မိူဝ်ႈၼႆႉ ဝၼ်းတီႈ 24/1/2024 ယၢမ်ႈၵၢင်ၼႂ် 9 မူင်း ၵူၼ်းဝၢၼ်ႈတၢၼ်ႇလုၼ်ႇ ႁူဝ်ၵူၼ်း 40 ၵေႃႉ ဢွၼ်ၵၼ်ငိူင်ႉပၢႆႈ ၽေးသိုၵ်း ၵႂႃႇသွၼ်ႈဝႆႉ တီႈဢိူင်ႇၼႃးၼိဝ်ႉ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ယွၼ်ႉသိုၵ်းၵဝ်ႈၵၢင်ႉ မႃးတူင်ႉၼိုင်ႁိမ်း သၢပ်ႇဝၢၼ်ႈသၢပ်ႇဝဵင်းၼမ်။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉၵူၼ်းဝၢၼ်ႈ ႁၼ်သိုၵ်းၵဝ်ႈၵၢင်ႉ တူင်ႉၼိုင် ယူႇၸွမ်းၶႅပ်ႇဝၢၼ်ႈ/ ၶႅပ်ႇဝဵင်းၼမ်။ ၵူဝ်သိုၵ်းၶဝ် ၶဝ်ႈမႃးယူႇၼႂ်းဝၢၼ်ႈ။ ပေႃးမႃးယူႇၼႂ်းဝၢၼ်ႈယဝ်ႉ ၵူဝ်သိုၵ်းမၢၼ်ႈ ၸႂ်ႉ ၶိူင်ႈမိၼ်မႃးပွႆႇမၢၵ်ႇသႂ်ႇလႄႈ ၵွပ်ႈၼႆ ၸင်ႇဢွၼ်ၵၼ်ငိူင်ႉဝႄႈဝႆႉထႃႈ” – ဝႃႈၼႆ။

ၵူၼ်းဝၢၼ်ႈတၢၼ်ႇလုၼ်ႇ ဢွၼ်ၵၼ်ငိူင်ႈပၢႆႈၽေးသိုၵ်း ၵႂႃႇသွၼ်ႈဝႆႉတီႈဝတ်ႉသၢင်ႇၶမ်း ဝၢၼ်ႈၵုင်းပဝ်း ၼႂ်းဢိူင်ႇၼႃး ၼိဝ်ႉ ၸႄႈဝဵင်းလႃႈသဵဝ်ႈ ႁူဝ်ၼပ်ႉ မီး 40 ၵေႃႉ။ ၼႂ်းၼၼ်ႉ ၸၢႆး 19 ၵေႃႉ၊ ယိင်း 21 ၵေႃႉ။ ယၢမ်းလဵဝ် ပႆႇမီးၸုမ်းလႂ် ၵႂႃႇၵမ်ႉၸွႆႈ ၶွင်ၵိၼ်ယႅမ်ႉ။

ဝၢၼ်ႈတၢၼ်ႇလုၼ်ႇ မီးၼႂ်းၵႄႈလႃႈသဵဝ်ႈ – ၼမ်ႉပွင်ႈ ၵမ်ႈၼမ် ပဵၼ်ၸၢဝ်းၶႄႇလႄႈ ၸၢဝ်းတႆး ယူႇႁူမ်ႈၵၼ်။ ယၢမ်းလဵဝ် သိုၵ်းမၢၼ်ႈတင်း သိုၵ်းၵဝ်ႈၵၢင်ႉ တိုၵ်ႉၶဵင်ႈၶႅင်ၵၼ်ဝႆႉယူႇလႄႈ ၵူၼ်းမိူင်းတႄႉ ပႆႇႁတ်းပွၵ်ႈမိူဝ်းၵၼ် ဝႃႈၼႆ။

တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီ 2024 ၼႆႉမႃး သိုၵ်းမၢၼ်ႈ ၵႆႉၵူတ်ႇထတ်းၸႅတ်ႈထၢမ် ၵႃးၵူၼ်းမိူင်း ၸိူဝ်းၶဝ်ႈ ဢွၵ်ႇၵႂႃႇမႃး ၼႂ်းဝဵင်းလႄႈ ၸိူဝ်းပဵၼ်ဝဵင်း ဢၼ်ၸုမ်းဢူၺ်းလီပွတ်းႁွင်ႇ 3 ၸုမ်း ၵုမ်းၵမ်ဝႆႉ ၸိူဝ်းၼၼ်ႉႁၢဝ်ႈႁႅင်း။ ယွၼ်ႉၼၼ် ၵူၼ်းမိူင်း ၸိူဝ်းလူဝ်ႇဢွၵ်ႇတႃႈပႆတၢင်းၵႂႃႇမႃးၸိူဝ်းၼႆႉ ဢွၼ်ၵၼ် ထူပ်းတၢင်းယၢပ်ႇၽိုတ်ႇႁႅင်း။

ယဝ်ႉၵေႃႈ သဵၼ်ႈတၢင်းၵႂႃႇမႃး ၼႂ်းၸိုင်ႈတႆးပွတ်းႁွင်ႇ မၢင်တီႈ ထုၵ်ႇသိုၵ်းမၢၼ်ႈ – ၸုမ်းယိပ်းၵွင်ႈၵၢင်ႇၶဝ် ႁၢင်ႈၵၢင်မၢၵ်ႇ ဝႆႉလႄႈ ၵူၼ်းမိူင်း မၢင်ၸိူဝ်း ယဵပ်ႇၺႃးမၢၵ်ႇ တႅၵ်ႇတိူဝ်ႉသႂ်ႇ ထိုင်တီႈလႆႈလူႉတၢႆၵေႃႈမီးမႃးၼမ် ၼႆယဝ်ႉ။