၾၢင်ႉဝႆႉၼင်ႇၼႆ။

ယူႇတီႈ ၸုမ်းလဵပ်ႈႁဵၼ်းပၵ်းတႃပႂ်ႉတူၺ်း မၢၵ်ႇမႅင်း ၼႂ်းမိူင်းမၢၼ်ႈသေ လႆႈၵဵပ်းသဵၼ်ႈမၢႆဝႆႉ တႄႇဢဝ် ပီ 2019 ထိုင် 2022 ၼၼ်ႉ ၵူၼ်းမိူင်းႁူမ်ႈတုမ် ဢၼ်ယဵပ်ႇၺႃးမၢၵ်ႇမႅင်းသေ ထိုင်တီႈမၢတ်ႇၸဵပ်းလူႉတၢႆၼႆႉ ၼႂ်းမိူင်းတႆး ပဵၼ်ၼမ်သုတ်း ဝႃႈၼႆ။