ၽူႈဢုပ်ႉပိူင်ႇဝဵင်းလၢႆးၶႃႈ ၸႂ်ႉၵူၼ်းမိူင်း ႁဵတ်းပျီႇတူႉၸိတ်ႉ

ၵၢင်လိူၼ်ၼႆႉ ၽူႈၵွၼ်းၸႄႈဝဵင်းလၢႆးၶႃႈ (ၽူႈဢုပ်ႉပိူင်ႇ) ႁွင်ႉၽူႈၵွၼ်းပွၵ်ႉ/ ဢိူင်ႇ ႁဵတ်းပၢင်ၵုမ်သေ သင်ႇလူင်းမႃးႁႂ်ႈ ၵူၼ်းမိူင်း ႁဵတ်းပျီႇတူႉၸိတ်ႉ ယႃႇႁႂ်ႈယွမ်း 30 ၵေႃႉ ဢမ်ႇၼၼ် 50 ၵေႃႉ ဝႃႈၼႆ။

ဝၼ်းတီႈ 16/1/2024 ယၢမ်းၵၢင်ၼႂ် ဢူးၽဵဝ်းမိၼ်ႉဝုၺ်ႇ (ဉီးဖြိုးမြင့်ဝေ) ၽူႈၵွၼ်းၸႄႈဝဵင်း ႁွင်ႈၽူႈယႂ်ႇၵူၼ်းလူင် ၼႂ်းပွၵ်ႉ 1 ထိုင် 4 တင်း ပွၵ်ႉမဵဝ်းမသေ ႁဵတ်းပၢင်ၵုမ် တီႈလုမ်းၽူႈၵွၼ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း လွင်ႈၸႂ်ႉၵူၼ်းမိူင်းႁဵတ်းပျီႇတူႉၸိတ်ႉ ၼႆယဝ်ႉ။  

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၽူႈဢုပ်ႉပိူင်ႇ ႁွင်ႉႁဵတ်းပၢင်ၵုမ်သေ သင်ႇလူင်းမႃး ႁႂ်ႈၵူၼ်းမိူင်းႁဵတ်း ပျီႇတူႉၸိတ်ႉ ။ တီႈဝဵင်းလၢႆးၶႃႈၼႆႉ တင်းမူတ်းမီး 4 ပွၵ်ႉ။ 1 ပွၵ်ႉလႂ် ႁႂ်ႈႁဵတ်း 5 ၵေႃႉ။ ယဝ်ႉၵေႃႈ ဢိူင်ႇမဵဝ်ႉမထႅင်ႈ 8 ဝၢၼ်ႈ။ ၼၼ်ႉၵေႃႈ 1 ဝၢၼ်ႈလႂ် 8 ၵေႃႉ။ ၶဝ်ဝႃႈ တေဢမ်ႇႁႂ်ႈယွမ်း 30 ၵေႃႉ ထိုင် 50 ၵေႃႉ။ ႁႂ်ႈသူင်ႇသဵၼ်ႈၸိုဝ်ႈပၼ်ၶဝ် ၼႂ်းႁၢင် လိူၼ်ၼႆႉ။ ၵဵဝ်ႇၵပ်းလွင်ႈၼႆႉ ၵူၼ်းမိူင်းဢမ်ႇၽွမ်ႉ ယူႇတီႈ ၽူႈၵွၼ်းပွၵ်ႉ/ ဢိူင်ႇၶဝ် ၸင်ႇၵႂႃႇတိူင်ႇလၢတ်ႈတီႈ တပ်ႉသိုၵ်းမၢၼ်ႈ (တပ်ရင်းမှူး) 64 ၼႆႉသေ ယူႇတီႈ ၽူႈၵွၼ်းတပ်ႉၼႆႉ တေတၢင်ႇထိုင်ပၼ်တၢင်းၼိူဝ် လွင်ႈဝႃႈ ၵူၼ်းမိူင်းဢမ်ႇႁဵတ်းလႆႈ ပျီႇ တူႉၸိတ်ႉ”- ဝႃႈၼႆ။

မိူဝ်ႈဝၼ်းတီႈ 25 ၼႆႉ ယူႇတီႈ ၽူႈယႂ်ႇၵူၼ်းလူင် ၽူႈၵွၼ်းပွၵ်ႉ/ ဢိူင်ႇ လႆႈၵႂႃႇတိူင်ႇလၢတ်ႈထိုင် တီႈတပ်ႉၵွင် ၶမယ 64 ၼၼ်ႉ ဝႆႉယဝ်ႉ ႁၢၼ်ႉတေႃႇထိုင်ယၢမ်းလဵဝ် ပႆႇမီးလွင်ႈတုမ်ႉတွပ်ႇသင်မႃးၶိုၼ်း ဝႃႈၼႆ။  

“ဢၼ်ၶဝ် ၸႂ်ႉၵူၼ်းမိူင်းႁဵတ်းပျီႇတူႉၸိတ်ႉၼႆႉ ႁဝ်းၶႃႈလၢမ်းတူၺ်းတႄႉ ႁႅင်းသိုၵ်းမၢၼ်ႈၼႆႉ တေဢမ်ႇမီးယဝ်ႉ ပေႃးမီးၵေႃႈ တေမီးဢေႇ ယွၼ်ႉၶဝ်ဢွၵ်ႇၼႃႈသိုၵ်းၼမ် ၶဝ်တေၵဵပ်းဢဝ်ၵူၼ်းမိူင်းႁဵတ်းပျီႇတူႉၸိတ်ႉသေ ပႂ်ႉဝဵင်းဝႆႉ ၸိူင်ႉ ၼၼ်။ ႁႂ်ႈၵူၼ်း မိူင်း ဢဝ်ပုၼ်ႈၽွၼ်း ပႂ်ႉဝဵင်းၽႂ်မၼ်းၵႂႃႇ။ သင်ပိူၼ်ႈမႃးယိုဝ်းလၢႆးၶႃႈၼႆၵေႃႈ ပျီႇတူႉၸိတ်ႉၸိူဝ်းၼႆႉ ၵႃႈတေလႆႈယိုဝ်း ဢွၼ် တၢင်းယဝ်ႉ မိူၼ်တင်းပဵၼ်တူဝ်တႅၼ်းသိုၵ်းမၢၼ်ႈသေ ပႂ်ႉဝဵင်းၼၼ်ႉၶႃႈယဝ်ႉ။ တၢင်ႇဝဵင်းတႄႉ ပိူၼ်ႈဢမ်ႇႁဵတ်း ပျီႇတူႉၸိတ်ႉၼႆႉ မီးလၢႆးၶႃႈၼႆႉၵူၺ်း ၸႂ်ႉႁဵတ်း”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တၢင်းပျီႇတူႉၸိတ်ႈဝၢၼ်ႈပၢင်ႇ 758 ၼၼ်ႉၵေႃႈ ၾိုၵ်းၽွၼ်ႉဝႆႉ ၵၢၼ်သိုၵ်း ပၼ်ၵူၼ်းမိူင်း မိူၼ်ၼင်ႇ – ဢိူင်ႇဝၢၼ်ႈ လိူဝ်ႇ၊ ဢိူင်ႇဝၢၼ်ႈႁႅင်ႈလႄႈ ဢိူင်ႇဝၢၼ်ႈထီႇ ဢၼ်ၶဝ်ၵုမ်းၵမ်ဝႆႉ ၸိူဝ်းၼၼ်ႉ ၼိုင်ႈႁိူၼ်းလႂ် ၼိုင်ႈၵေႃႉ ႁႂ်ႈလႆႈၾိုၵ်း – ၵူၼ်းပိုၼ်ႉတီႈလၢတ်ႈ။  

ၸွမ်းၼင်ႇ ၽႅၼ်ၵၢၼ်ယၼ်ႇသိုၵ်း 1027 ၸုမ်းဢူၺ်းလီ ပွတ်းႁွင်ႇ 3 ၸုမ်း ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈမႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ႁိုင် 3 လိူၼ်ယဝ်ႉ ပၢင်တိုၵ်းပႆႇယဵၼ်။

ယၢမ်းလဵဝ် တၢင်းၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်းၼႆႉၵေႃႈ သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO တင်း တပ်ႉ သိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းႁၢင်လိူၼ်ၵျႅၼ်ႊၼိဝ်ႊရီႊၼႆႉ သိုၵ်း PNLA ပိုၼ်ၽၢဝ်ႇဢွၵ်ႇမႃး ၵုမ်းလႆႈ ႁူင်းပလိၵ်ႈမၢၼ်ႈလႄႈ တပ်ႉပၢင်သဝ်းသိုၵ်းမၢၼ်ႈ ၶမယ 424 ယဝ်ႉ ဝႃႈၼႆ။