သိုၵ်းမၢၼ်ႈတင်း သိုၵ်းၶၢင် KIA လႄႈ PDF ပဵၼ်ပၢင်တိုၵ်းႁၢဝ်ႈႁႅင်းသေ တုမ်ႉတိူဝ်ႉၵူၼ်းမိူင်းမိတ်ႈ ဢွၼ်ၵၼ်ပၢႆႈၽေးသိုၵ်း ႁွတ်ႈထိုင်ဝဵင်းလိူဝ်ႇ မွၵ်ႈ 200 ၵေႃႉ။
ဝၼ်းတီႈ 20/1/2024 ၼႆႉ ၵူၼ်းမိူင်းမိတ်ႈ ပၢႆႈႁွတ်ႈထိုင် ဝတ်ႉမႁႃၵမ်ၽေႃၸ တႆးလႅင်း၊ ဝတ်ႉသိမ်ႇ တိူၵ်ႈမိၼ်းဝုၼ်ႇမိၼ်းၵျီး၊ ဝတ်ႉဢုင်းၵျေႃး၊ ဝတ်ႉမႁႃႇလႄႇတီႇလႄႈ ဝတ်ႉၸႂ်ၵတ်းယဵၼ် တိူၵ်ႈပွင်းလႄး ၼႂ်းဝဵင်းလိူဝ်ႇ တင်းမူတ်းမီးႁူဝ်ၵူၼ်း 178 ၵေႃႉ ၼႆယဝ်ႉ။
ၵူၼ်းမိူင်းမိတ်ႈ ဢၼ်ပၢႆႈႁွတ်ႈထိုင်ၵႂႃႇ တီႈဝဵင်းလိူဝ်ႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ ဢၼ်လႆႈၵဵပ်းသဵၼ်ႈမၢႆဝႆႉ ၵူၺ်း ဢၼ်ဢမ်ႇလႆႈသဵၼ်ႈမၢႆၵေႃႈ မီးထႅင်ႈတင်းၼမ်ဢေႃႈ။ တီႈႁိမ်းၸၼ်ႉၸွမ် (နည်းပညာတက္ကသိုလ် အိုးဘိုရပ် မန္တ လေး) ၼၼ်ႉၵေႃႈ မီးဝႆႉ ၸၢႆး 5 ၵေႃႉ၊ ယိင်း 9 ၵေႃႉ တႃႇၼႃႈႁိူၼ်း 5 လင်။ ၶဝ်ၶၢတ်ႈယူႇတီႈႁိူၼ်း ၸူးငိုၼ်းၵၼ်သေ ၵိၼ် ႁူမ်ႈၵၼ်ၵႂႃႇ ၸိူင်ႉၼၼ်ဢေႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်သွၼ်ႈဝႆႉ တီႈဝတ်ႉမႁႃၵမ်ၽေႃၸတႆးလႅင်း တိူၵ်ႈပွၵ်ႉမႅင်ႇ ဝဵင်းလိူဝ်ႇသမ်ႉ ၸၢႆး 20 ၵေႃႉ ယိင်း 42 ၵေႃႉ ႁူမ်ႈ 62 ၵေႃႉ။ တီႈၵျွင်းသိမ်ႇ တိူၵ်ႈမိၼ်းဝုၼ်ႇမိၼ်းၵျီးသမ်ႉ ၸၢႆး 8 ၵေႃႉ၊ ယိင်း 14 ၵေႃႉ ႁူမ်ႈ 22 ၵေႃႉ။ တီႈဝတ်ႉဢုင်း ၵျေႃး ၸၢႆး 13 ၵေႃႉ၊ ယိင်း 17 ၵေႃႉ ႁူမ်ႈ 30 ၵေႃႉ။ ဝတ်ႉမႁႃႇလႄႇတီႇ ၸၢႆး 14 ၵေႃႉ၊ ယိင်း 24 ၵေႃႉ ႁူမ်ႈ 38 ၵေႃႉလႄႈ ဝတ်ႉၸႂ်ၵတ်းယဵၼ်သမ်ႉ ၸၢႆး 8 ၵေႃႉ ယိင်း 18 ၵေႃႉ ႁူမ်ႈ 26 ၵေႃႉ ၼႆယဝ်ႉ။
တႄႇဢဝ် လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းၶၢင် KIA တင်း ၸုမ်းၵႅတ်ႇၶႄၵူၼ်းမိူင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်း မၢၼ်ႈ တီႈဝဵင်းမိူင်းမိတ်ႈ၊ မၢၼ်ႈပဵင်း မႃးႁၢဝ်ႈႁႅင်းသေ ထိုင်ဝၼ်းတီႈ 21 ယၢမ်းၵၢင်ၼႂ် သိုၵ်းၶၢင် KIA ပိုၼ်ၽၢဝ်ႇ ၵုမ်းလႆႈ တင်းသွင်ဝဵင်းယဝ်ႉ ဝႃႈၼႆ။
ဢိင်ၼိူဝ် လွင်ႈပၢင်တိုၵ်းၼႆႉသေ တုမ်ႉတိူဝ်ႉၵူၼ်းမိူင်း ႁိူၼ်းယေး ၵူၼ်းဝၢၼ်ႈလူႉၵွႆ ထုၵ်ႇၾႆးမႆႈၼမ် ယဝ်ႉၵေႃႈ ၵၢတ်ႇလူင် ဝဵင်းမိူင်းမိတ်ႈ ၸိူဝ်းၼႆႉၵေႃႈ ထုၵ်ႇၾႆးမႆႈပႅတ်ႈမူတ်း။ ၵူၼ်းမိူင်း ၺႃးၸၢၵ်ႇလူႉတၢႆၸွမ်း ဢမ်ႇယွမ်း 15 ၵေႃႉ မၢတ်ႇၸဵပ်း ၸွမ်းထႅင်ႈ တင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ