တႄႇဢဝ် ႁၢင်လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်း TNLA လူင်းပိုၼ်ႉတီႈ ၵူတ်ႇထတ်း မီႊတိူဝ်ႊပွၵ်ႊ (Meter box) လႄႈ ၵဵပ်းၵႃႈၾႆးၾႃႉ တီႈၵူၼ်းမိူင်းၼမ်ႉတူႈမႃး။

ဝၼ်းတီႈ 28/1/2024 ယၢမ်းဝၢႆးဝၼ်း 1 မူင်းၶိုင်ႈ ၾၢႆႇၾႆးၾႃႉ (Electric Power Corporation – EPC) ဢၼ်ယူႇတႂ်ႈ သိုၵ်းတဢၢင်း TNLA ၵုမ်းၵမ်ဝႆႉၼၼ်ႉ ဢွၼ်ၵၼ်လူင်းပိုၼ်ႉတီႈ ၵူတ်ႇထတ်းမီႊတိူဝ်ႊပွၵ်ႊ (Meter box) ၸွမ်းႁိူၼ်းယေး ၵူၼ်းမိူင်း ၼႂ်းဝဵင်းၼမ်ႉတူႈ ၸႄႈ တွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မႃးယဝ်ႉ တီႈဢိူင်ႇမၢၼ်ႈၸၢမ်တႄႉ တႄႇၵဵပ်းငိုၼ်း 1 ႁိူၼ်းလႂ် 5,000 ပျႃး ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမႃးလူင်းထတ်းတႄႉ ပဵၼ်ၵူၼ်းႁဵတ်းၵၢၼ်ၵဝ်ႇ ၼႂ်းလုမ်း EPC ၵူၺ်းၼင်ႇၵဝ်ႇ ၵူၺ်းၵႃႈ ယူႇတႂ်ႈသိုၵ်းလွႆၵုမ်းၵမ်။ တီႈၼႂ်းဝဵင်းၼမ်ႉတူႈၼႆႉ ၶဝ်လူင်းမႃးထတ်း မီႊတိူဝ်ႊပွၵ်ႊ ဢၼ် ၵူၼ်းမိူင်းၸႂ်ႉတိုဝ်းၵၼ်ၼႆႉ ၵူႈတီႈယဝ်ႉ ငိုၼ်းတႄႉ ၶဝ်ပႆႇၵဵပ်း ၶဝ်လူင်းထတ်း မၢႆယူႊၼိတ်ႊမၼ်းၵႂႃႇ ၸိူင်ႉ ၼၼ်ၵူၺ်း”- ဝႃႈ ၼႆ။

မိူၼ်ၼင်ႇ တၢင်းဢိူင်ႇမၢၼ်ႈၸၢမ်ၵေႃႈ သိုၵ်း TNLA တႄႇၵဵပ်းၵႃႈၾႆးၾႃႉမႃးယဝ်ႉ 1 ႁိူၼ်းလႂ် လႆႈသႂ်ႇပၼ် 5,000 ပျႃး ဝႃႈၼႆ။

“တၢင်းဢိူင်ႇမၢၼ်ႈၸၢမ်တႄႉ ၶဝ်တႄႇၵဵပ်းမႃးယဝ်ႉ ၵူၺ်းၵႃႈ ၶဝ်တေၵဵပ်းၸိူင်ႉၼႆ 1 ႁိူၼ်းလႂ် လႆႈသႂ်ႇပၼ်ၶဝ် 5,000 ပျႃး တႃႇ 2 လိူၼ်။ ပဵၼ်လိူၼ်ၻီႊသႅမ်ႊပိူဝ်ႊ 2023 တင်း လိူၼ်ၵျႅၼ်ႊၼိဝ်ႊရီႊ 2024 ၼႆႉၶႃႈဢေႃႈ။ ၼႆႉတႄႉ ၶဝ်ဢမ်ႇတူၺ်း ယူႊ ၼိတ်ႊသေၵဵပ်း။ တေႃႈလဵဝ် တီႈၼမ်ႉတူႈၼႆႉ ၾႆးၾႃႉ ၵႆႉၶၢတ်ႇ/ ၵႆႉၵွႆ ယူႇတႃႇသေႇဢေႃႈ တေႃႇထိုင်ယၢမ်းလဵဝ် ပႆႇမႃးပူင်ႇ မၢၼ်ႇၶႃႈ” – ၵူၼ်းပိုၼ်ႉတီႈ ဝဵင်းၼမ်ႉတူႈ သိုပ်ႇလၢတ်ႈၼႄၼင်ႇၼႆ။

သင်သိုၵ်း TNLA ၵဵပ်းၵႃႈၾႆးၾႃႉ တီႈဢိူင်ႇမၢၼ်ႈၸၢမ်ၼႆႉယဝ်ႉၸိုင် တေသိုပ်ႇၵဵပ်းထႅင်ႈ တၢင်းမိူင်းမူႉ၊ ပၢင်ႇၶိင် ၸိူဝ်း ၼႆႉ မႃးထႅင်ႈ – ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ၾႆးၾႃႉ ဢၼ်ၵူၼ်းမိူင်းၼမ်ႉတူႈ ၸႂ်ႉတိုဝ်းယူႇ ယၢမ်းလဵဝ်ၼႆႉ ပဵၼ်ၾႆးၾႃႉ လူင်ပွင်ၸိုင်ႈႁဵတ်းဝႆႉ။ ၼႂ်းဝဵင်း ၼမ်ႉတူႈ ၼႆႉ တင်းမူတ်း မီး 8 ပွၵ်ႈ ၼႆယဝ်ႉ။

လိူဝ်သေ ဝဵင်းၼမ်ႉတူႈၼႆႉယဝ်ႉ တီႈဝဵင်းၼွင်ၶဵဝ်ၵေႃႈ ၾၢႆႇၾႆးၾႃႉ (EPC) ၶဝ် ပႆႇၵဵပ်းငိုၼ်း ၵႃႈၾႆးၾႃႉ တီႈၵူၼ်းမိူင်းမႃး မီး ၶၢဝ်းတၢင်း 2 လိူၼ်ယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းတၢင်း 2 လိူၼ်မႃးၼႆႉ ႁဝ်းၶႃႈ ပႆႇလႆႈၸၢႆႇၵႃႈၾႆးသင် တီႈလုမ်း EPC ၵေႃႈ ဢမ်ႇပိုတ်ႇ၊ ၶဝ်ၵေႃႈ ဢမ်ႇမႃးၵဵပ်း၊ ႁဝ်းၵေႃႈ ဢမ်ႇႁူႉတေၵႂႃႇၸၢႆႇပၼ်တီႈလႂ်။ ၾႆးၾႃႉတႄႉ တႄႇမႃးပူင်ႇမၢၼ်ႇ ၶိုၼ်း ၼႂ်းလိူၼ်ၻီႊသႅမ်ႊပိူဝ်ႊ 2023 ၼၼ်ႉၶႃႈဢေႃႈ ႁၢၼ်ႉတေႃႇထိုင်ယၢမ်းလဵဝ် တိုၵ်ႉမႃးယူႇၶႃႈ”- ဝႃႈ ၼႆ။

ဢိင်ၼိူဝ် လွင်ႈၼႆႉသေ ၵူၼ်းမိူင်းၼွင်ၶဵဝ် ၵမ်ႈၼမ် ဢွၼ်မႆႈၸႂ်ဝႆႉ သင်ဝႃႈ ၾၢႆႇၾႆးၾႃႉ မႃးၵဵပ်းၵႃႈၾႆး ယွၼ်ႉလင်ၸိုင် ၵူဝ်လႆႈၸၢႆႇပၼ်ၼမ် မိူၼ်မိူဝ်ႈသိုၵ်းမၢၼ်ႈ ယိုတ်းမိူင်းမႃးၼၼ်ႉ ဝႃႈၼႆ။