ပၢင်တိုၵ်း တီႈမိူင်းမိတ်ႈ ပဵၼ်ႁႅင်းထႅင်ႈ

သိုၵ်း KIA ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈ တီႈဝဵင်းမိူင်းမိတ်ႈထႅင်ႈ ႁၢဝ်ႈႁႅင်း တေႃႇထိုင်ယၢမ်းလဵဝ် ပႆႇယိုတ်းလႆႈ တပ်ႉပိဝ်ႇႁႃႇသိုၵ်းမၢၼ်ႈ။  

ဝၼ်းတီႈ 27/1/2024 ယၢမ်းၵၢင်ၼႂ် သိုၵ်းၶၢင် KIA ႁူမ်ႈတင်း PDF ၶိုၼ်ႈလေႃႇတိုၵ်း တပ်ႉပိဝ်ႇႁႃႇသိုၵ်းမၢၼ်ႈ ဢၼ်ပၵ်းဝႆႉ တီႈႁူဝ်ဝၢၼ်ႈတူဝ်းပၢင်ႇ တၢင်းၶဝ်ႈဢွၵ်ႇ ဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ႁၢဝ်ႈႁႅင်း ၾၢႆႇသိုၵ်း KIA, PDF ဢမ်ႇလူမ်ႇလႆႈသေ လႆႈထွႆၶိုၼ်း ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ တိုၵ်ႉတႄႇပဵၼ် မိူဝ်ႈဝႃး ဝၼ်းတီႈ 27 ၼႆႉ ၶိုၼ်း တပ်ႉပွင်းၸူႉၶဝ် ဢၢၼ်းၶဝ်ႈသိမ်း တပ်ႉပိဝ်ႇႁႃႇၵူင်း ၵူၺ်းၵႃႈ ပႆႇသိမ်းလႆႈ။ သဵင်ၵွင်ႈတႄႉ ပၼ်းတင်းဝၼ်းၶႃႈယဝ်ႉ။ တီႈတပ်ႉပိဝ်ႇႁႃႇၵူင်းၼၼ်ႉသမ်ႉ ၾၢႆႇလင်တပ်ႉၼၼ်ႉ မီးတပ်ႉၶလယ 223 လႄႈ ၶလယ 276 ဝႆႉထႅင်ႈ။ တပ်ႉပွင်းၸူး ဢမ်ႇသိမ်းလႆႈသေ ႁူၼ်ၵႂႃႇတၢင်းဝၢၼ်ႈသူၺ်ႇၸႃႇလီႇ၊ ဝၢၼ်ႈဢုင်းၵျေႃးလႄႈ ၾၢႆႇသိုၵ်းမၢၼ်ႈသမ်ႉ ယိုဝ်းမၢၵ်ႇလူင်သႂ်ႇတီႈဝၢၼ်ႈၼၼ်ႉသေ  ႁဵတ်းႁႂ်ႈတုမ်ႉတိူဝ်ႉႁိူၼ်းၵူၼ်းမိူင်း လူႉၵွႆၸွမ်းထႅင်ႈၼမ်ဢေႃႈ”- ဝႃႈၼႆ။

ဢိင်ၼိူဝ် လွင်ႈပၢင်တိုၵ်းၼႆႉသေ တေႃႇထိုင်ယၢမ်းလဵဝ် လွင်ႈမၢတ်ႇၸဵပ်းလူႉတၢႆ တပ်ႉသိုၵ်းတင်းသွင်ၾၢႆႇတႄႉ ပႆႇႁူႉ။ ထႅင်ႈၾၢႆႇၼိုင်ႈ ယွၼ်ႉလႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊ ၶၢတ်ႇဝႆႉ ဝႃႈၼႆ။

“ငဝ်းလၢႆး ပၢင်တိုၵ်း မိူင်းမိတ်ႈၼႆႉ သိုၵ်းမၢၼ်ႈ လိုပ်ႈလၢမ်း ၸုမ်း PDF တင်း သိုၵ်း KIA ၶဝ်ဢွၵ်ႇဝဵင်းၼႆၶႃႈဢေႃႈ။ မိူဝ်ႈဝႃး တင်း မိူဝ်ႈၼႆႉ ၶဝ်ပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈတိတ်ႉၶွႆးပိၼ်ႇ (တစ်ခွဲပင်ကျေးရွာ) လႄႈ ဝၢၼ်ႈၵိၼ်းၶျွင်းထႅင်ႈ ၼႆၶႃႈဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ၼႂ်းၸႄႈဝဵင်းမိူင်းမိတ်ႈၼႆႉ ဢၼ်သိုၵ်းမၢၼ်ႈတူင်ႉၼိုင်ယူႇဝႆႉသမ်ႉ ပဵၼ်တပ်ႉၶမယ 348 ၶလယ 223 ၶလယ 276 လႄႈ တပ်ႉပိဝ်ႇႁႃႇထႅင်ႈ ၼႂ်းတပ်ႉသိုၵ်းမၢၼ်ႈ ၸိူဝ်းၼႆႉသမ်ႉ ယူႇဝႆႉတႂ်ႈၵုမ်းၵမ် တိူင်းသိုၵ်းဝၢၼ်ႈမေႃႇ ၸႄႈမိူင်းၶၢင်။ ယဝ်ႉၵေႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းသမ်ႉ မိူၼ်ၼင်ႇ – သိုၵ်း KIA ၊ သိုၵ်း TNLA ၊ သိုၵ်း SSPP လႄႈ PDF ၸိူဝ်းၼႆႉ။

ပၢင်တိုၵ်း တီႈဝဵင်းမိူင်းမိတ်ႈ တႄႇလိူၼ်ၵျႅၼ်ႊၼိဝ်ႊရီႊၼႆႉမႃးသေ ႁဵတ်းႁႂ်ႈ တုမ်ႉတိူဝ်ႉႁိူၼ်းယေး ၵူၼ်းဝၢၼ်ႈလႄႈ ၵၢတ်ႇ ၸိူဝ်းၼႆႉ လူႉၵွႆထုၵ်ႇၾႆးမႆႈၼမ် ယဝ်ႉၵေႃႈ တုမ်ႉတိူဝ်ႉၵူၼ်းမိူင်း လူႉတၢႆ ဢမ်ႇယွမ်း 15 ၵေႃႉ၊ မၢတ်ႇၸဵပ်းၸွမ်းထႅင်ႈၼမ်။ လိူဝ်ၼၼ်ႉ ၵူၼ်းမိူင်းပၢႆႈၽေးသိုၵ်းထႅင်ႈ တင်းၼမ်လၢႆ။