ၵူၼ်းမိူင်းမိတ်ႈ ဢွၼ်ၵၼ်ပၢႆႈႁွတ်ႈထိုင် ဝဵင်းလိူဝ်ႇ ၼပ်ႉႁူဝ်ႁဵင် ယွၼ်ႉသိုၵ်းမၢၼ်ႈတင်း သိုၵ်းၶၢင် KIA လႄႈ PDF ယိုတ်း ယိုဝ်းၵၼ် ႁၢဝ်ႈႁႅင်း ဝႃႈၼႆ။
ၼႂ်းလိူၼ်ၵျႅၼ်ႊၼိဝ်ႊရီႊ 2024 ၼႆႉ ၵူၼ်းမိူင်းမိတ်ႈ ၼႂ်းၸိုင်ႈတႆးပွတ်းႁွင်ႇ ဢွၼ်ၵၼ်ပၢႆႈဢွၵ်ႇမႃး ဝဵင်းလိူဝ်ႇ မိူၼ်ၼင်ႇ ဝၢၼ်ႈဢႃႇသမ်ႇ၊ ဝၢၼ်ႈတူၼ်ႈၵႅင်း(ၼိူဝ်)၊ ဝၢၼ်ႈသၢႆလႅင်း၊ ဝၢၼ်ႈထုင်ႉလူင်၊ ဝၢၼ်ႈဢုင်းၵျေႃးလူင်၊ ဝၢၼ်ႈဢုင်း ၵျေႃးမႂ်ႇ၊ ဝၢၼ်ႈ ၼွင်ဢၢင်း၊ ဝၢၼ်ႈတူဝ်းပၢင်ႇ (ၶိူဝ်းၼိမ်း)၊ ဝၢၼ်ႈတွင်ႇၵႅင်း၊ ဝၢၼ်ႈၼႃးၶူဝ်ပၢင်ႇ၊ ဝၢၼ်ႈတူၼ်ႈၵႅင်း(တႂ်ႈ)၊ ဝၢၼ်ႈသူၺ်ႇၸႃႇလီႇ လႄႈ ၼႂ်းဝဵင်းထႅင်ႈ 4 ပွၵ်ႉ။ ယၢမ်းလဵဝ် ၵူၼ်းပၢႆႈၽေး တုၵ်းယွၼ်း ၶႂ်ႈပွၵ်ႈႁိူၼ်းယေး ယွၼ်ႉၽူႈလၵ်ႉၸၵ်ႉၶုတ်ႈ လိူင်ႇၼမ်။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်ဝႆႉ တီႈဝဵင်းလိူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေးသိုၵ်း တေ ၶၢမ်ႇၸုၼ်ႉၵၼ်သေ ပွၵ်ႈၶိုၼ်းႁိူၼ်းယေးၵၼ် ၼႆဢေႃႈ ယွၼ်ႉၽူႈလၵ်ႉၸၵ်ႉၶုတ်ႈ လိူင်ႇၼမ်ႁႅင်း မႆႈၸႂ်တင်းႁိူၼ်းယေး ဢေႃႈ။ ၵူၼ်းမိူင်း ဢၼ်ၽႅဝ်မႃးမီးဝႆႉတီႈဝဵင်းလိူဝ်ႇၼႆႉ ၼမ်ဝႃႈၼမ်ယဝ်ႉ ၵူၺ်းၵႃႈ ၵႂႃႇမီးဝႆႉၵူႈႁူးၵူႈတၢင်းဝႆႉဢေႃႈ ဢမ်ႇၶွၼ်ႈ ယူႇ တီႈလဵဝ်ၵၼ်ၶႃႈ”- ဝႃႈၼႆ။
ၸွမ်းၼင်ႇ ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလိူဝ်ႇ ယိုၼ်ႈထိုင်လႆႈသေ ၵဵပ်းဝႆႉ သဵၼ်ႈမၢႆႁူဝ်ၵူၼ်း ႁၢၼ်ႉတေႃႇထိုင် ဝၼ်းတီႈ 20 ၼႆႉ တီႈဝတ်ႉမႁႃၵမ်ၽေႃၸ တႆးလႅင်း တိူၵ်ႈပွၵ်ႉမႅင်ႇ ႁူဝ်ၵူၼ်း တင်းမူတ်းမီး 67 ၵေႃႉ။ ဝတ်ႉသိမ်ႇ တိူၵ်ႈမိၼ်း ဝုၼ်ႇ မိၼ်းၵျီး 22 ၵေႃႉ၊ ဝတ်ႉဢုင်းၵျေႃး 30 ၵေႃႉ၊ ဝတ်ႉမႁႃႇလႄႇတီႇ 38 ၵေႃႉ၊ ဝတ်ႉၸႂ်ၵတ်းယဵၼ် တိူၵ်ႈပွင်းလႄး 26 ၵေႃႉ လႄႈ တီႈႁိူၼ်းယေး ပီႈၼွင်ႉ ဝဵင်းၸႅတ်ႉမူႉ ထႅင်ႈ 7 ၵေႃႉ ႁူမ်ႈၵၼ် တင်းမူတ်း 188 ၵေႃႉ ဝႃႈၼႆ။
“ၸွမ်းၼင်ႇ တီႈႁဝ်းၶႃႈ ယိုၼ်းထိုင်လႆႈၵူၺ်း သဵၼ်ႈမၢႆ ၸိူဝ်းၼႆႉ ဢၼ်ႁဝ်းၶႃႈ ဢမ်ႇယိုၼ်းထိုင်လႆႈၵေႃႈ မီးထႅင်ႈၼမ်။ ဢၼ် ပၢႆႈၵႂႃႇသွၼ်ႈဝႆႉ ၸွမ်းၼႂ်းႁႆႈၼႂ်းၼႃး ၸိူဝ်းၼႆႉၵေႃႈ မီးၼမ်ဝႃႈၼမ်ယဝ်ႉ တီႈမိူင်းမိတ်ႈၼၼ်ႉ။ ၵူၼ်းမိူင်းပၢႆႈ ဢွၵ်ႇဝဵင်းမႃးၼႆႉ မိူင်းပေႃးယဵၼ်ၶႃႈယဝ်ႉ တီႈမိူင်းမိတ်ႈၼၼ်ႉ ၵိုတ်းၵူၼ်းထဝ်ႈ ပႂ်ႉႁိူၼ်း ၸိူင်ႉၼၼ်ၵူၺ်းၶႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈ။
လိူဝ်ၼၼ်ႉ ၵူၼ်းမိူင်းမိတ်ႈ ၸိူဝ်းပၢႆႈႁွတ်ႈထိုင်ဝႆႉ တၢင်းၾၢႆႇၼိူဝ်ဝဵင်း ယၢၼ်ဝဵင်းမွၵ်ႈ 7 လၵ်း တၢင်းဝၢၼ်ႈဢုမ်ႈ၊ ပုင်ႇ ၵၢင်လႄႈ ဝၢၼ်ႈပၢတ်ႈ ၸိူဝ်းၼၼ်ႉၵေႃႈ မီးထႅင်ႈတင်းၼမ် ဢွင်ႈတီႈ ၸိူဝ်းၼၼ်ႉတႄႉ ယၢမ်းလဵဝ် သိုၵ်းၶၢင် KIA ၵုမ်း ၵမ်ဝႆႉ ဝႃႈၼႆ။
တႄႇဢဝ် လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်း မၢၼ်ႈ တီႈဝဵင်းမိူင်းမိတ်ႈ၊ မၢၼ်ႈပဵင်း မႃးႁၢဝ်ႈႁႅင်းသေ ထိုင်ဝၼ်းတီႈ 21 ယၢမ်းၵၢင်ၼႂ် သိုၵ်းၶၢင် KIA ပိုၼ်ၽၢဝ်ႇ ၵုမ်းလႆႈ တင်းသွင်ဝဵင်းယဝ်ႉ ဝႃႈၼႆ။
ဢိင်ၼိူဝ် လွင်ႈပၢင်တိုၵ်းၼႆႉသေ တုမ်ႉတိူဝ်ႉၵူၼ်းမိူင်း ႁိူၼ်းယေး ၵူၼ်းဝၢၼ်ႈလူႉၵွႆ ထုၵ်ႇၾႆးမႆႈၼမ် ယဝ်ႉၵေႃႈ ၵၢတ်ႇလူင် ဝဵင်းမိူင်းမိတ်ႈ ၸိူဝ်းၼႆႉၵေႃႈ ထုၵ်ႇၾႆးမႆႈပႅတ်ႈမူတ်း။ ၵူၼ်းမိူင်း ၺႃးၸၢၵ်ႇလူႉတၢႆၸွမ်း ဢမ်ႇယွမ်း 15 ၵေႃႉ မၢတ်ႇၸဵပ်း ၸွမ်းထႅင်ႈ တင်းၼမ်။
