ၵူၼ်းမိူင်းယႆ ၵေႃႉၼိုင်ႈ ၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆးသေ ႁၢႆတူဝ်ၵႂႃႇႁိုင် 3 လိူၼ်ယဝ်ႉ တေႃႇထိုင်ယၢမ်းလဵဝ် ၵပ်း ၾူၼ်း ၸူးဢမ်ႇလႆႈလႄႈ ပီႈၼွင်ႉတင်းႁိူၼ်းယေး ဢွၼ်ၵၼ်မႆႈၸႂ်။
တႄႇဢဝ် လိူၼ်ၼူဝ်ႊဝႅမ်ႊပိူဝ်ႊ 2023 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် ၸၢႆးႁွမ် ၵူၼ်းမိူင်းယႆ ၵႂႃႇႁဵတ်းၵၢၼ် တီႈဝဵင်း လၢဝ်ႇၵၢႆး ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ (MNDAA) ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ႁၢႆတူဝ် ၵႂႃႇႁိုင် 3 လိူၼ်ယဝ်ႉ ၵပ်းၾူၼ်းၸူးဢမ်ႇလႆႈ ဝႃႈၼႆ။
ပီႈၼွင်ႉ ၸၢႆးႁွမ် တီႈဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၸၢႆး ႁၢႆတူဝ်ၵႂႃႇ ၸဵမ်မိူဝ်ႈလိူၼ် 11 လွင်ႈၼၼ်ႉၶႃႈ ဢေႃႈ မိူဝ်ႈၽွင်းပၢင်တိုၵ်း တီႈၵုၼ်လူင် – ႁူဝ်ပၢင်ႇ ပဵၼ်ႁၢဝ်ႈႁႅင်းၼၼ်ႉၶႃႈ။ တႄႇဢဝ်ၼၼ်ႉမႃး တေႃႇထိုင်မိူဝ်ႈလဵဝ် ၵပ်းၾူၼ်းၸူး ၵေႃႈ ဢမ်ႇလႆႈသေပွၵ်ႈယဝ်ႉ တၢႆႁိုဝ်လိပ်းႁိုဝ်ၵေႃႈ ဢမ်ႇႁူႉ မႆႈၸႂ်မၼ်းၸၢႆးၶႃႈဢေႃႈ”- ဝႃႈၼႆ။
ၸၢႆးႁွမ်ၼႆႉ ပဵၼ်ၵူၼ်းၸႃတိ ဝၢၼ်ႈၼႃးၶူဝ် ပဵၼ်လုၵ်ႈၸၢႆး ၸၢႆးၽူင်းလႄႈ ပႃႈၼူၼ်း ဝၢႆးသေ ၵေႃႉပဵၼ်မႄႈ လူႉသဵင်ႈ ၵႂႃႇယဝ်ႉ မၼ်းၸၢႆး မႃးယူႇၸွမ်း ပႃႈမူၼ်း တီႈပွၵ်ႉ 3 ဝဵင်းမိူင်းယႆ။ သင်ၽႂ် ထူပ်းႁၼ် မၼ်းၸၢႆးၸိုင် ၶႅၼ်းတေႃႈ ပွင်ႇလႅင်းထိုင် တီႈပႃႈမူၼ်း မၢႆၾူၼ်း 0891263839 (မၢႆၾူၼ်းမၢၼ်ႈ) ၼႆႉသေၵမ်း။
ပူၼ်ႉမႃး မိူဝ်ႈဝၼ်းတီႈ 25/11/2023 ၼၼ်ႉၵေႃႈ ၸၢႆးသႅင်ႁၢၼ်ၾႃႉ ဢႃယု 26 ပီ ထုၵ်ႇသိုၵ်းၵဝ်ႈၵၢင်ႉ MNDAA တီႉ ၺွပ်း ၵုမ်းတူဝ်မၼ်းၸၢႆး တီႈႁိမ်းဝၢၼ်ႈပႃႇသိင်ႇၵျေႃႇ တၢင်းဢွၵ်ႇဝဵင်းလၢဝ်ႇၵၢႆး ၼႂ်းၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၼႆယဝ်ႉ။
