Saturday, June 22, 2024

ၵူၼ်းလႃႈသဵဝ်ႈ ထုၵ်ႇသိုၵ်းမၢၼ်ႈ ယိုဝ်းတၢႆထႅင်ႈ ၵေႃႉၼိုင်ႈ

Must read

သိုၵ်းမၢၼ်ႈ ယိုဝ်းၵူၼ်းမိူင်းလႃႈသဵဝ်ႈ တၢႆထႅင်ႈၵေႃႉၼိုင်ႈ တီႈၼိူဝ်သဵၼ်ႈတၢင်း ၽွင်းတိုၵ်ႉႁေႃႈရူတ်ႉၶိူင်ႈမႃး ဝႃႈၼႆ။

ဝၼ်းတီႈ 21/1/2024 ယၢမ်းၵၢင်ဝၼ်း 11 မူင်း သိုၵ်းမၢၼ်ႈ ယိုဝ်းၽူႈၸၢႆး ဢႃယု 40 ပၢႆ ၵေႃႉၼိုင်ႈ တီႈပွၵ်ႉ 5 ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ မိူဝ်ႈၽွင်းမၼ်းၸၢႆး ႁေႃႈရူတ်ႉၶိူင်ႈမႃး ထုၵ်ႇသိုၵ်းမၢၼ်ႈႁွင်ႉ ဢမ်ႇၵိုတ်းလႄႈ ၺႃးယိုဝ်း ဝႃႈ ၼႆ။  

- Subscription -

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆးသမ်ႉ လုၵ်ႉတၢင်းယေႇၵၼ်ႇတွင်ႇလၼ်း (ရေ ကန်တောင်လမ်း) ၼၼ်ႉ ႁေႃႈရူတ်ႉၶိူင်ႈမႃး ယဝ်ႉၵေႃႈ မၼ်းၸၢႆးသမ်ႉ သႂ်ႇသၢႆထွမ်ႇႁူဝႆႉလႄႈ ထုၵ်ႇသိုၵ်းမၢၼ်ႈႁွင်ႉၵိုတ်း ဢမ်ႇၵိုတ်းလႄႈ ၺႃးယိုဝ်းတၢႆ တီႈၸဵင်ႇတၢင်း ယေႇၵၼ်ႇတွင်ႇလၼ်းလႄႈ 49 လၼ်း (၄၉ လမ်း) ၼၼ်ႉၶႃႈ ဢေႃႈ”- ဝႃႈၼႆ။

ယွၼ်ႉၽႅၼ်ၵၢၼ်ယၼ်ႇသိုၵ်း 1027 ၼၼ်ႉသေ တီႈဝဵင်းလႃႈသဵဝ်ႈၼႆႉ သိုၵ်းမၢၼ်ႈ ဢွၵ်ႇပိူင်မႃႇသျႄႇလေႃးဝႆႉ တင်ႈတႄႇႁူဝ်လိူၼ်ၼူဝ်ႊဝႅမ်ႊပိူဝ်ႊ 2023 ၼၼ်ႉမႃးသေ ႁၢၼ်ႉတေႃႇထိုင်ယၢမ်းလဵဝ် ပႆႇပူတ်း။ ပိူင်မႃႇသျႄႇလေႃးၼႆႉ ႁၢမ်ႈ ၵူၼ်းမိူင်းဢွၵ်ႇ ၼွၵ်ႈႁိူၼ်းယေး ယၢမ်းၵၢင်ၶမ်ႈၵၢင်ၶိုၼ်း ၼႆယဝ်ႉ။

ၵူၼ်းၼုမ်ႇ လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တင်ႈတႄႇ ၶဝ်ဢွၵ်ႇပိူင်မႃႇသျႄႇလေႃးၼႆႉၼႃး ၶဝ်ယိုဝ်းၵူၼ်းၼႂ်းဝဵင်းလႃႈ သဵဝ်ႈ လူႉတၢႆ 8 ၵေႃႉယဝ်ႉ။ ယွၼ်ႉပဵၼ်ၼွၵ်ႈၶၢဝ်းယၢမ်း တီႈဢၼ်ၶဝ်ဢွၵ်ႇပိူင်ၼႆႉဝႆႉၼႆဝႃႇ။ ၵူၼ်းမိူင်း ဢၼ်ထုၵ်ႇယိုဝ်းတၢႆ ၼၼ်ႉ ၶဝ်တေဢမ်ႇထၢမ်သင်သေ ပေႃးႁၼ်ၵေႃႈ ယိုဝ်းသႂ်ႇၵမ်းလဵဝ် ၸိူင်ႉၼႆဢေႃႈ။ ၵူၼ်းမိူင်းတႄႉ ဢမ်ႇမီးၽႂ်ႁတ်းဢွၵ်ႇ ႁိူၼ်းၶႃႈ”- ဝႃႈၼႆ။

လိူဝ်ၼၼ်ႉ မိူဝ်ႈဝၼ်းတီႈ 22 ယၢမ်းၵၢင်ၶမ်ႈမွၵ်ႈ 7 မူင်းၶိုင်ႈ ၼႆႉၵေႃႈ သိုၵ်းမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈ တီႈၵဵၵ်ႉ ႁိမ်းႁိူၼ်း ၽူႈၵွၼ်းတိူင်း ၼႂ်းတပ်ႉငဝ်ႈငုၼ်းတိူင်းသိုၵ်းလႃႈသဵဝ်ႈ ၼၼ်ႉၵေႃႈ ထဵင်မေႃးၵၼ်သေ ယိုဝ်းၵၼ်ၶိုၼ်း တၢႆ 2 မၢတ်ႇ 1 ဝႃႈၼႆ။

“သိုၵ်းမၢၼ်ႈ ၼင်ႇၵၼ် ယိုဝ်းၵၼ်ၶိုၼ်း တၢႆထင်တီႈ 1 ၵေႃႉ မၢတ်ႇၸဵပ်း 2 ၵေႃႉ။ ၽိူဝ်ႇႁွတ်ႈၽႅဝ် တီႈႁူင်းယႃၵေႃႈ လူႉတၢႆ ထႅင်ႈၵေႃႉၼိုင်ႈ။ ဢၼ်လူႉတၢႆၼၼ်ႉ ပဵၼ်ၵႅမ်ၶုၼ်ႁၢၼ်လႄႈ ႁူဝ်သိုၵ်းလူင်။ ဢၼ်မၢတ်ႇၸဵပ်းၼၼ်ႉသမ်ႉ ပဵၼ်ၶုၼ်သိုၵ်း လူင်”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် သိုၵ်းမၢၼ်ႈ ဢၼ်လႆႈမၢတ်ႇၸဵပ်းၼၼ်ႉ လႆႈသူင်ႇယူတ်းယႃတူဝ်ဝႆႉ တီႈႁူင်းယႃသိုၵ်း မၢႆ 9 ဝဵင်းလႃႈသဵဝ်ႈ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း